ಬೆಂಗಳೂರು: ಬೆಂಗಳೂರಿನ ಎ.ಇ.ಸಿ.ಎಸ್ ಮ್ಯಾಗ್ನೋಲಿಯಾ ಮಾರುತಿ ಶಾಲೆಯ ಅಮಿತ್ ಎಸ್. ದೇಶ್‌ಪಾಂಡೆ ಇಂಟರ್ನ್ಯಾಷನಲ್ ಕೆಮಿಸ್ಟ್ರಿ ಒಲಂಪಿಯಾಡ್ ಗೆ ಆಯ್ಕೆಯಾಗಿದ್ದಾರೆ.
ಇಂಟರ್ನ್ಯಾಷನಲ್ ಕೆಮಿಸ್ಟ್ರಿ ಒಲಂಪಿಯಾಡ್, ಶಾಲಾ ವಿಭಾಗದಲ್ಲಿ ರಸಾಯನ ಶಾಸ್ತ್ರಕ್ಕೆ ಸಂಬಂಧಿಸಿದಂತೆ ಪ್ರತಿ ವರ್ಷವೂ ನಡೆಯುವ ಅಂತರಾಷ್ಟ್ರೀಯ ಮಟ್ಟದ ಸ್ಪರ್ಧೆಯಾಗಿದೆ. ಈ ಸ್ಪರ್ಧೆಗೆ ಭಾರತದಾದ್ಯಂತ ಆಯ್ಕೆಯಾಗಿರುವ 4 ವಿದ್ಯಾರ್ಥಿಗಳ ಪೈಕಿ ಅದರಲ್ಲಿ ಬೆಂಗಳೂರಿನ ಅಮಿತ್ ಎಸ್ ದೇಶ್‌ಪಾಂಡೆ ಒಬ್ಬರಾಗಿದ್ದು ಎಫ್‌ಐಐಟಿಜೆಇಇ ಸಂಸ್ಥೆಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾರೆ. ಆಯ್ಕೆಗೂ ಮುನ್ನ ನಾಲ್ಕು ಸುತ್ತುಗಳ ಪ್ರಾಯೋಗಿಕ ಮತ್ತು ಥಿಯರಿ ಪರೀಕ್ಷೆ ನಡೆಸಲಾಗುತ್ತದೆ. ಪರೀಕ್ಷೆಯಲ್ಲಿ ಭಾಗವಹಿಸಿದ್ದ 30 ವಿದ್ಯಾರ್ಥಿಗಳ ಪೈಕಿ ಭಾರತದಿಂದ ಒಟ್ಟು 4 ವಿದ್ಯಾರ್ಥಿಗಳು ಅಂತಿಮವಾಗಿ ಆಯ್ಕೆಯಾಗಿದ್ದಾರೆ.
ಕೆಮಿಸ್ಟ್ರಿ ಒಲಂಪಿಯಾಡ್ ಗೆ ಆಯ್ಕೆಯಾಗಿರುವ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಅಮಿತ್, ತನಗೆ ರಸಾಯನಶಾಸ್ತ್ರ ವಿಭಾಗದಲ್ಲಿ ಅತೀವ ಆಸಕ್ತಿ ಇದ್ದು, ಎಫ್‌ಐಐಟಿಜೆಇಇ ಸಂಸ್ಥೆಯ ಪರಿಣಾಮಕಾರಿ ತರಬೇತಿ ಒಲಂಪಿಯಾಡ್ ಗೆ ಆಯ್ಕೆಯಾಗಲು ನೆರವಾಗಿದೆ ಎಂದು ತಿಳಿಸಿದ್ದಾರೆ. ಶಾಲಾ ಸಮಯದ ನಂತರ ಸಾವಯವ ರಸಾಯನಶಾಸ್ತ್ರಕ್ಕೆ ಸಂಬಂಧಿಸಿದ ಪುಸ್ತಕಗಳನ್ನು ಹೆಚ್ಚು ಓದುವುದಾಗಿ ಅಮಿತ್ ಮಾಹಿತಿ ನೀಡಿದ್ದಾರೆ.
ಅಮಿತ್ ಇಂಟರ್ನ್ಯಾಶನಲ್ ಕೆಮಿಸ್ಟ್ರಿ ಒಲಂಪಿಯಾಡ್ ಗೆ ಆಯ್ಕೆಯಾಗಿರುವುದರ ಬಗ್ಗೆ ಸಂತಸ ವ್ಯಕ್ತಪಡಿಸಿರುವ ಎಫ್‌ಐಐಟಿಜೆಇಇ ಸಂಸ್ಥೆಯ ಮುಖ್ಯಸ್ಥ ಗೌರವ್ ಗೊಯಲ್ ಇಂಟರ್ನ್ಯಾಷನಲ್ ಕೆಮಿಸ್ಟ್ರಿ ಒಲಂಪಿಯಾಡ್ ನಂತಹ ಸ್ಪರ್ಧೆಗಳಿಂದ ವಿದ್ಯಾರ್ಥಿಗಳಿಗೆ ಉತ್ತಮ ಅವಕಾಶ ಲಭಿಸಿದೆ. 2012ರಲ್ಲಿ ಬೆಂಗಳೂರಿನ ಅರವಿಂದಂ ಭಟ್ಟಾಚಾರ್ಯ ಕೋರಿಯಾದಲ್ಲಿ ನಡೆದ ಅಂತಾರಾಷ್ಟ್ರಿಯ ಖಗೋಳ ವಿಜ್ಞಾನ ಸ್ಪರ್ಧೆಯಲ್ಲಿ ಭಾಗಿಯಾಗಿ ಚಿನ್ನದ ಪದಕ ಗೆದಿದ್ದರು. 2013ರಲ್ಲಿ ಗ್ರಿಸ್‌ನಲ್ಲಿ ನಡೆದ ಅಂತಾರಾಷ್ಟ್ರೀಯ ಸೀನಿಯರ್ ಒಲಿಂಪಿಯಾಡ್‌ನಲ್ಲಿ ಕಂಚಿನ ಪದಕ ಗೆದ್ದಿದ್ದರು. ಇದೀಗ ಅವರಂತೆಯೇ ಅಮಿತ್ ಕೂಡ ಆಯ್ಕೆಯಾಗಿದ್ದು ಅವರಿಗೆ ಶುಭ ಕೋರುತ್ತೇವೆ ಎಂದಿದ್ದಾರೆ.
