ರಕ್ತಚಂದನ ಕಳ್ಳಸಾಗಣೆ ದಂಧೆ: ಟಾಲಿವುಡ್ ನಟಿ ನೀತು ಬಂಧನ

ಕರ್ನೂಲ್: ರಕ್ತಚಂದನ ಕಳ್ಳ ಸಾಗಣೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಟಾಲಿವುಡ್ ನಟಿ ನೀತು ಅಗರ್‌ವಾಲ್‌ ಅವರನ್ನು ಆಂಧ್ರಪ್ರದೇಶ ಪೊಲೀಸರು ಬಂಧಿಸಿದ್ದಾರೆ.

ಸ್ಮಗ್ಲಿಂಗ್ ಕಿಂಗ್ ಪಿನ್ ಕೊಂಡಪಲ್ಲಿ ಮಸ್ತಾನ್ ವಾಲಿಗೆ ಸಹಕರಿಸಿದ ಆರೋಪದ ಎದುರಿಸುತ್ತಿರುವ ನಟಿ ನೀತು, ಕಳೆದ ಕೆಲ ದಿನಗಳಿಂದ ತಲೆ ಮರೆಸಿಕೊಂಡಿದ್ದರು.

ಪ್ರೇಮ ಪ್ರಯಾಣಂ ಚಿತ್ರದ ಮೂಲಕ ಖ್ಯಾತಿಯಾಗಿದ್ದ ನಟಿ ನೀತು ಅವರನ್ನು ಕಡೆಗೂ ಕರ್ನೂಲ್ ಪೊಲೀಸರು ಬಂಧಿಸಿ, ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದಾರೆ. ವಿಚಾರಣೆ ನಡೆಸಿದ ಕೋರ್ಟ್ ನಟಿಯನ್ನು ನ್ಯಾಯಾಂಗ ಬಂಧನಕ್ಕೆ ಒಪ್ಪಿಸಿದೆ.

ಕರ್ನೂಲ್ ಪೊಲೀಸರು ಎರಡು ತಿಂಗಳ ಹಿಂದೆ 34 ರಕ್ತ ಚಂದನ ದಿಮ್ಮಿಗಳನ್ನು ವಶಪಡಿಸಿಕೊಂಡಿದ್ದರು. ಈ ಪ್ರಕರಣದಲ್ಲಿ ಕೊಂಡಪಲ್ಲಿ ಮಸ್ತಾನ್‌ ವಾಲಿ ಸೇರಿದಂತೆ ಹಲವರನ್ನು ಬಂಧಿಸಲಾಗಿದ್ದು, ನೀತಾ ಅಗರ್ವಾಲ್‌ 10ನೇ ಆರೋಪಿಯಾಗಿದ್ದಾರೆ.

ರಕ್ತ ಚಂದನ ಚೋರರಿಗೆ ನೀತು ಅಗರ್ವಾಲ್‌ ಬ್ಯಾಂಕ್‌ ಖಾತೆಯಿಂದ ಹಣ  ವರ್ಗಾವಣೆಗೊಂಡಿದೆ ಎನ್ನುವ ಅಂಶ ವಿಚಾರಣೆಯ ವೇಳೆ ಪೊಲೀಸರಿಗೆ ತಿಳಿದುಬಂದಿತ್ತು.