ನ್ಯಾನೋ ಕಥೆಗಳು

Updated on:

03 Sep 2013, 10:33 pm

ಒಬ್ಬ ಸೂರ್ಯನ ಜನನಕ್ಕೆ ಕೋಟಿ ಇಬ್ಬನಿ ಹನಿಗಳು ಸಾವನ್ನಪ್ಪಿದವು!
ಮದುವೆ ಮಂಟಪದಲ್ಲಿ ಉಂಡೆದ್ದವರ ಎಲೆಗಳಲ್ಲಿ ಚಲ್ಲಾಡಿದ ಭಾರೀ ಭೋಜನ, ಬಡವನ ಹಸಿವನ್ನು ಅಣಕಿಸುತ್ತಿದೆ.
ಶಬರಿಯಂತೆ ಅವನಿಗಾಗಿ ಕಾಯುತ್ತಾ ಕುಳಿತವಳ ತಲೆಯಲ್ಲೀಗ ನೆರೆಗೂದಲು!
ಕ್ಯಾಲೆಂಡರ್ ಬದಲಾಯಿತು, ಬದುಕಿನ್ನೂ ಹಾಗೇ ಇದೆ!
ಮದುವೆಗಳು ಸ್ವರ್ಗದಲ್ಲಿ ನಿಶ್ಚಯಿಸಿರುತ್ತವಂತೆ!? ಮನೆಯಲ್ಲಿ ಮದುವೆಗೆ ಒಪ್ಪದ ಕಾರಣ ಪ್ರೇಮಿಗಳು ಆತ್ಮಹತ್ಯೆ ಮಾಡಿಕೊಂಡರು. ಈಗ ಸ್ವರ್ಗದಲ್ಲಿ ಅವರ ಮದುವೆ, ಮಿಲನ ಇತ್ಯಾದಿ...
ಅವನು ಅವಳ ಕೆನ್ನೆಗೆ ಮುತ್ತಿಡುವ ಕ್ಷಣ, ಮನೆ ಮುಂದಿನ ಮಲ್ಲಿಗೆ ಗಿಡದಲ್ಲಿ ಮೊಗ್ಗೊಂದು ಅರಳಿ, ಗಾಳಿಯ ಜೊತೆ ಸುಗಂಧ ಪಸರಿಸಿತು !
ಮನೆಯ ಕಳ್ಳತನಕ್ಕೆಂದು ಬಂದವನ ಮನಸನ್ನು ಆ ಮನೆಯ ಯಜಮಾನನ ಮಗಳು ಕದ್ದುಬಿಟ್ಟಳು !
ನೀರಿಗಾಗಿ ಬಿಂದಿಗೆ ಹಿಡಿದು ಸಾಲುಗಟ್ಟಿ ನಿಂತ ಜನರನ್ನು ನೋಡಿದ ಸಹೃದಯಿ ಮೋಡವೊಂದು ಬಾನಿನಿಂದ ಜಿಗಿಯಿತು !
ಚಲಿಸುತ್ತಿದ್ದ ಬಸ್ಸನ್ನು ಹತ್ತಲು ಓಡುತ್ತಿದ್ದವನನ್ನು ಆಂಬುಲೆನ್ಸ್ ಹೊತ್ತೊಯ್ಯಿತು !