ನೇಪಾಳಕ್ಕೆ 1 ಬಿಲಿಯನ್ ರೂಪಾಯಿ ಮೊತ್ತದ 100 ರೂ ನೋಟುಗಳನ್ನು ನೀಡಲಿರುವ ಆರ್ ಬಿಐ

ಕಠ್ಮಂಡು: ನೇಪಾಳದಲ್ಲಿ 100 ರೂ ಮುಖಬೆಲೆಯ ನೋಟುಗಳ ಕೊರತೆ ಎದುರಾಗಿರುವ ಹಿನ್ನೆಲೆಯಲ್ಲಿ ಭಾರತೀಯ ರಿಸರ್ವ್ ಬ್ಯಾಂಕ್ 100 ರೂ ಮುಖಬೆಲೆಯ  1 ಬಿಲಿಯನ್ ರೂಪಾಯಿ ನಷ್ಟು ಮೊತ್ತದ ಹಣವನ್ನು ರವಾನೆ ಮಾಡಲಿದೆ. 

ನ.8 ರಂದು ಕೇಂದ್ರ ಸರ್ಕಾರ 500, 1000 ರೂ ಮುಖಬೆಲೆಯ ನೋಟುಗಳನ್ನು ನಿಷೇಧ ಮಾಡಿದ್ದ ಹಿನ್ನೆಲೆಯಲ್ಲಿ ನೇಪಾಳ ರಾಷ್ಟ್ರ ಬ್ಯಾಂಕ್ ಆರ್ ಬಿಐ ನಿಂದ 100 ರೂ ಮುಖಬೆಲೆಯ ನೋಟುಗಳನ್ನು ಆಮದು ಮಾಡಿಕೊಳ್ಳಲು ತಡವಾಗಿದೆ ಎಂದು ಅಲ್ಲಿನ ಹಿಮಾಲಯನ್ ಟೈಮ್ಸ್ ಪತ್ರಿಕೆ ವರದಿ ಮಾಡಿದೆ. 

ನೇಪಾಳದಲ್ಲಿ 100 ರೂ ಮುಖಬೆಲೆಯ ನೋಟುಗಳ ಕೊರತೆ ಎದುರಾಗಿದ್ದ ಹಿನ್ನೆಲೆಯಲ್ಲಿ ನೇಪಾಳ ರಾಷ್ಟ್ರ ಬ್ಯಾಂಕ್, ಆರ್ ಬಿಐ ಗೆ 100 ರೂ ಮುಖಬೆಲೆಯ ನೋಟುಗಳನ್ನು ರಫ್ತು ಮಾಡುವಂತೆ ಮನವಿ ಮಾಡಿತ್ತು. ನೇಪಾಳದ ಮನವಿಗೆ ಪ್ರತಿಕ್ರಿಯಿಸಿದ್ದ ಭಾರತೀಯ ರಿಸರ್ವ್ ಬ್ಯಾಂಕ್, ಭಾರತದಲ್ಲಿ ಗರಿಷ್ಠ ಮುಖಬೆಲೆಯ ನೋಟು ಅಮಾನ್ಯ ನಿರ್ಧಾರದಿಂದ ಕಡಿಮೆ ಮುಖಬೆಲೆಯ ನೋಟುಗಳಿಗೆ ಬೇಡಿಕೆ ಹೆಚ್ಚಿದ್ದು, ಪರಿಸ್ಥಿತಿ ನಿಯಂತ್ರಣಕ್ಕೆ ಬರುವವರೆಗೂ ಕಾಯುವಂತೆ ತಿಳಿಸಿತ್ತು. ಈಗ ಆರ್ ಬಿಐ ನೇಪಾಳದ ಮನವಿಗೆ ಸ್ಪಂದಿಸಿದ್ದು ನೇಪಾಳಕ್ಕೆ 100 ರೂ ಮುಖಬೆಲೆಯ  1 ಬಿಲಿಯನ್ ರೂಪಾಯಿ ನಷ್ಟು ಮೊತ್ತದ ಹಣವನ್ನು ರಫ್ತು ಮಾಡಲು ಸಿದ್ಧತೆ ನಡೆಸಿದೆ.