ಸಿರಿಯಾದಲ್ಲಿ ಅಮೆರಿಕ ನಡೆಸುತ್ತಿರುವ ಕಾರ್ಯಾಚರಣೆ ಬದಲಾಗಿಲ್ಲ: ಶ್ವೇತ ಭವನ

ವಾಷಿಂಗ್ಟನ್; ಸಿರಿಯಾದಲ್ಲಿ ಅಮೆರಿಕ ನಡೆಸುತ್ತಿರುವ ಕಾರ್ಯಾಚರಣೆ ಬದಲಾಗಿಲ್ಲ, ಶೀಘ್ರದಲ್ಲಿಯೇ ಸೇನೆ ಅಮೆರಿಕಾಕ್ಕೆ ಮರಳಲಿದೆ ಎಂದು ಶ್ವೇತಭವನ ಸೋಮವಾರ ಹೇಳಿದೆ. 

ಸಿರಿಯಾದಲ್ಲಿ ಅಮೆರಿಕ ನಡೆಸುತ್ತಿರುವ ಕಾರ್ಯಚರಣೆ ಬದಲಾಗಿಲ್ಲ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಈ ಬಗ್ಗೆ ಸ್ಪಷ್ಟವಾಗಿ ಹೇಳಿದ್ದು, ಅಮೆರಿಕಾ ಸೇನೆ ಸಾಧ್ಯವಾದಷ್ಟು ಬೇಗ ಮರಳಿ ಬರಲಿದೆ ಎಂದು ಶ್ವೇತಭವನದ ಪತ್ರಿಕಾ ಕಾರ್ಯದರ್ಶಿ ಸಾರಾ ಸ್ಯಾಂಡರ್ಸ್ ಹೇಳಿದ್ದಾರೆ. 

ಸಿರಿಯಾದಲ್ಲಿ ನೆಲೆಯೂರಿರುವ ಇಸಿಸ್ ನ್ನು ಸಂಪೂರ್ಣವಾಗಿ ನಾಶಗೊಳಿಸಲು ಬದ್ಧರಾಗಿದ್ದು, ಮತ್ತೆಂದು ಇಸಿಸ್ ಕಾರ್ಯಾಚರಣೆ ನಡೆಸದಂತೆ ಮಾಡಲು ನಿರ್ಧರಿಸಿದ್ದೇವೆ.ನಮ್ಮ ಮಿತ್ರ ರಾಷ್ಟ್ರಗಳು ಹಾಗೂ ಪಾಲುದಾರರು ರಾಷ್ಟ್ರದ ಭದ್ರತೆಗಾಗಿ ಸೇನೆ ಮತ್ತು ಆರ್ಥಿಕವಾಗಿ ಹೆಚ್ಚಿನ ಜವಾಬ್ದಾರಿಗಳನ್ನು ತೆಗೆದುಕೊಳ್ಳಬೇಕೆಂದು ನಿರೀಕ್ಷಿಸುತ್ತೇವೆಂದು ತಿಳಿಸಿದ್ದಾರೆ. 

ಈ ಹಿಂದೆ ಹೇಳಿಕೆ ನೀಡಿದ್ದ ಫ್ರಾನ್ಸ್ ಅಧ್ಯಕ್ಷ ಇಮ್ಯಾನ್ಯುವೆಲ್ ಮ್ಯಾಕ್ರೋನ್ ಅವರು, ಟ್ರಂಪ್ ಅವರೊಂದಿಗೆ ಪ್ಯಾರೀಸ್ ಈಗಾಗಲೇ ಮಾತುಕತೆ ನಡೆಸಿದ್ದು, ದೀರ್ಘಾಕಾಲಿಕವಾಗಿ ಸಿರಿಯಾದಲ್ಲಿ ಕಾರ್ಯಾಚರಣೆ ನಡೆಸಲು ಜೊತೆಗಿರುವಂತೆ ಮನವೊಲಿಸಲಾಗಿದೆ ಎಂದು ಹೇಳಿದ್ದರು.