ಮುಂಬೈ: ಇರಾನ್ ಯುದ್ಧ ಮತ್ತು ಅಮೆರಿಕ ಕದನ ವಿರಾಮ ಘೋಷಣೆ ಬೆನ್ನಲ್ಲೇ ಮಹಿಳೆಯರ ನೆಚ್ಚಿನ ಚಿನ್ನದ ದರ ಇಂದು ಮತ್ತೆ ಭಾರಿ ಪ್ರಮಾಣದಲ್ಲಿ ಕುಸಿತ ಕಂಡಿದೆ.

ಹೌದು.. ಗಗನಕ್ಕೇರಿದ್ದ ಚಿನ್ನದ ದರದಲ್ಲಿ ಸತತ 2ನೇ ದಿನ ಕುಸಿತ ಕಂಡುಬಂದಿದ್ದು, ಹಳದಿ ಲೋಹ ಒಂದೇ ದಿನ ಬರೊಬ್ಬರಿ 5 ಸಾವಿರದವರೆಗೂ ದರ ಇಳಿಕೆ ಕಂಡಿದೆ. ಕಳೆದ ವಾರದ ಆರಂಭದಲ್ಲಿ 15 ಸಾವಿರ ಗಡಿಯಲ್ಲಿ ವಹಿವಾಟು ನಡೆಸುತ್ತಿದ್ದ ಚಿನ್ನ ಇಂದು ಏಕಾಏಕಿ 12 ಸಾವಿರ ಗಡಿಗೆ ತಲುಪಿದೆ.

ಪ್ರಸ್ತುತ ಚಿನ್ನದ ದರ ರೂ 1,36,000 ಬೆಂಬಲ ಮಟ್ಟಕ್ಕಿಂತ ಹೆಚ್ಚಿನ ವಹಿವಾಟು ನಡೆಸುತ್ತಿದೆ. ಇದು ದುರ್ಬಲ ಜಾಗತಿಕ ಸಂಕೇತಗಳು ಮತ್ತು ಬಲವಾದ ಚೇತರಿಕೆಯ ಆವೇಗದ ಕೊರತೆಯನ್ನು ಸೂಚಿಸುತ್ತದೆ.

40 ವರ್ಷಗಳಲ್ಲಿ ಅತ್ಯಂತ ಕೆಟ್ಟ ಕುಸಿತ

ಜಾಗತಿಕ ಮಾರುಕಟ್ಟೆಗಳಲ್ಲಿ, ಚಿನ್ನವು ತನ್ನ ನಷ್ಟವನ್ನು ವಿಸ್ತರಿಸಿದ್ದು, ಸೋಮವಾರ ಶೇಕಡಾ 2 ಕ್ಕಿಂತ ಹೆಚ್ಚು ಕುಸಿದು ನಾಲ್ಕು ತಿಂಗಳ ಕನಿಷ್ಠ ಮಟ್ಟವನ್ನು ತಲುಪಿದೆ. GMT 0238 ರ ಹೊತ್ತಿಗೆ ಸ್ಪಾಟ್ ಚಿನ್ನದ ಬೆಲೆ ಔನ್ಸ್‌ಗೆ ಶೇ. 2.5 ರಷ್ಟು ಇಳಿಕೆಯಾಗಿ $4,372.86 ಕ್ಕೆ ತಲುಪಿದೆ, ಇದು ಸತತ ಒಂಬತ್ತನೇ ಕುಸಿತದ ಅವಧಿಯನ್ನು ಸೂಚಿಸುತ್ತದೆ ಮತ್ತು ಜನವರಿ 2 ರ ನಂತರದ ಅತ್ಯಂತ ಕಡಿಮೆ ಮಟ್ಟವನ್ನು ತಲುಪಿದೆ.

ಹಿಂದಿನ ವಾರದಲ್ಲಿ ಹಳದಿ ಲೋಹವು ಈಗಾಗಲೇ ಶೇ. 10 ಕ್ಕಿಂತ ಹೆಚ್ಚು ಕುಸಿದಿತ್ತು. ಸ್ಪಾಟ್ ಬೆಳ್ಳಿ ಕೂಡ ಇಳಿಕೆಯ ಪ್ರವೃತ್ತಿಯನ್ನು ಅನುಸರಿಸಿತು, ಶೇ. 3.2 ರಷ್ಟು ಕಡಿಮೆಯಾಗಿ ಪ್ರತಿ ಔನ್ಸ್‌ಗೆ $65.61 ಕ್ಕೆ ತಲುಪಿದೆ. ಕಳೆದ ವಾರ, ಚಿನ್ನವು 43 ವರ್ಷಗಳಲ್ಲಿ ತನ್ನ ತೀವ್ರ ಕುಸಿತವನ್ನು ದಾಖಲಿಸಿತ್ತು. ಶುಕ್ರವಾರ ಸ್ಪಾಟ್ ಮಾರುಕಟ್ಟೆಯಲ್ಲಿ ಶೇ. 10 ಕ್ಕಿಂತ ಹೆಚ್ಚು ಕುಸಿತ ಕಂಡಿತು ಮತ್ತು ಟ್ರಾಯ್ ಔನ್ಸ್‌ಗೆ $4,500 ಕ್ಕಿಂತ ಕಡಿಮೆ ಸ್ಥಿರವಾಯಿತು.

ಇನ್ನೂ 6 ಸಾವಿರ ರೂ ಕುಸಿಯುವ ಸಾಧ್ಯತೆ

ಚಿನ್ನದ ದರ ಮುಂದಿನ ವಾರ ಮತ್ತಷ್ಟು ಕುಸಿಯುವ ಸಾಧ್ಯತೆ ಇದ್ದು, ಬೆಲೆಗಳು ರೂ. 1,30,000 ಕ್ಕೆ ಕುಸಿಯಬಹುದು ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ. ಚಿನ್ನದ ವಹಿವಾಟಿನ ಅಲ್ಪಾವಧಿಯ ಮುನ್ನೋಟವು ನಕಾರಾತ್ಮಕವಾಗಿ ಕಾಣುತ್ತಿದ್ದು, ಚಿನ್ನದ ವ್ಯಾಪಾರವು ಪ್ರಮುಖ ಚಲಿಸುವ ಸರಾಸರಿಗಿಂತ ಕಡಿಮೆಯಾಗಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇಂದಿನ ದರ ಎಷ್ಟು?

ರಾಷ್ಟ್ರ ರಾಜಧಾನಿ ದೆಹಲಿಯಲ್ಲಿ 22 ಕ್ಯಾರಟ್ ನ 1 ಗ್ರಾಂ ಚಿನ್ನದ ದರ ರೂ 12,670 ರೂಗಳಾಗಿದ್ದು, 18 ಕ್ಯಾರಟ್ ನ 1 ಗ್ರಾಂ ಚಿನ್ನ ರೂ 10,640 ಗಳಾಗಿದೆ. ಅಂತೆಯೇ 1 ಗ್ರಾಂ ಬೆಳ್ಳಿ: ರೂ 235ರಷ್ಟಿದೆ.

ಬೆಂಗಳೂರಿನಲ್ಲಿ ಚಿನ್ನದ ದರ

ಇನ್ನು ಸಿಲಿಕಾನ್ ಸಿಟಿ ಬೆಂಗಳೂರಿನಲ್ಲಿ ಚಿನ್ನದ ಏರಿಳಿತ ಕಂಡಿದ್ದು, 24 ಕ್ಯಾರೆಟ್ ಚಿನ್ನದ ಬೆಲೆ ಪ್ರತಿ ಗ್ರಾಂಗೆ 14,002 ರೂ. ಗಳಾಗಿದೆ. ಅಂತೆಯೇ 22 ಕ್ಯಾರೆಟ್ ಚಿನ್ನದ ಬೆಲೆ ಪ್ರತಿ ಗ್ರಾಂಗೆ 12,835 ರೂ. ಗಳಾಗಿದ್ದು, 18 ಕ್ಯಾರೆಟ್ ಚಿನ್ನದ ಬೆಲೆ ಪ್ರತಿ ಗ್ರಾಂಗೆ 10,502 ರೂ.ನಲ್ಲಿ ವಹಿವಾಟು ನಡೆಸುತ್ತಿದೆ.

ಬೆಳ್ಳಿ ದರದಲ್ಲೂ ಭಾರಿ ಇಳಿಕೆ

ಇನ್ನು ಚಿನ್ನ ಮಾತ್ರವಲ್ಲದೇ ಬೆಳ್ಳಿ ದರದಲ್ಲೂ ಇಂದು ಭಾರಿ ಇಳಿಕೆ ಕಂಡುಬಂದಿದೆ. ಇಂದು ಬೆಳ್ಳಿ ದರದಲ್ಲಿ ಶೇ.11.5% ರಷ್ಟು ಕುಸಿದಿದ್ದು, ಬರೊಬ್ಬರಿ 26,262ರೂ ಗಳ ಇಳಿಕೆಯಾಗಿದೆ ಪ್ರತೀ ಕಿಲೋಗ್ರಾಂಗೆ ಬೆಳ್ಳಿ ರೂ 2,00,510 ರೂಗೆ ಕುಸಿದಿದೆ.