ನೋಟು ಹಿಂಪಡೆತ ನಿರ್ಧಾರದ ವಿರುದ್ಧ ಪ್ರತಿಭಟನೆ; ದೆಹಲಿ ಉಪಮುಖ್ಯಮಂತ್ರಿ ವಶಕ್ಕೆ

ನವದೆಹಲಿ: ೫೦೦ ಮತ್ತು ೧೦೦೦ ರೂ ನೋಟುಗಳನ್ನು ಹಿಂಪಡೆಯುವ ಕೇಂದ್ರ ಸರ್ಕಾರದ ನಡೆಯನ್ನು ವಿರೋಧಿಸಿ ಪ್ರತಿಭಟನೆ ನಡಿಗೆ ಮಾಡುತ್ತಿದ್ದ ಎಎಪಿ ಪಕ್ಷದ ಮುಖಂಡರಿಗೆ ತಡೆ ಹಾಕಿದ ದೆಹಲಿ ಪೊಲೀಸರು ದೆಹಲಿ ಉಪಮುಖ್ಯಮಂತ್ರಿ ಮನೀಶ್ ಸಿಸೋಧಿಯಾ ಸೇರಿದಂತೆ ೫೦ ಕ್ಕೂ ಹೆಚ್ಚು ಜನ ಎಎಪಿ ಮುಖಂಡರನ್ನು ವಶಕ್ಕೆ ಪಡೆದು ನಂತರ ಬಿಡುಗಡೆ ಮಾಡಿದ್ದಾರೆ. 

ದೆಹಲಿಯ ಹೃದಯಭಾಗದಲ್ಲಿರುವ ಸಂಸತ್ ಬೀದಿ ಪೊಲೀಸ್ ಠಾಣೆಯ ಬಳಿ ಹಲವು ಶಾಸಕರು ಮತ್ತು ಸಚಿವರನ್ನು ಸೇರಿದಂತೆ ೫೨ ರಿಂದ ೫೩ ಎಎಪಿ ಮುಖಂಡರನ್ನು ಪೊಲೀಸರು ವಶಕ್ಕೆ ಪಡೆದಿದ್ದರು ಎಂದು ಆಮ್ ಆದ್ಮಿ ಪಕ್ಷದ ಮುಖಂಡ ದಿಲೀಪ್ ಪಾಂಡೆ ಹೇಳಿದ್ದಾರೆ. 

'ನೋಟ್ ಬದಲಾವಣೆ ಅಲ್ಲ ಪ್ರಧಾನಿ ಬದಲಿಸಿ' ಎಂಬ ಘೋಷಣೆಯೊಂದಿಗೆ ಜಂತರ್ ಮಂತರ್ ನಿಂದ ಸಂಸತ್ ಭವನದ ಕಡೆಗೆ ೪೦೦ ರಿಂದ ೫೦೦ ಎಎಪಿ ಮುಖಂಡರು ರ್ಯಾಲಿ ನಡೆಸುವಾಗ ಪೊಲೀಸರು ಈ ಕ್ರಮಕ್ಕೆ ಮುಂದಾಗಿದ್ದಾರೆ. 

ಸಂಸತ್ ಭವನಕ್ಕೂ ಒಂದು ಕಿಲೋಮೀಟರ್ ಮುಂಚೆಯೇ ಪೊಲೀಸರು ತಡೆಗೋಡಿ ನಿರ್ಮಿಸಿ ಪ್ರತಿಭಟನಾಕಾರರನ್ನು ತಡೆದಿದ್ದಾರೆ. ಪ್ರಧಾನಿ ನರೇಂದ್ರ ಮೋದಿ ಅವರ ವಿರುದ್ಧ ಭ್ರಷ್ಟಾಚಾರ ಆರೋಪಗಳ ಬಗ್ಗೆ ಮನೀಶ್ ಸಿಸೋಧಿಯಾ ಭಾಷಣ ಮಾಡಿದ್ದಾರೆ. 

ಪ್ರಧಾನಿ ತಮ್ಮ ಗೆಳೆಯರನ್ನು ಸಂತುಷ್ಟಪಡಿಸಲು, ೫೦೦ ಮತ್ತು ೧೦೦೦ ರೂ ನೋಟುಗಳನ್ನು ಹಿಂಪಡೆದು ಸಾಮಾನ್ಯ ಜನರಿಗೆ ಅಪಾರ ತೊಂದರೆಗಳನ್ನು ಸೃಷ್ಟಿಸಿದ್ದಾರೆ ಎಂದಿದ್ದಾರೆ.