ನವದೆಹಲಿ: ಪಾಕಿಸ್ತಾನದ ಕ್ರಿಕೆಟರಿಗೆ ತಾಯ್ನಾಡಿನಲ್ಲಿ ಸಿಗುವುದಕ್ಕಿಂತ ಹೆಚ್ಚು ಪ್ರೀತಿ ಭಾರತದಲ್ಲಿ ಸಿಕ್ಕಿದೆ ಎಂದು ಪಾಕ್ ಕ್ರಿಕೆಟಿಗ ಶಾಹಿದ್ ಅಫ್ರೀದಿ ಅವರ ಹೇಳಿಕೆಗೆ ಪಾಕ್ ಮೂಲದ ಬಾಲಿವುಡ್ ನಟ ಫವಾದ್ ಖಾನ್ ಬೆಂಬಲ ಸೂಚಿಸಿದ್ದಾರೆ.

ಬಾಲಿವುಡ್‌ನಲ್ಲಿ ಶೀಘ್ರವೇ ತೆರೆ ಕಾಣಲಿರುವ ಕಪೂರ್ ಆ್ಯಂಡ್ ಸನ್ಸ್ ಚಿತ್ರದ ಪ್ರಚಾರಕ್ಕಾಗಿ ಆಗಮಿಸಿದ ಫವಾದ್ ಖಾನ್, ಅಫ್ರೀದಿಗೆ ಏನು ಅನುಭವವಾಗಿದೆಯೋ ಅದೇ ರೀತಿ ನನಗೂ ಹಲವಾರು ಕಡೆ, ಬಹುತೇಕ ಎಲ್ಲ ಕಡೆಯಲ್ಲೂ ಆಗಿದೆ. ಆತ ಹೇಳಿದ್ದರಲ್ಲಿ ತಪ್ಪೇನಿದೆ?. ಪಾಕಿಸ್ತಾನದಲ್ಲಿ ನಮಗೆ ಲಭಿಸಿದ ಪ್ರೀತಿಗಿಂತ ಹೆಚ್ಚು ಪ್ರೀತಿಯನ್ನು ಭಾರತದ ಅಭಿಮಾನಿಗಳು ನಮಗೆ ನೀಡಿದ್ದಾರೆ.

ಆತ ಹೇಳಿದ್ದನ್ನು ಯಾರೂ ತಪ್ಪಾಗಿ ಅರ್ಥೈಸಬೇಕಾಗಿಲ್ಲ. ಈ ಎಲ್ಲ ವಿವಾದಗಳು ಕಾಲದೊಂದಿಗೆ ತಣ್ಣಗಾಗುತ್ತವೆ. ಆತ ಹಾಗೆ ಹೇಳಿದ್ದರಿಂದ ಆತನ ದೇಶಪ್ರೇಮವನ್ನು ಪ್ರಶ್ನಿಸಬೇಕಾಗಿಲ್ಲ. ಆತ ಪಾಕಿಸ್ತಾನವನ್ನು ಗೌರವಿಸುತ್ತಾನೆ. ಆತ ಪಾಕಿಸ್ತಾನವನ್ನು ಪ್ರತಿನಿಧೀಕರಿಸುತ್ತಿರುವುದು ನಮಗೆ ಹೆಮ್ಮೆಯ ವಿಚಾರ ಎಂದು ಫವಾದ್ ಹೇಳಿದ್ದಾರೆ.