ಮುಂಬೈ: ಮಹತ್ವದ ಬೆಳವಣಿಗೆಯಲ್ಲಿ ದೇಶದ ಅತೀ ದೊಡ್ಡ ಬ್ಯಾಂಕಿಂಗ್ ಸಂಸ್ಥೆ ಭಾರತೀಯ ಸ್ಟೇಟ್ ಬ್ಯಾಂಕ್(ಎಸ್ ಬಿಐ) ಸಾಲದ ಮೇಲಿನ ಪ್ರೊಸೆಸಿಂಗ್ ಫೀ (ಪ್ರಕ್ರಿಯೆ ಶುಲ್ಕ)ಯನ್ನು ಶೇ. 100ರಷ್ಟು ರದ್ದುಗೊಳಿಸಿದೆ.

ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ತನ್ನ ಗ್ರಾಹಕರಿಗೆ ಗೌರಿಗಣೇಶ ಹಬ್ಬದ ಸಿಹಿಸುದ್ದಿ ನೀಡಿದ್ದು, ಸಾಲಗಳ ಮೇಲಿನ ಪ್ರೊಸೆಸಿಂಗ್ ಶುಲ್ಕವನ್ನು ಶೇ.100ರಷ್ಟು ಕಡಿತ ಮಾಡುವುದಾಗಿ ಘೋಷಿಸಿದೆ. ಕಾರ್ ಲೋನ್, ಗೋಲ್ಡ್ ಲೋನ್  ಸೇರಿದಂತೆ ಇತರ ವೈಯಕ್ತಿಕ ಸಾಲಗಳಿಗೆ ಬ್ಯಾಂಕ್ ವಿಧಿಸುತ್ತಿದ್ದ ಪ್ರೊಸೆಸಿಂಗ್ ಫೀಯನ್ನು ಡಿಸೆಂಬರ್ 31 2017ರವಗೂ ವಿಧಿಸುವುದಿಲ್ಲ ಎಂದು ಎಸ್ ಬಿಐ ಪ್ರಕಟಿಸಿದೆ.

ಮೂಲಗಳ ಪ್ರಕಾರ 2017ರ ಡಿಸೆಂಬರ್ 31ರವರೆಗೆ ಪಡೆಯುವ ಕಾರ್ ಲೋನ್ ಅರ್ಜಿಗಳಿಗೆ ಮಾತ್ರ ಈ ಕೊಡುಗೆ ಅನ್ವಯವಾಗಲಿದ್ದು, ಬ್ಯಾಂಕ್ ನೀಡುವ ವೈಯಕ್ತಿಕ ಸಾಲ “ಎಕ್ಸ್ ಪ್ರೆಸ್ ಕ್ರೆಡಿಟ್” ಮೇಲೆ ಸೆಪ್ಟೆಂಬರ್ 30ರವರೆಗೆ  ಶೇ.50ರಷ್ಟು ಶುಲ್ಕ ಕಡಿತ ಮಾಡಲಾಗುತ್ತದೆ. ಅಂತೆಯೇ ಅಕ್ಟೋಬರ್  31ರವರೆಗೆ ಚಿನ್ನದ ಸಾಲದ ಮೇಲಿನ ಶೇ.50ರಷ್ಟು ಪ್ರೊಸೆಸಿಂಗ್ ಫೀಯನ್ನು ರದ್ದುಗೊಳಿಸಲಾಗಿದೆ ಎಂದು ಎಸ್ ಬಿಐ ಪ್ರಕಟಿಸಿದೆ.

ಈ ಹಿಂದೆ ಉಳಿತಾಯ ಖಾತೆಗಳಲ್ಲಿನ ಹಣದ ಬಡ್ಡಿದರ ಇಳಿಕೆ ಮಾಡುವ ಮೂಲಕ ಗ್ರಾಹಕರಿಗೆ ತಲೆಬಿಸಿ ಮಾಡಿದ್ದ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಈಗ ತನ್ನ ಗ್ರಾಹಕರಿಗೆ ಕೊಂಚ ಸಮಾಧಾನಕರ ಸುದ್ದಿ ನೀಡಿದೆ.