ವಾಶಿಂಗ್ಟನ್: ಇರಾಕ್ ಮತ್ತು ಸಿರಿಯಾದಲ್ಲಿ, ಅಮೇರಿಕಾ ಮಿತ್ರ ಪಕ್ಷಗಳ ದಾಳಿಯಿಂದ ತನ್ನ ಪ್ರಾಬಲ್ಯ ಕಳೆದುಕೊಳ್ಳುತ್ತಿರುವ ಇಸ್ಲಾಮಿಕ್ ಸ್ಟೇಟ್ ಸಂಘಟನೆಯ ಬಗ್ಗೆ ಸೋಮವಾರ ಪ್ರತಿಕ್ರಿಯಿಸಿರುವ ಪೆಂಟಗನ್ ವಕ್ತಾರ ಇರಾಕ್ ನಲ್ಲಿ ಐ ಎಸ್ ಈ ಹಿಂದೆ ವಶಪಡಿಸಿಕೊಂಡಿದ್ದ ಅರ್ಧದಷ್ಟು ಭಾಗ ಕಳೆದುಕೊಂಡಿದೆ ಎಂದಿದ್ದಾರೆ.
ಇರಾಕ್ ನಲ್ಲಿ ಐ ಎಸ್ ಈ ಹಿಂದೆ ವಶಪಡಿಸಿಕೊಂಡಿದ್ದ 40% ಭಾಗವನ್ನು ಮತ್ತು ಸಿರಿಯಾದಲ್ಲಿ ಸುಮಾರು ೧೦% ಭಾಗವನ್ನು ಕಳೆದುಕೊಂಡಿದೆ ಎಂದು ಅಮೇರಿಕಾ ಭದ್ರತಾ ಇಲಾಖೆ ಮೊದಲು ತಿಳಿಸಿತ್ತು.
ದಿನಕಳೆದಂತೆ ಈಗ ಕಳೆದುಕೊಂಡಿರುವ ಭಾಗದ ಅನುಪಾತ ಹೆಚ್ಚಿದೆ ಎಂದು ಪೆಂಟಗನ್ ವಕ್ತಾರ ಪೀಟರ್ ಕುಕ್ ಹೇಳಿದ್ದಾರೆ.
"ಇರಾಕ್ ನಲ್ಲಿ ಸದ್ಯಕ್ಕೆ ಅವರು ಈ ಹಿಂದೆ ವಶಪಡಿಸಿಕೊಂಡಿದ್ದ ಸುಮಾರು ೪೫% ಭಾಗವನ್ನು ಕಳೆದುಕೊಂಡಿದ್ದಾರೆ" ಎಂದು ಕುಕ್ ತಿಳಿಸಿದ್ದಾರೆ. "ಸಿರಿಯಾದಲ್ಲಿ ಈ ಅನುಪಾತ ೧೬ರಿಂದ ೨೦% ಇದೆ" ಎಂದಿದ್ದಾರೆ.
ಇರಾಕ್ ನಲ್ಲಿ ಐ ಎಸ್ ರಾಮಡೀ ಮತ್ತು ಹಿತ್ ನಗರಗಳ ವಶವನ್ನು ಕಳೆದುಕೊಂಡಿದ್ದರೂ ಪ್ರಮುಖ ನಗರಗಳಾದ ಮೋಸುಲ್ ಮತ್ತು ಫಲ್ಲುಜಾ ಮೇಲೆ ಇನ್ನು ನಿಯಂತ್ರಣ ಹೊಂದಿದೆ.
ಸಿರಿಯಾದಲ್ಲಿ ಕ್ಯಾಲಿಫತ್ ನ ರಾಜಧಾನಿ ಎಂದು ಕರೆಯಲಾಗುವ ರಕ್ಕ ಇನ್ನೂ ಐ ಎಸ್ ನಿಯಂತ್ರಣದಲ್ಲಿದೆ.
