ಬೆಂಗಳೂರು: ದೇಶದ ಎರಡನೇ ಅತೀದೊಡ್ಡ ಸಾಫ್ಟ್ ವೇರ್ ಕಂಪನಿ ಎಂದೇ ಖ್ಯಾತಿಗಳಿಸಿರುವ ಇನ್ಫೋಸಿಸ್ ಸಂಸ್ಥೆಯ ಮುಖ್ಯ ವಾಣಿಜ್ಯ ಅಧಿಕಾರಿ (ಸಿಎಫ್ಒ) ರಾಜೀವ್ ಬನ್ಸಾಲ್ ಅವರು ಸೋಮವಾರ ರಾಜೀನಾಮೆ ಘೋಷಿಸಿದ್ದಾರೆಂದು ತಿಳಿದುಬಂದಿದೆ.
ರಾಜೀವ್ ಬನ್ಸಾಲ್ ಅವರು 2012ರಿಂದ ಇನ್ಫೋಸಿಸ್ ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸಿದ್ದರು. ವಿ.ಬಾಲಕೃಷ್ಣನ್ ಅವರಿಂದ ತೆರವಾಗಿದ್ದ ಸಿಎಫ್ಒ ಸ್ಥಾನವನ್ನು ಬನ್ಸಾಲ್ ಅವರು 15ವರ್ಷಕ್ಕೂ ಹೆಚ್ಚು ಕಾಲ ತುಂಬಿದ್ದರು.
ಬನ್ಸಾಲ್ ಅವರ ಅಧಿಕಾರದ ಅವಧಿ ಡಿಸೆಂಬರ್ 31, 2015ರಂದು ಮುಕ್ತಾಯವಾಗಲಿದ್ದು, ರಾಜೀವ್ ಅವರ ಸ್ಥಾನಕ್ಕೆ ಕಾರ್ಯಕಾರಿ ಉಪಾಧ್ಯಕ್ಷ ರಂಗನಾಥ್ ಬರಲಿದ್ದಾರೆ ಎಂದು ಹೇಳಲಾಗುತ್ತಿದೆ. ಇನ್ಫೋಸಿಸ್ ಕಂಪನಿಯು ತನ್ನ ಎರಡನೇ ತ್ರೈಮಾಸಿಕ ವರದಿಯನ್ನು ಪ್ರಕಟಿಸಿದ ಬೆನ್ನಲ್ಲೇ ಈ ಘೋಷಣೆ ಹೊರಬಂದಿದೆ. ಇನ್ಫೋಸಿಸ್ ನ ಹಿರಿಯ ಉದ್ಯೋಗಿಗಳಲ್ಲಿ ಒಬ್ಬರಾದ ರಂಗನಾಥ್ ಅವರೂ ಸಹ ಕಳೆದ 15 ವರ್ಷಗಳಿಂದ ಇನ್ಫೋಸಿಸ್ ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದು, ಇದೀಗ ಇನ್ಫೋಸಿಸ್ ಸಿಎಫ್ಒ ಸ್ಥಾನದಲ್ಲಿ ಕಾರ್ಯನಿರ್ವಹಿಸಲಿದ್ದಾರೆಂದು ಇನ್ಫೋಸಿಸ್ ತನ್ನ ಅಧಿಕೃತ ಘೋಷಣೆಯಲ್ಲಿ ತಿಳಿಸಿದೆ.
ರಂಗನಾಥ ನೇಮಕ ಕುರಿತಂತೆ ಮಾಹಿತಿ ನೀಡಿರುವ ಇನ್ಫೋಸಿಸ್ ಸಿಇಒ ವಿಶಾಲ್ ಸಿಕ್ಕಾ ಅವರು, ಕಳೆದ ಒಂದುವರೆ ವರ್ಷದಿಂದಲೂ ರಂಗನಾಥ ಅವರ ಕೆಲಸವನ್ನು ನಾನು ಗಮನಿಸಿದ್ದೇನೆ. ಅವರಲ್ಲಿ ನಾಯಕನಾಗಿರುವ ಎಲ್ಲಾ ಗುಣಗಳಿವೆ. ಯಾವ ಸಮಯದಲ್ಲಿ ಹೇಗೆ ನಾಯಕತ್ವವನ್ನು ನಿಭಾಯಿಸಬೇಕೆಂಬ ಅರಿವು ಅವರಿಗಿದೆ. ಕಂಪನಿಯಲ್ಲಿ ಸಾಕಷ್ಟು ಜ್ಞಾನ ಹಾಗೂ ಸಾಮರ್ಥ್ಯವುಳ್ಳ ರಂಗನಾಥ್ ಅವರನ್ನು ಕಂಪನಿ ಇದೀಗ ಸಿಎಫ್ಒ ಆಗಿ ನೇಮಕ ಮಾಡಲು ನಿರ್ಧರಿಸಿದೆ ಎಂದು ಹೇಳಿದ್ದಾರೆ.
Advertisement