ಪಾಕಿಸ್ತಾನದಲ್ಲಿ ಟೊಮ್ಯಾಟೋ ದರ ಗಗನಕ್ಕೇರಲು ಭಾರತ ವಿರೋಧಿ ಮನಸ್ಥಿತಿಯೇ ಕಾರಣ: ಪಾಕ್ ಪತ್ರಿಕೆ

ಇಸ್ಲಾಮಾಬಾದ್: ಪಾಕಿಸ್ತಾನದಲ್ಲಿ ಟೊಮ್ಯಾಟೋ ದರ ಪ್ರತಿ ಕೆಜಿಗೆ 300 ಕೆಜಿಯಷ್ಟಾಗಿದ್ದು, ಭಾರತ ವಿರೋಧಿ ಮನಸ್ಥಿತಿಯೇ ಇದಕ್ಕೆ ಕಾರಣ ಎಂದು ಪಾಕಿಸ್ತಾನ ಪತ್ರಿಕೆ ವಿಶ್ಲೇಷಿಸಿದೆ. 

ಡಾನ್ ಪತ್ರಿಕೆಯಲ್ಲಿ ಪ್ರಕಟವಾದ ಲೇಖನದಲ್ಲಿ ಸರ್ಕಾರದ ನೀತಿಯನ್ನು ಟೀಕಿಸಲಾಗಿದ್ದು, ಸಾಮಾನ್ಯ ಸರಕುಗಳನ್ನು ಭಾರತದಿಂದ ಆಮದು ಮಾಡಿಕೊಳ್ಳುವುದಕ್ಕೆ ಸರ್ಕಾರ ಅವಕಾಶ ನೀಡದೇ ಭಾರತ ವಿರೋಧಿ ಮನಸ್ಥಿತಿ ಹೊಂದಿರುವುದೇ ಟೊಮ್ಯಾಟೋ ದರ ಗಗನಕ್ಕೆ ಏರಿಕೆಯಾಗಲು ಕಾರಣ ಎಂದು ಹೇಳಿದೆ. 

ರಾಜಕಾರಣಿಗಳು ಸೃಷ್ಟಿಸಿರುವ ಭಾರತ ವಿರೋಧಿ ಮನಸ್ಥಿತಿಯಿಂದ ಪಾಕಿಸ್ತಾನದ ಜನತೆ ಸಮಸ್ಯೆ ಎದುರಿಸುತ್ತಿದ್ದಾರೆ ಎಂದಿರುವ ಪತ್ರಿಕೆ ಸರಕು ಆಮದು ಮಾಡಿಕೊಳ್ಳುವ ಮೂಲಕ ವಿದೇಶಿ ರೈತರಿಗೆ ಏಕೆ ಲಾಭ ಮಾಡಿಕೊಡಬೇಕು ಎಂದು ಪ್ರಶ್ನಿಸಿರುವ ಪಾಕ್ ಸಚಿವನ ವಿರುದ್ಧವೂ ಕಿಡಿ ಕಾರಿದ್ದು, ಕೊಳೆತ ಟೊಮ್ಯಾಟೋಗಳನ್ನು ಎಸೆಯುವ ಮೂಲಕ ಅಂತಹ ರಾಜಕಾರಣಿಗಳಿಗೆ ತಕ್ಕ ಪಾಠ ಕಲಿಸಬೇಕೆಂದು ಹೇಳಿದೆ. ಅಷ್ಟೆ ಅಲ್ಲದೇ ಭಾರತದಿಂದ ಆಮದು ನಿಲ್ಲಿಸುವುದರ ಹಿಂದೆ ಪ್ರಭಾವಿ ಮಾಫಿಯಾ ಕೈವಾಡವಿದೆ ಎಂದು ಆರೋಪಿಸಿದೆ.