ಲಕನೌ: ದಶಕದ ಹಿಂದೆ ಕುಟುಂಬದಿಂದ ಬೇರ್ಪಟ್ಟು ಪಾಕಿಸ್ತಾನದಲ್ಲಿ ಜೀವಿಸುತ್ತಿದ್ದ ಗೀತಾ ಈಗ ಭಾರತಕ್ಕೆ ಹಿಂದಿರುಗಿದ್ದು, ಈ ಪ್ರಕರಣಕ್ಕೆ ಈಗೊಂದು ಹೊಸ ತಿರುವು ಸಿಕ್ಕಿದೆ. ಉತ್ತರಪ್ರದೇಶದ ಕುಟುಂಬವೊಂದು ಮೂಕಿ ಮತ್ತು ಕಿವುಡು ತೊಂದರೆಯಿರುವ ಈ ಬಾಲಕಿಯನ್ನು ತಮ್ಮ ಕುಟುಂಬದ ಸದಸ್ಯೆ ಎಂದು ಹೇಳಿದ್ದಾರೆ.
ಮಹೇಶ್ಗಂಜ್ ನಿವಾಸಿಗಳಾದ ರಾಮರಾಜ್ ಗೌತಮ್ ಮತ್ತು ಅವರ ಪತ್ನಿ ಅನಾರಾ ದೇವಿ ಅಲಹಾಬಾದ್ ನ ವಿಭಾಗೀಯ ಕಮಿಷನರ್ ರಜನ್ ಶುಕ್ಲಾ ಅವರನ್ನು ಭೇಟಿ ಮಾಡಿ ತಮ್ಮ ಮಗಳನ್ನು ಹಿಂದೆ ಪಡೆಯಲು ಎಲ್ಲ ಪರೀಕ್ಷೆಗೂ ಸಿದ್ಧ ಇರುವುದಾಗಿ ತಿಳಿಸಿದ್ದಾರೆ.
ಸುಮಾರು ೧೧ ವರ್ಷದ ಬಾಲಕಿಯಾಗಿರುವಾಗ ಗೀತಾ ಆಕಸ್ಮಿಕವಾಗಿ ಪಾಕಿಸ್ತಾನ ತಲುಪಿದ್ದಳು. ಲಾಹೋರಿನಲ್ಲಿ ಈ ಬಾಲಕಿಯನ್ನು ಕಂಡಿದ್ದ ಪಾಕಿಸ್ತಾನ ರೇಂಜರ್ಸ್ ಎಧಿ ಫೌಂಡೇಶನ್ ಗೆ ಒಪ್ಪಿಸಿದ್ದರು. ಈ ಸಾಮಾಜಿಕ ಕಾರ್ಯಕರ್ತ ಸಂಸ್ಥೆ ಬಾಲಕಿಯನ್ನು ೧೦ ವರ್ಷದವರೆಗೆ ನೋಡಿಕೊಂಡಿತ್ತು.
ಭಾರತ ಸರ್ಕಾರದ ಸಹಾಯದಿಂದ ಸೋಮವಾರ ಭಾರತಕ್ಕೆ ಹಿಂದಿರುಗಿದ ಗೀತಾಳಿಗೆ ಭವ್ಯ ಸ್ವಾಗತ ಸಿಕ್ಕಿತ್ತು. ಬಿಹಾರದ ಮಹತೋಸ್ ಕುಟುಂಬ ಗೀತಾ ತಮ್ಮ ಮಗಳೆಂದು ತಿಳಿಸಿದ್ದರು, ಆದರೆ ಬಾಲಕಿಗೆ ಈ ಪೋಷಕರನ್ನು ಗುರುತಿಸಲು ಸಾಧ್ಯವಾಗಿಲ್ಲ.
ಈಗ ಡಿ ಎನ್ ಎ ಪರೀಕ್ಷೆಯಿಂದಲೇ ಗೀತಾಳ ಪೋಷಕರನ್ನು ಪತ್ತೆ ಹಚ್ಚಬಹುದಾಗಿದ್ದು, ಈ ಪರೀಕ್ಷೆಗೆ ಜಿಲ್ಲಾಧಿಕಾರಿ ಆದೇಶ ನೀಡಿದ್ದಾರೆ.
