ಹವಾನ: ಕ್ಯೂಬಾದ ಮಿಲಿಟರಿ ಪಡೆಯ ವಿಮಾನವೊಂದು ಪತನವಾಗಿದ್ದು, ವಿಮಾನದಲ್ಲಿದ್ದ 8 ಮಂದಿ ಸಿಬ್ಬಂದಿಗಳು ಮೃತರಾಗಿದ್ದಾರೆ ಎಂದು ತಿಳಿದುಬಂದಿದೆ.
ರಾಜಧಾನಿ ಹವಾನದ ಆರ್ಟೆಮಿಸಾ ಪ್ರಾಂತ್ಯದಲ್ಲಿ ಶನಿವಾರ ವಿಮಾನ ಪರ್ವತಕ್ಕೆ ಅಪ್ಪಳಿಸಿದ್ದು, ಪರಿಣಾಮ ಪೈಲಟ್ ಸೇರಿದಂತೆ ಅದರಲ್ಲಿದ್ದ ಮಿಲಿಟರಿ ಪಡೆಯ ಎಂಟು ಜನ ಸಿಬ್ಬಂದಿ ಮೃತಪಟ್ಟಿದ್ದಾರೆ.
ಎಎನ್-26 ರಷ್ಯಾದ ನಿರ್ಮಿತ ವಿಮಾನ ಇದಾಗಿದ್ದು ಬೆಳಿಗ್ಗೆ 6.38 ಕ್ಕೆ ಹವಾನಾ ಹೊರವಲಯದಲ್ಲಿರುವ ಪ್ಲೆಯಾ ಬರಾಕೊವಾ ವಿಮಾನ ನಿಲ್ದಾಣದಿಂದ ಕ್ಯಾಂಡೆಲಾರಿಯಾ ಎಂಬ ಪಟ್ಟಣಕ್ಕೆ ಹೊರಟಿತ್ತು. ಈ ವೇಳೆ ಅಲ್ಲಿನ ಲೊಮಾ ಡಿ ಲಾ ಪಿಮೆಂಟಾ ಎಂಬ ಪರ್ವತಕ್ಕೆ ವಿಮಾನ ಅಪ್ಪಳಿಸಿದ್ದರಿಂದ ಈ ದುರಂತ ಸಂಭವಿಸಿದೆ. ಕ್ಯೂಬಾದ ಕ್ರಾಂತಿಕಾರಿ ಸಶಸ್ತ್ರ ಪಡೆಗಳಿಗೆ ಸೇರಿದ ವಿಮಾನ ಇದಾಗಿದ್ದು, ಅಪಘಾತ ಸಂಬಂಧ ಕ್ಯೂಬಾ ಸೇನೆ ತನಿಖೆಗೆ ಆದೇಶಿಸಿದೆ.
