ವಾಶಿಂಗ್ಟನ್: ಬರಾಕ್ ಒಬಾಮ ಗಣರಾಜ್ಯೋತ್ಸವಕ್ಕೆ ಭಾರತಕ್ಕೆ ಆಗಮಿಸಲು ಇನ್ನು ಕೆಲವೇ ದಿನ ಉಳಿದಿರುವಾಗ, ಪಾಕಿಸ್ತಾನ, ಉಗ್ರಗಾಮಿ ಸಂಘಟನೆಗಳ ವಿರುದ್ಧ ಸಶಕ್ತವಾಗಿ ಹೋರಾಡುತ್ತಿದೆ ಹಾಗೂ ಲಷ್ಕರ್ ಎ ತೈಬಾ (ಎಲ್ ಇ ಟಿ) ಮತ್ತು ಜೈಶ್ ಎ ಮೊಹಮ್ಮದ್ (ಜೆ ಎ ಎಂ) ಸಂಘಟನೆಯಗಳನ್ನು ನಿಯಂತ್ರಿಸಿದೆ ಎಂದಿರುವ ಯು ಎಸ್ ಎ ಕಾರ್ಯದರ್ಶಿ ಜಾನ್ ಕೆರ್ರಿ ಪಾಕಿಸ್ತಾನಕ್ಕೆ ಹೆಚ್ಚಿನ ನೆರವನ್ನು ಮಂಜೂರು ಮಾಡಿದ್ದಾರೆ.
ಅಮೆರಿಕಾ ಕಾಂಗ್ರೆಸ್ ೨೦೧೦ ರಲ್ಲಿ ಸಿದ್ಧಪಡಿಸಿದ್ದ ಕೆರ್ರಿ-ಲಾಗರ್ ಬಿಲ್ ನಡಿ ಪಾಕಿಸ್ತಾನ ೨೦೧೦ ರಿಂದ ೨೦೧೪ ರವರೆಗೆ ಪ್ರತಿ ವರ್ಷ ಮಿಲಿಟರಿಯೇತರ ಕಾರ್ಯಗಳಿಗೆ ೧.೫ ಬಿಲಿಯನ್ ಡಾಲರ್ ನೆರವು ಪಡೆಯುತ್ತಿತ್ತು.
ಮುಂಬೈ ದಾಳಿಯ ರೂವಾರಿ ಹಾಗೂ ಎಲ್ ಇ ಟಿ ಮುಖಂಡ ಹಫೀಜ್ ಸಯ್ಯದ್, ಪಾಕಿಸ್ತಾನದಲ್ಲೇ ನೆಲೆಸಿದ್ದು, ಸಾರ್ವಜನಿಕ ಕಾರ್ಯಕ್ರಮಗಳನ್ನು ನೀಡುತ್ತಿರುವಾಗ ಜಾನ್ ಕೆರ್ರಿ ಅವರ ಈ ಹೇಳಿಕೆ ಹಲವು ಭಾರತೀಯ ಮುಖಂಡರಿಗೆ ನಿರಾಸೆ ಮೂಡಿಸಿದೆ. ಇದಕ್ಕೆ ನೇರವಾಗಿ ಪ್ರತಿಕ್ರಿಯಿಸದ ಭಾರತ ರಕ್ಷಣಾ ಮಂತ್ರಿ ಮನೋಹರ್ ಪರ್ರಿಕರ್ "ಎಲ್ಲ ಭಯೋತ್ಪಾದನೆಯ ವಿರುದ್ಧ ನಾವು ಹೋರಾಡಬೇಕು. ಒಳ್ಳೆಯ ಅಥವಾ ಕೆಟ್ಟ ಭಯೋತ್ಪಾನೆ ಎಂಬುದಿಲ್ಲ" ಎಂದು ಹೇಳಿದ್ದಾರೆ.
