ಮುಂಬೈ: ಪ್ರಖ್ಯಾತಿ ಬಂದ ಕೂಡಲೇ ಕೆಲವರು ತಮ್ಮ ವರ್ತನೆಯನ್ನೇ ಬದಲಾಯಿಸಿಕೊಳ್ಳುತ್ತಾರೆ. ಅದೇ ರೀತಿ ಮುಂಬೈನ ಬೀದಿಗಳಲ್ಲಿ ಹಾಡಿ ಭಿಕ್ಷೆ ಬೇಡುತ್ತಿದ್ದ ರಾನು ಮೊಂಡಲ್ ಸಾಮಾಜಿಕ ಜಾಲತಾಣದಲ್ಲಿ ಖ್ಯಾತಿ ಗಳಿಸಿ ಇಂಟರ್ ನೆಟ್ ಸ್ಟಾರ್ ಆಗುತ್ತಿದ್ದಂತೆ ಇತ್ತೀಚೆಗೆ ಸೆಲ್ಫಿ ತೆಗೆಸಿಕೊಳ್ಳಲು ಬಂದ ಅಭಿಮಾನಿಗೆ ಡೋಂಟ್ ಟಚ್ ಮಿ ಎಂದು ಹೇಳಿರುವ ವಿಡಿಯೋ ವೈರಲ್ ಆಗಿದೆ.

ರಾನು ಮೊಂಡಲ್ ಅವರು ಮಾರ್ಕೆಟ್ ಗೆ ಹೋಗಿದ್ದ ಸಂದರ್ಭದಲ್ಲಿ ಅವರನ್ನು ಗುರುತಿಸಿದ ಮಹಿಳಾ ಅಭಿಮಾನಿಯೊಬ್ಬರು ಅವರ ಹತ್ತಿರ ಬಂದು ಅವರ ಕೈಗಳನ್ನು ಹಿಡಿದು ಸೆಲ್ಫಿ ತೆಗೆಸಿಕೊಳ್ಳಲು ಮುಂದಾಗುತ್ತಾರೆ. ಇದರಿಂದ ಕೋಪಗೊಂಡ ರಾನು ಹೀಗೆಲ್ಲಾ ಕೈ ಹಿಡಿದು ಎಳೆಯಬೇಡಿ. ನನ್ನನ್ನು ಮುಟ್ಟಬೇಡಿ ಎಂದೆಲ್ಲಾ ಹೇಳಿದ್ದಾರೆ. 

ರಾನು ಮೊಂಡಲ್ ಅವರ ವರ್ತನೆಯನ್ನು ಕಂಡ ಮಹಿಳೆ ನಕ್ಕು ಸುಮ್ಮನ್ನಾಗುತ್ತಾರೆ. ಆದರೆ ರಾನು ಅವರ ವರ್ತನೆಯನ್ನು ಕಂಡ ನೆಟಿಗರು ತಮ್ಮ ಆಕ್ರೋಶವನ್ನು ಹೊರಹಾಕಿದ್ದಾರೆ. 

ರಾತ್ರೋರಾತ್ರಿ ಫೇಮಸ್ ಆದರೆ ಅವರ ವರ್ತನೆ ಹೀಗೆ ಆಗುತ್ತದೆ. ರಾನುಗೆ ಅಹಂಕಾರ ಬಂದಿದೆ. ರಾನು ಮೊಂಡಲ್ ಅವರ ಆ್ಯಟಿಟ್ಯೂಡ್ ನೋಡಿ ಎಂದು ನೆಟಿಗರು ಟ್ರೋಲ್ ಮಾಡುತ್ತಿದ್ದಾರೆ.