ಮುಂಬೈ/ಪುಣೆ: ಬಾಲಿವುಡ್ ನಟ ಅಮೀರ್ ಖಾನ್ ಮತ್ತು ಅವರ ಪತ್ನಿ ಕಿರಣ್ ರಾವ್ ಎಚ್1ಎನ್1 ಜ್ವರದಿಂದ ಬಳಲುತ್ತಿದ್ದಾರೆ. ಇಬ್ಬರಿಗೂ ಮನೆಯಲ್ಲೇ ಚಿಕಿತ್ಸೆ ನೀಡಲಾಗುತ್ತಿದ್ದು ಗುಣಮುಖರಾಗುವವರೆಗೆ ಯಾವುದೇ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸುತ್ತಿಲ್ಲ.
ತೀವ್ರ ಜ್ವರವೆಂದು ಪರೀಕ್ಷೆ ಮಾಡಿಸಿ ನೋಡಿದಾಗ ಇಬ್ಬರಿಗೂ ಎಚ್1ಎನ್1 ಇರುವುದು ದೃಢವಾಗಿದೆ. ವೈದ್ಯರು ಒಂದು ವಾರ ಕಾಲ ವಿಶ್ರಾಂತಿ ತೆಗೆದುಕೊಳ್ಳುವಂತೆ ದಂಪತಿಗೆ ಸೂಚಿಸಿದ್ದಾರೆ. ಮೊದಲಿಗೆ ಅಮೀರ್ ಗೆ ಕಾಣಿಸಿಕೊಂಡ ಎಚ್1 ಎನ್ 1 ಸೋಂಕು ನಂತರ ಅವರ ಪತ್ನಿಗೆ ಹಬ್ಬಿದೆ.
ಅಮೀರ್ ಮತ್ತು ಕಿರಣ್ ನಿನ್ನೆ ಪುಣೆಯ ತಮ್ಮ ಪಾನಿ ಫೌಂಡೇಶನ್ ನ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಭಾಗವಹಿಸಬೇಕಾಗಿತ್ತು. ಆದರೆ ಜ್ವರದ ಕಾರಣ ಭಾಗವಹಿಸಲು ಸಾಧ್ಯವಾಗುತ್ತಿಲ್ಲ ಎಂದು ಸ್ವತಃ ಅಮೀರ್ ಮತ್ತು ಕಿರಣ್ ರಾವ್ ವಿಡಿಯೊ ಕಾನ್ಫರೆನ್ಸ್ ಮೂಲಕ ತಿಳಿಸಿದ್ದರು.
ಇವತ್ತು ಸ್ನೇಹಿತರ ದಿನವಾದ ಕಾರಣ ನನ್ನ ಬದಲಿಗೆ ನನ್ನ ಸ್ನೇಹಿತ ಶಾರೂಕ್ ಖಾನ್ ಭಾಗವಹಿಸುತ್ತಿದ್ದಾರೆ ಎಂದು ವಿಡಿಯೊದಲ್ಲಿ ಅಮೀರ್ ಹೇಳಿದ್ದರು. ಅದರಂತೆ ನಿನ್ನೆ ನಡೆದ ಪಾನಿ ಫೌಂಡೇಶನ್ ಕಾರ್ಯಕ್ರಮದಲ್ಲಿ ಮುಖ್ಯಮಂತ್ರಿ ದೇವೇಂದ್ರ ಫಡ್ನವೀಸ್, ರಿಲಯನ್ಸ್ ಫೌಂಡೇಶನ್ ಸ್ಥಾಪಕಿ ನೀತಾ ಅಂಬಾನಿ, ಉದ್ಯಮಿ ರಾಜೀವ್ ಬಜಾಜ್, ಬಾಲಿವುಡ್ ನಟ ಶಾರೂಕ್ ಖಾನ್ ಮೊದಲಾದವರು ಭಾಗವಹಿಸಿದ್ದರು.