ಬೀಜಿಂಗ್: ಚೀನಾ ಬೆಂಬಲ ಹೊಂದಿರುವ ಮತ್ತು ಭಾರತವೂ ಸಂಸ್ಥಾಪಕ ಸದಸ್ಯರಾಗಿರುವ ಏಷ್ಯನ್ ಇನ್ ಫ್ರಾಸ್ಟ್ರಕ್ಚರ್ ಇನ್ವೆಸ್ಟ್ ಮೆಂಟ್ ಬ್ಯಾಂಕ್ (ಎಐಐಬಿ)ಗೆ ಶುಕ್ರವಾರ ಔಪಚಾರಿಕ ಆರಂಭ ನೀಡಲಾಯಿತು.
56 ಸದಸ್ಯ ದೇಶಗಳು ಈ ಬ್ಯಾಂಕ್ನಲ್ಲಿ ಸದಸ್ಯ ರಾಷ್ಟ್ರಗಳಾಗಿದ್ದು ಮುಂದಿನ ತಿಂಗಳಿನಿಂದ ಕಾರ್ಯಾಚರಣೆ ಆರಂಭಿಸಲಿದೆ. ಎಐಐಬಿಯನ್ನು ನಿಯಮಾನುಸಾರ ಇಂದು ಸ್ಥಾಪಿಸಲಾಗಿದ್ದು, ಎಲ್ಲ ಷರತ್ತು ಮತ್ತು ಒಪ್ಪಂದಗಳು ಚಾಲ್ತಿಗೆ ಬಂದಿವೆ ಎಂದು ಚೀನಾ ಹಣಕಾಸು ಸಚಿವ ಲೌ ಜಿವೆ ಹೇಳಿದ್ದಾರೆ. ಈ ಬ್ಯಾಂಕ್ನಲ್ಲಿ ಪ್ರತಿ ಸದಸ್ಯ ದೇಶವೂ ಹಣಕಾಸಿನ ಪಾಲು ಹೊಂದಿರಲಿದೆ. ನೀತಿ -ಆಡಳಿತ ನಿರ್ವಹಣೆ ಸಂರಚನೆ, ವಹಿವಾಟು ಮತ್ತು ಕಾರ್ಯಾಚರಣೆ ವ್ಯವಸ್ಥೆ ಕುರಿತೂ ಪಾಲು ಹೊಂದಿರಲಿವೆ. ಬ್ಯಾಂಕ್ 100 ಶತಕೋಟಿ ಡಾಲರ್ ಬಂಡವಾಳದೊಂದಿಗೆ ಆರಂಭಿಸಲಾಗಿದೆ.
ಬೀಜಿಂಗ್‍ನಲ್ಲಿ ಪ್ರಧಾನ ಕಚೇರಿ ಹೊಂದಿದ್ದು ವಿದ್ಯುತ್, ಸಾರಿಗೆ, ನಗರ ನಿರ್ಮಾಣ, ಆರೋಗ್ಯ ಮತ್ತು ಶಿಕ್ಷಣ ಕ್ಷೇತ್ರಗಳಿಗೆ ಹಣಕಾಸಿನ ನೆರವು ನೀಡಲಿದೆ. ಈ ಬ್ಯಾಂಕ್ನಲ್ಲಿ ಚೀನಾ, ಭಾರತ ಮತ್ತು ರಷ್ಯಾಗಳು ಅತಿದೊಡ್ಡ ಪಾಲುದಾರ ದೇಶಗಳಾಗಿವೆ. ಚೀನಾ ಶೇ .30.24, ಭಾರತ ಶೇ. 8.52 ಮತ್ತು ರಷ್ಯಾ ಶೇ .6.66ರಷ್ಟು ಪಾಲು ಹೊಂದಿವೆ. ಈ ಪಾಲುದಾರಿಕೆ ಅನುಸಾರ ಭಾರತ ಉಪಾಧ್ಯ ಕ್ಷ ಸ್ಥಾನ ಪಡೆಯುವ ಸಾಧ್ಯತೆಗೆಳಿವೆ. ವಿಶ್ವಬ್ಯಾಂಕ್ ಮತ್ತು ಐಎಂಎಫ್ ಗಳಿಗೆ ಪ್ರತಿಯಾಗಿ ಚೀನಾ ಈ ಬ್ಯಾಂಕ್ ಸ್ಥಾಪಿಸುತ್ತಿದೆ ಎಂದು ಪಾಶ್ಚಿಮಾತ್ಯ ದೇಶಗಳು ಆರೋಪಿಸಿವೆ.
