ನವದೆಹಲಿ: ಸ್ತ್ರೀವಾದ ಲಿಂಗ ಸಮಾನತೆಗೆ ಕರೆ ನೀಡುತ್ತದೆ ಆದರೆ ಜನರು ಇದನ್ನು ತಪ್ಪಾಗಿ ಅರ್ಥಮಾಡಿಕೊಂಡು ಪುರುಷ ನಿಂದನೆಯಲ್ಲೇ ಅಂತ್ಯಗೊಳಿಸುತ್ತಾರೆ ಎಂದು ಆಲಿಯಾ ಭಟ್ ಹೇಳಿದ್ದಾರೆ. 

ಮಹಿಳೆಗೆ ವಿಶೇಷ ಉಪಚಾರವನ್ನು ಸ್ತ್ರೀವಾದ ಕೇಳುವುದಿಲ್ಲ. ಕೇವಲ ಹೆಣ್ಣು ಮಕ್ಕಳು ಮಾತ್ರ ಸ್ತ್ರೀವಾದಿಗಳಾಗಿರಬೇಕೆಂದೇನೂ ಇಲ್ಲ.  ಹೆಣ್ಣು ಮಕ್ಕಳ ಬಗ್ಗೆ ಕಾಳಜಿ ತೋರುವ ಪುರುಷರೂ ಸಹ ಸ್ತ್ರೀ ಪರ ಧ್ವನಿಯಾಗಬಲ್ಲರು. ಸ್ತ್ರೀವಾದವೆಂದರೆ ಸಮಾನತೆ ಹಾಗೂ ಸಮಾನತೆಯನ್ನು ಎಲ್ಲರೂ ನಂಬುತ್ತಾರೆ. ಆದರೆ ಸಾಮಾನ್ಯವಾಗಿ ಸ್ತ್ರೀವಾದವನ್ನು ತಪ್ಪಾಗಿ ಅರ್ಥ ಮಾಡಿಕೊಂಡು ಪುರುಷ ನಿಂದನೆಯನ್ನು ಮಾಡಲಾಗುತ್ತದೆ ಎಂದು ಆಲಿಯಾ ಭಟ್ ಅಭಿಪ್ರಾಯಪಟ್ಟಿದ್ದಾರೆ. 

"ಪುರುಷರಿಗಿಂತ ಮಹಿಳೆಯರು ಶ್ರೇಷ್ಠ ಎಂದು ಹೇಳುತ್ತಿಲ್ಲ. ಹಾಗೆ ಹೇಳುವುದು ಸೂಕ್ತ ಎಂಬ ನಂಬಿಕೆ ಇಲ್ಲ. ಪುರುಷರು, ಮಹಿಳೆಯರು ಇಬ್ಬರಿಗೂ ಸಮಾನತೆ ಇರಬೇಕು. ನಾನು ಮಹಿಳಾ ಹಕ್ಕುಗಳ ಅಭಿಯಾನದ ಭಾಗವಾಗಿಲ್ಲ. ಹಾಗೆಂದ ಮಾತ್ರಕ್ಕೆ ನಾನು ಸ್ತ್ರೀವಾದಿಯಲ್ಲ ಎಂಬ ಅರ್ಥ ಕಲ್ಪಿಸಬೇಕಿಲ್ಲ". ಎಂದಿದ್ದಾರೆ. ಮಹಿಳಾ ಸಬಲೀಕರಣದ ಬಗ್ಗೆ ಈಗಾಗಲೇ ಸಾಕಷ್ಟು ಮಾತನಾಡಲಾಗಿದೆ. ಸಮಾನತೆ ಎಂಬುದು ಮಹಿಳೆಯರ ಜನ್ಮಸಿದ್ಧ ಹಕ್ಕು ಎಂಬುದನ್ನು ಅರ್ಥ ಮಾಡಿಕೊಳ್ಳಬೇಕು ಎಂದು ಆಲಿಯಾ ಭಟ್ ಅಭಿಪ್ರಾಯಪಟ್ಟಿದ್ದಾರೆ.