ನವದೆಹಲಿ: ಉದ್ಯಮಿ ಮುಖೇಶ್ ಅಂಬಾನಿ ವಿರುದ್ಧ ಅಮೆರಿಕ ಉದ್ಯಮಿ ಎಲಾನ್ ಮಸ್ಕ್ ಶನಿವಾರ ಮತ್ತಷ್ಟು ತಮ್ಮ ವಾಗ್ದಾಳಿಯನ್ನು ತೀವ್ರಗೊಳಿಸಿದ್ದಾರೆ. ರಿಲಯನ್ಸ್‌ನಿಂದ ಹಣಕಾಸು ನೆರವು ಪಡೆದ ಸಂಸ್ಥೆಯೊಂದು ಸಾಮಾಜಿಕ ಮಾಧ್ಯಮಗಳಲ್ಲಿ ಬಿಜೆಪಿಯ ಪ್ರಚಾರ ಅಭಿಯಾನಗಳಿಗೆ ಉತ್ತೇಜನ ನೀಡಿದೆ ಹಾಗೂ ರಿಲಯನ್ಸ್‌ಗೆ ನಂಟು ಹೊಂದಿರುವ ಕಂಪನಿಯೊಂದು ಆಡಳಿತಾರೂಢ ಪಕ್ಷಕ್ಕೆ ಭಾರಿ ಮೊತ್ತದ ರಾಜಕೀಯ ದೇಣಿಗೆ ನೀಡಿದೆ ಎಂದು ಆರೋಪಿಸಿರುವ ಮಾಧ್ಯಮ ವರದಿಗಳ ಸ್ಕ್ರೀನ್‌ಶಾಟ್‌ಗಳನ್ನು ಅವರು ಹಂಚಿಕೊಂಡಿದ್ದಾರೆ.
ಮಸ್ಕ್ ಅವರು ಎಕ್ಸ್‌ನಲ್ಲಿ ಇಂದು ಪ್ರಕಟಿಸಿದ ಪೋಸ್ಟ್‌ನಲ್ಲಿ, 2022ರ ಅಲ್ ಜಜೀರಾ ವರದಿಯೊಂದನ್ನು ಹಂಚಿಕೊಂಡಿದ್ದಾರೆ. ‘ರಿಲಯನ್ಸ್‌ನಿಂದ ಹಣಕಾಸು ನೆರವು ಪಡೆದ ಸಂಸ್ಥೆಯು ಫೇಸ್‌ಬುಕ್‌ನಲ್ಲಿ ಬಿಜೆಪಿಯ ಪ್ರಚಾರ ಅಭಿಯಾನಗಳಿಗೆ ಹೇಗೆ ಉತ್ತೇಜನ ನೀಡುತ್ತದೆ’ ಎಂಬ ಶೀರ್ಷಿಕೆಯನ್ನು ಈ ವರದಿ ಹೊಂದಿದೆ.
ಇದರ ಜತೆಗೆ, 2024ರ ಇಂಡಿಯನ್ ಎಕ್ಸ್‌ಪ್ರೆಸ್ ವರದಿಯ ಆರ್ಕೈವ್ ಪ್ರತಿಯನ್ನೂ ಅವರು ಹಂಚಿಕೊಂಡಿದ್ದಾರೆ. ಚುನಾವಣಾ ಬಾಂಡ್‌ಗಳ ಮೂಲಕ ರಿಲಯನ್ಸ್‌ಗೆ ನಂಟು ಹೊಂದಿರುವ ಕ್ವಿಕ್ ಸಪ್ಲೈ (Qwik Supply) ಸಂಸ್ಥೆಯು ಬಿಜೆಪಿಗೆ 385 ಕೋಟಿ ರೂ ಹಾಗೂ ಶಿವಸೇನೆಗೆ 25 ಕೋಟಿ ರೂ ದೇಣಿಗೆ ನೀಡಿದೆ ಎಂದು ಆ ವರದಿ ತಿಳಿಸಿತ್ತು.
ಭಾರತದಲ್ಲಿ ಸ್ಟಾರ್‌ಲಿಂಕ್ ಉಪಗ್ರಹ ಬ್ರಾಡ್‌ಬ್ಯಾಂಡ್ ಸೇವೆಗಳ ಆರಂಭ ನಿರಂತರವಾಗಿ ವಿಳಂಬವಾಗುತ್ತಿರುವುದನ್ನು ಖಂಡಿಸಿ ಮಸ್ಕ್ ಅವರು ಮುಖೇಶ್ ಅಂಬಾನಿ ವಿರುದ್ಧ ತೀವ್ರ ಟೀಕೆಗಳನ್ನು ಮಾಡುತ್ತಿರುವ ಸಂದರ್ಭದಲ್ಲೇ ಈ ಹೊಸ ಪೋಸ್ಟ್ ಪ್ರಕಟವಾಗಿದೆ.
ಮಸ್ಕ್ ಅವರ ಆರೋಪಗಳಿಗೆ ರಿಲಯನ್ಸ್ ಸಾರ್ವಜನಿಕವಾಗಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಮತ್ತೊಂದೆಡೆ, ದೇಶದಲ್ಲಿ ದೂರಸಂಪರ್ಕ ಮತ್ತು ಉಪಗ್ರಹ ಸೇವೆಗಳಿಗೆ ಅನುಮತಿ ನೀಡುವ ವ್ಯವಸ್ಥೆಯು ನ್ಯಾಯಸಮ್ಮತ ಮತ್ತು ತಾರತಮ್ಯರಹಿತವಾಗಿದೆ ಎಂದು ಕೇಂದ್ರ ಸರ್ಕಾರ ಹೇಳಿದೆ. ಈ ವ್ಯವಸ್ಥೆಯನ್ನು ಆಯ್ದ ಸಂಸ್ಥೆಗಳ ವಿರುದ್ಧ ಮಾತ್ರ ಅನ್ವಯಿಸಲಾಗುತ್ತಿದೆ ಎಂಬ ಆರೋಪ ಆಧಾರರಹಿತ ಮತ್ತು ತಪ್ಪು ಕಲ್ಪನೆಯಿಂದ ಕೂಡಿದೆ ಎಂದೂ ಸರ್ಕಾರ ಸ್ಪಷ್ಟಪಡಿಸಿದೆ.
ಈ ಪೋಸ್ಟ್ ಪ್ರಕಟಿಸುವ ಕೆಲವೇ ಗಂಟೆಗಳ ಮೊದಲು, ಎಕ್ಸ್‌ನಲ್ಲಿ ಮುಖೇಶ್ ಅಂಬಾನಿಯನ್ನು ‘ಪ್ರಧಾನಿ ಅಂಬಾನಿ’ ಎಂದು ಸಂಬೋಧಿಸಿದ್ದ ಮಸ್ಕ್, ಏಕಸ್ವಾಮ್ಯವನ್ನು ರಕ್ಷಿಸಲು ಅವರು ಪ್ರಯತ್ನಿಸುತ್ತಿದ್ದಾರೆ ಎಂದು ಆರೋಪಿಸಿದ್ದರು. ಭಾರತದಲ್ಲಿ ತಮ್ಮ ಸಂಸ್ಥೆಯ ಉಪಗ್ರಹ ಇಂಟರ್‌ನೆಟ್ ಸೇವೆಗೆ ಸ್ಪರ್ಧಿಸಲು ಅವಕಾಶ ನೀಡುವ ಬಗ್ಗೆ ಅಂಬಾನಿ ಪರಿಗಣಿಸುತ್ತಾರೆಯೇ ಎಂದೂ ಪ್ರಶ್ನಿಸಿದ್ದರು.
ನಿನ್ನೆ ಕೇಂದ್ರ ಸಂವಹನ ಸಚಿವ ಜ್ಯೋತಿರಾದಿತ್ಯ ಸಿಂಧಿಯಾ ಅವರು, ಭಾರತದಲ್ಲಿ ಯಾವುದೇ ವಲಯದಲ್ಲೂ ಏಕಸ್ವಾಮ್ಯಕ್ಕೆ ಅವಕಾಶವಿಲ್ಲ. ನಿರ್ದಿಷ್ಟ ಕಂಪನಿಯೊಂದರ ಬಗ್ಗೆ ಸಾಕಷ್ಟು ಚರ್ಚೆ ನಡೆಯುತ್ತಿದ್ದರೂ, ಮೂರು ಸಂಸ್ಥೆಗಳು ಈಗಾಗಲೇ ಉಪಗ್ರಹ ಸಂವಹನ (ಸ್ಯಾಟ್‌ಕಾಮ್) ಪರವಾನಗಿ ಪಡೆದಿವೆ. ಅವು ಭದ್ರತಾ ಅವಶ್ಯಕತೆಗಳು ಮತ್ತು ನಿಗದಿತ ಹಂತಗಳನ್ನು ಪೂರೈಸಿದ ಬಳಿಕ ಕಾರ್ಯಾಚರಣೆ ಆರಂಭಿಸಬಹುದು ಎಂದು ತಿಳಿಸಿದ್ದರು.
ಭಾರತೀಯ ಮಾರುಕಟ್ಟೆಯಲ್ಲಿ ತಮ್ಮ ಪ್ರಾಬಲ್ಯವನ್ನು ಉಳಿಸಿಕೊಳ್ಳಲು ಪ್ರಭಾವಿ ಉದ್ಯಮ ಹಿತಾಸಕ್ತಿಗಳು ಸ್ಟಾರ್‌ಲಿಂಕ್ ಸೇವೆಯ ಪ್ರವೇಶವನ್ನು ತಡೆಯಲು ಯತ್ನಿಸುತ್ತಿವೆ ಎಂದು ಮಸ್ಕ್ ಆರೋಪಿಸಿದ್ದಾರೆ. ಭಾರತೀಯರ ಮೇಲೆ ತಮ್ಮ ಏಕಸ್ವಾಮ್ಯದ ಹಿಡಿತವನ್ನು ಮುಂದುವರಿಸಲು ಕೆಲವು ಪ್ರಭಾವಿ ಉದ್ಯಮಿಗಳು ಸ್ಟಾರ್‌ಲಿಂಕ್‌ಗೆ ಅಡ್ಡಿಪಡಿಸುತ್ತಿದ್ದಾರೆ ಎಂದೂ ದೂರಿದ್ದಾರೆ.
ಪ್ರಧಾನಿ ಅಂಬಾನಿ ಅವರೇ, ನೀವೇ ಭಾರತದ ನಿಜವಾದ ಬಾಸ್ ಎಂಬುದನ್ನು ಅರಿತುಕೊಳ್ಳದಿದ್ದಕ್ಕಾಗಿ ದಯವಿಟ್ಟು ನನ್ನ ವಿನಮ್ರ ಕ್ಷಮೆಯನ್ನು ಸ್ವೀಕರಿಸಿ. ಸಹಜವಾಗಿಯೇ, ಭಾರತದ ಮಹಾನ್ ಜನರನ್ನು ಏಕಸ್ವಾಮ್ಯದ ಮೂಲಕ ಶೋಷಿಸುವುದನ್ನು ಮುಂದುವರಿಸಲು ನೀವು ಬಯಸಬಹುದು. ಆದರೂ, ಸ್ಟಾರ್‌ಲಿಂಕ್‌ಗೆ ಸ್ಪರ್ಧಿಸಲು ಅವಕಾಶ ನೀಡುವ ಬಗ್ಗೆ ಪರಿಗಣಿಸುತ್ತೀರಾ? ಎಂದು ಮಸ್ಕ್ ಬರೆದಿದ್ದರು.
ಭಾರತದ ಹಲವು ಪ್ರದೇಶಗಳಲ್ಲಿ ಇಂಟರ್‌ನೆಟ್ ಸಂಪರ್ಕವಿಲ್ಲ. ಇದರಿಂದ ಮಕ್ಕಳಿಗೆ ಶಿಕ್ಷಣ ಪಡೆಯುವ ಅವಕಾಶ ಹಾಗೂ ಸಣ್ಣ ಉದ್ಯಮಗಳಿಗೆ ತಮ್ಮ ಉತ್ಪನ್ನಗಳನ್ನು ಜಾಗತಿಕ ಮಾರುಕಟ್ಟೆಯಲ್ಲಿ ಮಾರಾಟ ಮಾಡುವ ಅವಕಾಶ ಸಿಗುತ್ತಿಲ್ಲ ಎಂದು ಹೇಳಿದ್ದಾರೆ.
ಸ್ಟಾರ್‌ಲಿಂಕ್ ಇಂತಹ ಜನರ ಜೀವನವನ್ನು ಉತ್ತಮಗೊಳಿಸಲಿದೆ ಎಂದು ತಂತ್ರಜ್ಞಾನ ಉದ್ಯಮಿ ಮಸ್ಕ್ ಪ್ರತಿಪಾದಿಸಿದ್ದಾರೆ.
ನಿನ್ನೆ ತಡರಾತ್ರಿ ಈ ಪೋಸ್ಟ್ ಪ್ರಕಟಿಸಿದ ಕೆಲವೇ ನಿಮಿಷಗಳಲ್ಲಿ ಮತ್ತೊಂದು ಪೋಸ್ಟ್ ಮಾಡಿದ ಮಸ್ಕ್, ಜಗತ್ತಿನಾದ್ಯಂತ ನೈಸರ್ಗಿಕ ವಿಕೋಪಗಳ ಸಂದರ್ಭದಲ್ಲಿ ಇತರ ಎಲ್ಲ ಸಂವಹನ ವ್ಯವಸ್ಥೆಗಳು ವಿಫಲವಾದಾಗಲೂ ಸ್ಟಾರ್‌ಲಿಂಕ್ ಜೀವಗಳನ್ನು ಉಳಿಸುವಲ್ಲಿ ಅತ್ಯಗತ್ಯವೆಂಬುದನ್ನು ಸಾಬೀತುಪಡಿಸಿದೆ. ಹೀಗಾಗಿ, ಭಾರತದಲ್ಲಿ ಎಲ್ಲಾ ವಯೋಮಾನದ ಜನರನ್ನು ಉಳಿಸಲು ಸಹ ನೀವು ನೆರವಾಗಲಿದ್ದೀರಿ ಎಂದು ಬರೆದಿದ್ದರು.
ಭಾರತದಲ್ಲಿ ಯಾವುದೇ ವಲಯದಲ್ಲೂ ಏಕಸ್ವಾಮ್ಯಕ್ಕೆ ಅವಕಾಶ ನೀಡುವುದಿಲ್ಲ ಎಂದು ಸಿಂಧಿಯಾ ಪುನರುಚ್ಚರಿಸಿದ್ದಾರೆ.
ದೂರಸಂಪರ್ಕ ಇಲಾಖೆಯಾಗಿ ನಾವು ಯಾವುದೇ ನಿರ್ದಿಷ್ಟ ತಂತ್ರಜ್ಞಾನಕ್ಕೆ ಒಲವು ತೋರುವುದಿಲ್ಲ. ಪ್ರತಿಯೊಬ್ಬ ಗ್ರಾಹಕನಿಗೂ ವಿವಿಧ ಸೇವೆಗಳ ಆಯ್ಕೆಗಳನ್ನು ಒದಗಿಸುವುದು ನಮ್ಮ ಕೆಲಸ. ಮುಕ್ತ ಮಾರುಕಟ್ಟೆಯಲ್ಲಿ ಯಾವ ಸೇವೆಯನ್ನು ಆಯ್ಕೆ ಮಾಡಿಕೊಳ್ಳಬೇಕು ಮತ್ತು ಆ ಸೇವೆಗಳ ಪೈಕಿ ಯಾವ ಕಂಪನಿಯ ಸೇವೆಯನ್ನು ಪಡೆಯಬೇಕು ಎಂಬುದನ್ನು ನಿರ್ಧರಿಸುವುದು ಗ್ರಾಹಕರಿಗೆ ಬಿಟ್ಟ ವಿಚಾರ ಎಂದು ಇಲ್ಲಿ ನಡೆದ ಇಂಡಿಯಾ ಮೊಬೈಲ್ ಕಾಂಗ್ರೆಸ್ ಕಾರ್ಯಕ್ರಮದ ಸುದ್ದಿಗೋಷ್ಠಿಯಲ್ಲಿ ತಿಳಿಸಿದರು.
ಮಸ್ಕ್ ಅವರ ಸ್ಟಾರ್‌ಲಿಂಕ್, ರಿಲಯನ್ಸ್ ಜಿಯೋದ ಉಪಗ್ರಹ ಉದ್ಯಮವಾದ ಜಿಯೋ ಸ್ಯಾಟ್‌ಕಾಮ್ ಹಾಗೂ ಭಾರ್ತಿ ಬೆಂಬಲಿತ ಯುಟೆಲ್ಸಾಟ್ ಒನ್‌ವೆಬ್ ಸೇರಿದಂತೆ ಮೂರು ಸಂಸ್ಥೆಗಳು ಈಗಾಗಲೇ ಪರವಾನಗಿ ಪಡೆದಿವೆ ಎಂದು ಸಿಂಧಿಯಾ ಹೇಳಿದರು. ಅಮೆಜಾನ್‌ನ ಪ್ರಾಜೆಕ್ಟ್ ಕೈಪರ್ ಕೂಡ ಆಸಕ್ತಿ ವ್ಯಕ್ತಪಡಿಸಿದ್ದು, ನಿಗದಿತ ಪ್ರಕ್ರಿಯೆಯನ್ನು ಅನುಸರಿಸಬೇಕಿದೆ ಎಂದು ತಿಳಿಸಿದರು.
ಒಂದು ನಿರ್ದಿಷ್ಟ ಕಂಪನಿಯ ಬಗ್ಗೆ ಸಾಕಷ್ಟು ಚರ್ಚೆ ನಡೆಯುತ್ತಿದೆ. ಆದರೆ, ಮೂರು ಸಂಸ್ಥೆಗಳು ಸ್ಯಾಟ್‌ಕಾಮ್ ಪರವಾನಗಿ ಪಡೆದಿವೆ ಎಂದು ಹೇಳಿದರು.
ನಮ್ಮ ನಿಲುವು ಸ್ಪಷ್ಟವಾಗಿದೆ. ಮೂರು ಸಂಸ್ಥೆಗಳು ಪರವಾನಗಿ ಪಡೆದಿವೆ. ಆದಾಯ ಆಧಾರಿತ ಶುಲ್ಕ ವ್ಯವಸ್ಥೆಯನ್ನು ಸರ್ಕಾರ ನಿರ್ಧರಿಸಿದ ಬಳಿಕ ಅವುಗಳಿಗೆ ಸ್ಪೆಕ್ಟ್ರಮ್ ಹಂಚಿಕೆ ಮಾಡಲಾಗುತ್ತದೆ. ಪ್ರತಿಯೊಂದು ಸಂಸ್ಥೆಯೂ ವೈಯಕ್ತಿಕವಾಗಿ ಭದ್ರತಾ ಷರತ್ತುಗಳನ್ನು ಪೂರೈಸಿದ ಬಳಿಕ ಕಾರ್ಯಾಚರಣೆ ಆರಂಭಿಸಬಹುದು ಎಂದು ತಿಳಿಸಿದರು.
ಸ್ಯಾಟ್‌ಕಾಮ್ ಸ್ಪೆಕ್ಟ್ರಮ್‌ಗೆ ಬೆಲೆ ನಿಗದಿಪಡಿಸುವ ಕುರಿತು ಭಾರತೀಯ ದೂರಸಂಪರ್ಕ ನಿಯಂತ್ರಣ ಪ್ರಾಧಿಕಾರ (ಟ್ರಾಯ್) ಮತ್ತು ದೂರಸಂಪರ್ಕ ಇಲಾಖೆ ಅಂತಿಮ ನಿರ್ಧಾರಕ್ಕೆ ಹತ್ತಿರವಾಗಿವೆ ಎಂದೂ ಸಿಂಧಿಯಾ ಹೇಳಿದರು.
