ಫೋರ್ಡ್ ಫೌಂಡೇಶನ್ ಪ್ರಕರಣ: ಭಾರತದಿಂದ ಸ್ಪಷ್ಟೀಕರಣ ಕೇಳಿದ ಅಮೆರಿಕಾ

ವಾಶಿಂಗ್ಟನ್: ಫೋರ್ಡ್ ಫೌಂಡೇಶನ್ ಮತ್ತು ಗ್ರೀನ್ ಪೀಸ್ ಸಂಸ್ಥೆಗಳ ಮೇಲೆ ನಿಷೇಧಕ್ಕೆ ಮುಂದಾಗಿರುವ ಭಾರತದ ನಡೆಯ ಬಗ್ಗೆ ಅಸಮಧಾನ ವ್ಯಕ್ತಪಡಿಸಿರುವ ಅಮೆರಿಕಾ ಈ ನಡೆಯ ಬಗ್ಗೆ ಭಾರತದಿಂದ ಸ್ಪಷ್ಟೀಕರಣ ಕೇಳಿದೆ.

"ಭಾರತದ ಗೃಹ ಸಚಿವಾಲಯ ಗ್ರೀನ್ ಪೀಸ್ ಸಂಸ್ಥೆಯ ನೊಂದಣಿಯನ್ನು ರದ್ದು ಮಾಡಿರುವುದು ಹಾಗೂ ಫೋರ್ಡ್ ಫೌಂಡೇಶನ್ ನನ್ನು ಕಣ್ಗಾವಲಿನಲ್ಲಿ ಇಟ್ಟಿರುವುದು ನಮಗೆ ತಿಳಿದಿದೆ" ಎಂದು ಅಮೆರಿಕಾ ಸರ್ಕಾರದ ಉಪ ವಕ್ತಾರ ಮಾರಿ ಹಾರ್ಫ್ ತಿಳಿಸಿದ್ದಾರೆ.

ಈ ಸ್ವಲ್ಪ ದಿನದ ಹಿಂದ ಗ್ರೀನ್ ಪೀಸ್ ಸಂಸ್ಥೆಯ ನೊಂದಣಿಯನ್ನು ಭಾರತ ಸರ್ಕಾರ ರದ್ದು ಮಾಡಿತ್ತು. ಹಾಗೆಯೇ ಫೋರ್ಡ್ ಫೌಂಡೇಶನ್ ಸಂಸ್ಥೆಯ ಚಟುವಟಿಕೆಗಳ ಮೇಲೆ ಹದ್ದಿನ ಕಣ್ಣಿಟ್ಟು, ಆ ಸಂಸ್ಥೆಯಿಂದ ಹರಿದು ಬರುವ ಹಣದ ಬಗ್ಗೆ ಗೃಹಸಚಿವಾಲಕ್ಕೆ ಸೂಚನೆ ನೀಡಲು ಆರ್ ಬಿ ಐ ಗೆ ಸರ್ಕಾರ ಸೂಚನೆ ನೀಡಿತ್ತು.

ಫೋರ್ಡ್ ಫೌಂಡೇಶನ್ ಸಂಸ್ಥೆ, ಗುಜರಾತ್ ಗಲಭೆಗಳ ವಿರುದ್ಧ ಹೋರಾಡುತ್ತಿರುವ ಸಾಮಾಜಿಕ ಕಾರ್ಯಕರ್ತೆ ತೀಸ್ಥಾ ಸೆತಲ್ವಾಡ ಅವರಿಗೆ ಧನ ಸಹಾಯ ಮಾಡುತ್ತಿರುವುದರಿಂದ ಗುಜರಾತ್ ಸರ್ಕಾರ ಫೋರ್ಡ್ ಫೌಂಡೇಶನ್ ವಿರುದ್ಧ ಕ್ರಮ ತೆಗೆದುಕೊಳ್ಳುವಂತೆ ಕೇಂದ್ರ ಸರ್ಕಾರಕ್ಕೆ ಮನವಿ ಮಾಡಿತ್ತು.

ಸರ್ಕಾರದ ಈ ನಡೆಯನ್ನು ಹಲವಾರು ಸಾಮಾಜಿಕ ಕಾರ್ಯಕರ್ತರು ವಿರೋಧಿಸಿದ್ದಾರೆ.