ವಾಷಿಂಗ್ಟನ್ ಡಿಸಿ (ಯುಎಸ್ಎ): ಬಾಲಿವುಡ್ ನ ಹೆಸರಾಂತ ನಟ ಇರ್ಫಾನ್ ಖಾನ್ ಅಭಿನಯದ 'ನೋ ಬೆಡ್ ಆಫ್ ರೋಸಸ್' ಚಿತ್ರ ಆಸ್ಕರ್ ಪ್ರಶಸ್ತಿ ಸ್ಪರ್ಧೆಗೆ ನಾಮಾಂಕಿತಗೊಂಡಿದೆ.
ವಿದೇಶಿ ಭಾಷೆ ವಿಭಾಗದಲ್ಲಿ ಬಾಂಗ್ಲಾದೇಶ ಆಸ್ಕರ್ ಪ್ರಶಸ್ತಿ ರೇಸ್ ಗೆ ಈ ಚಿತ್ರವನ್ನು ಆರಿಸಿಕೊಂಡಿದೆ.
ಭಾರತ-ಬಾಂಗ್ಲಾದೇಶ ಜಂಟಿಯಾಗಿ ನಿರ್ಮಿಸಿರುವ ಈ ಚಿತ್ರ 2017ರ ಶಾಂಘೈ ಚಲನಚಿತ್ರೋತ್ಸವ, ಮಾಸ್ಕೊ ಚಿತ್ರೋತ್ಸವ, ವ್ಯಾಂಕೋವರ್ ಚಿತ್ರೋತ್ಸವ ಮತ್ತು ಬುಸನ್ ಚಲನಚಿತ್ರೋತ್ಸವದಲ್ಲಿ ಪ್ರದರ್ಶನಗೊಂಡಿದೆ,
ಖ್ಯಾತ ಯಶಸ್ವಿ ಚಿತ್ರ ನಿರ್ಮಾಪಕ ಜಾವೆದ್ ಹಸನ್ ಅವರ ಪಾತ್ರವನ್ನು ಇರ್ಫಾನ್ ಖಾನ್ ಅಭಿನಯಿಸಿದ್ದಾರೆ. ಜಾವೆದ್ ಅವರು ತಮ್ಮ ಪುತ್ರಿಯ ಬಾಲ್ಯದ ಗೆಳೆಯ ಪರ್ನೊ ಮಿಟ್ರಾ ಅವರ ಮೇಲೆ ನಂಬಿಕೆಯಿಟ್ಟು ತಮ್ಮ ಜೀವನದ ಮಧ್ಯ ಭಾಗದಲ್ಲಿ ಎದುರಿಸುವ ಸಮಸ್ಯೆಗಳನ್ನು ಚಿತ್ರದಲ್ಲಿ ತೋರಿಸಲಾಗಿದೆ.
ಬಾಂಗ್ಲಾ ನಟಿ ರೋಕಿಯಾ ಪ್ರಾಚಿ ಇರ್ಫಾನ್ ಅವರ ಪತ್ನಿ ಹಾಗೂ ನುಸ್ರತ್ ಇಮ್ರೊಸ್ ತಿಶಾ ಮಗಳ ಪಾತ್ರವನ್ನು ನಿಭಾಯಿಸಿದ್ದಾರೆ.
91ನೇ ಆಸ್ಕರ್ ಪ್ರಶಸ್ತಿ ಮುಂದಿನ ವರ್ಷ ಫೆಬ್ರವರಿ 24ರಂದು ಪ್ರಕಟವಾಗಲಿದೆ.