ನವದೆಹಲಿ: ಕರಣ್ ಬಜ್ವಾ ಅವರನ್ನು ಐಬಿಎಂ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕರನ್ನಾಗಿ ನೇಮಕ ಮಾಡಿರುವುದಾಗಿ ವಿಶ್ವದ ಅತಿದೊಡ್ಡ ಮಾಹಿತಿ ತಂತ್ರಜ್ಞಾನ ಕಂಪನಿಗಳ ಪೈಕಿ ಒಂದಾದ ಐಬಿಎಂ ಬುಧವಾರ ತಿಳಿಸಿದೆ.

ವ್ಯವಸ್ಥಾಪಕ ನಿರ್ದೇಶಕರಾಗಿದ್ದ ವನಿತಾ ನಾರಾಯಣ್ ಅವರಿಗೆ ಐಬಿಎಂ ಇಂಡಿಯಾ ಅಧ್ಯಕ್ಷರನ್ನಾಗಿ ಮುಂಬಡ್ತಿ ನೀಡಲಾಗಿದ್ದು, ಅವರ ಸ್ಥಾನಕ್ಕೆ ಬಜ್ವಾ ಅವರನ್ನು ನೇಮಕ ಮಾಡಲಾಗಿದೆ. ಬಜ್ವಾ ಅವರು ಕಳೆದ ವರ್ಷ ಏಷ್ಯಾ-ಪೆಸಿಫಿಕ್ ಪ್ರದೇಶದ ತಂತ್ರ ಮತ್ತು ರೂಪಾಂತರ ಕಾರ್ಯನಿರ್ವಾಹಕರಾಗಿ ಐಬಿಎಂ ಸೇರಿಕೊಂಡಿದ್ದರು. ಇದಕ್ಕು ಮುನ್ನ ಮೈಕ್ರೋಸಾಫ್ಟ್ ಇಂಡಿಯಾದ ವ್ಯವಸ್ಥಾಪಕ ನಿರ್ದೇಶಕರಾಗಿದ್ದರು.

ಮಾರುಕಟ್ಟೆಯಲ್ಲಿ ಇದೊಂದು ಅತ್ಯುತ್ತಮ ಅವಕಾಶವಾಗಿದ್ದು, ನಿರಂತರವಾಗಿ ಪುನರ್ ಶೋಧನೆ ಮತ್ತು ನಾವೀನ್ಯತೆಯಲ್ಲಿ ಹೂಡಿಕೆ ಮಾಡಲಾಗುವುದು. ಐಬಿಎಂ ಇಂದು ಒಳ್ಳೆಯ ಸ್ಥಾನದಲ್ಲಿದ್ದು, ಡಿಜಿಟಲ್ ರೂಪಾಂತರ ಪ್ರಯಾಣಕ್ಕೆ ಮತ್ತು ವ್ಯವಹಾರಕ್ಕೆ ಸಹಕರಿಸಲಿದೆ ಎಂದು ಬಜ್ವಾ ಹೇಳಿದ್ದಾರೆ.