ಮೊಸುಲ್: ಇಸ್ಲಾಮಿಕ್ ಸ್ಟೇಟ್ ಉಗ್ರರ ಬೀಭತ್ಸ ಕೃತ್ಯಗಳು ಮುಂದುವರೆದಿದ್ದು, ಉಗ್ರಗಾಮಿಗಳೊಂದಿಗೆ ಸೆಕ್ಸ್ ನಡೆಸಲು ನಿರಾಕರಿಸಿದ 19 ಯಜಿದಿ ಯುವತಿಯರನ್ನು ಸಾರ್ವಜನಿಕವಾಗಿ ಜೀವಂತ ಸುಟ್ಟು ಹಾಕಲಾಗಿದೆ.
ಇಸ್ಲಾಮಿಕ್ ಸ್ಟೇಟ್ ಉಗ್ರಗಾಮಿಗಳ ಕಪಿಮುಷ್ಠಿಯಲ್ಲಿರುವ ಮೊಸುಲ್ ನಗರದಲ್ಲಿ ಈ ಧಾರುಣ ಘಟನೆ ನಡೆದಿದ್ದು, ಕಬ್ಬಿಣದ ಪಂಜರದಳೊಗಿದ್ದ 19 ಮಂದಿ ಯುವತಿಯರ ಮೇಲೆ ಸಾರ್ವಜನಿಕವಾಗಿಯೇ ಪೆಟ್ರೋಲ್ ಸುರಿದು ಬೆಂಕಿ ಹಚ್ಚಲಾಗಿದೆ ಎಂದು ತಿಳಿದುಬಂದಿದೆ.
ಕುರ್ದಿಷ್ ಮೂಲದ ಅರಾ ಪತ್ರಿಕೆಯ ಅಬ್ದುಲ್ಲಾ ಅಲ್ ಮಲಾ ಎಂಬ ಪತ್ರಕರ್ತ ಈ ಬಗ್ಗೆ ವರದಿ ಮಾಡಿದ್ದು, ಈ ಹಿಂದೆ ಮೊಸುಲ್ ನಗರಕ್ಕೆ ಉಗ್ರರು ಹೊತ್ತು ತಂದಿದ್ದ ಯಜಿದಿ ಯುವತಿಯರನ್ನು ಲೈಂಗಿಕ ಗುಲಾಮರನ್ನಾಗಿ ಮಾಡಿಕೊಳ್ಳಲಾಗಿತ್ತು. ಉಗ್ರರೊಂದಿಗಿನ ಲೈಂಗಿಕತೆಗೆ ನಿರಾಕರಿಸಿದ ಯುವತಿಯರನ್ನು ಕಬ್ಬಿಣದ ಪಂಜರದೊಳಗೆ ಹಾಕಿ, ಮೊಸುಲ್ ನಗರದ ಪ್ರಮುಖ ವೃತ್ತಕ್ಕೆ ಕರೆತಂದು ಸಾವಿರಾರು ಜನರ ಮುಂದೆಯೇ ಜೀವಂತವಾಗಿ ಸುಡಲಾಗಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ.
ಅಂತೆಯೇ ಉಗ್ರರ ಈ ಬೀಭತ್ಸ ಕೃತ್ಯಕ್ಕೆ ಅಲ್ಲಿ ನೆರೆದಿದ್ದ ನೂರಾರು ಮಂದಿ ಕೇವಲ ಮೂಕ ಪ್ರೇಕ್ಷಕರಾಗಿದ್ದರೇ ಹೊರತು ಯಾರೊಬ್ಬರೂ ಕೂಡ ಈ ಬಗ್ಗೆ ವಿರೋಧಿಸುವ ಗೋಜಿಗೇ ಹೋಗಲಿಲ್ಲ ಎಂದು ವರದಿಯಲ್ಲಿ ಪತ್ರಕರ್ತ ತನ್ನ ಆಕ್ರೋಶ ವ್ಯಕ್ತಪಡಿಸಿದ್ದಾನೆ.
2014ರಲ್ಲಿ ವಾಯುವ್ಯ ಇರಾಕ್ ನ ಸಿಂಜಾರ್ ಪ್ರಾಂತ್ಯದಿಂದ ಇಸ್ಲಾಮಿಕ್ ಉಗ್ರರು ಸುಮಾರು 4000 ಕ್ಕೂ ಅಧಿಕ ಯಜಿದಿ ಮಹಿಳೆಯರನ್ನು ಅಪಹರಿಸಿದ್ದು, ಈ ಪೈಕಿ ನೂರಾರು ಮಹಿಳೆರನ್ನು ಲೈಂಗಿಕ ಗುಲಾಮರನ್ನಾಗಿ ಮಾಡಿಕೊಂಡು ಬಳಿಕ ಹರಾಜು ಮಾಡಲಾಗಿತ್ತು. ಅಂತೆಯೇ ಉಗ್ರರೊಂಗಿನ ಲೈಂಗಿಕ ಕ್ರಿಯೆ ವಿರೋಧಿಸಿದ ನೂರಾರು ಮಹಿಳೆಯರನ್ನು ಅಮಾನುಷವಾಗಿ ಕೊಲ್ಲಲಾಗಿದೆ. ಇಂದಿಗೂ ಸಾವಿರಾರು ಯುವತಿಯರು ಉಗ್ರರ ಕಪಿಮುಷ್ಠಿಯಲ್ಲಿದ್ದು, ಉಗ್ರರ ಹಿಡಿತದಲ್ಲಿರುವ ಮೊಸುಲ್ ನಗರದಲ್ಲಿ ಲೈಂಗಿಕ ಗುಲಾಮರಿಗಾಗಿಯೇ ದೊಡ್ಡ ಕ್ಯಾಂಪ್ ಅನ್ನು ನಿರ್ಮಿಸಲಾಗಿದೆಯಂತೆ.
Advertisement