ನವದೆಹಲಿ: ಭಾರತೀಯ ಕ್ರಿಕೆಟ್ ತಂಡದ ಮಾಜಿ ನಾಯಕ ಸೌರವ್ ಗಂಗೂಲಿ ಅವರಿಗೆ ದೆಹಲಿ ಹೈಕೋರ್ಟ್ ಬಿಗ್ ಶಾಕ್ ನೀಡಿದ್ದು, ಅಕ್ಟೋಬರ್ 23 ರಂದು ಬಿಡುಗಡೆಯಾಗಲಿರುವ ದೂಸ್ರಾ ಚಲನಚಿತ್ರದ ಪ್ರದರ್ಶನಕ್ಕೆ ತಡೆ ನೀಡಲು ನಿರಾಕರಿಸಿದೆ. ಈ ಮೂಲಕ ತಮ್ಮ ಅನುಮತಿಯಿಲ್ಲದೆ ಜೀವನದ ಪ್ರಮುಖ ಘಟನೆಗಳು ಹಾಗೂ ಹೆಸರನ್ನು ಬಳಸಿಕೊಳ್ಳಲಾಗಿದೆ ಎಂದು ಚಿತ್ರದ ಬಿಡುಗಡೆಗೆ ತಡೆ ಕೋರಿದ್ದ ಸೌರವ್ ಗಂಗೂಲಿ ಮತ್ತು ಲವ್ ಫಿಲ್ಮ್ಸ್ ಸಂಸ್ಥೆಯ ಅರ್ಜಿಯನ್ನು ಹೈಕೋರ್ಟ್ ತಿರಸ್ಕರಿಸಿದೆ. ಆ ಕುರಿತ ವರದಿ ಇಲ್ಲಿದೆ:
ಏನಿದು ಪ್ರಕರಣ?
2002ರ ಐತಿಹಾಸಿಕ ನ್ಯಾಟ್‌ವೆಸ್ಟ್ ಸರಣಿಯ ಫೈನಲ್ ಪಂದ್ಯದಲ್ಲಿ ಭಾರತ ಗೆದ್ದಾಗ, ಲಾರ್ಡ್ಸ್ ಮೈದಾನದ ಬಾಲ್ಕನಿಯಲ್ಲಿ ಸೌರವ್ ಗಂಗೂಲಿ ಅವರು ಶರ್ಟ್ ಬಿಚ್ಚಿ ಸಂಭ್ರಮಿಸಿದ್ದರು. ಈ ಐತಿಹಾಸಿಕ ದೃಶ್ಯ ಹಾಗೂ ತಮ್ಮ ನಾಯಕತ್ವದ ಉಲ್ಲೇಖಗಳನ್ನು ದೂಸ್ರಾ ಚಲನಚಿತ್ರದಲ್ಲಿ ಅನುಮತಿಯಿಲ್ಲದೆ ವಾಣಿಜ್ಯ ಉದ್ದೇಶಕ್ಕೆ ಬಳಸಿಕೊಳ್ಳಲಾಗಿದೆ ಎಂದು ಗಂಗೂಲಿ ವಾದಿಸಿದ್ದಾರೆ. ಇದರೊಂದಿಗೆ, ಪ್ರೊಡಕ್ಷನ್ ಹೌಸ್ ಲವ್ ಫಿಲ್ಮ್ಸ್ ಜೊತೆ ಗಂಗೂಲಿ ಈಗಾಗಲೇ ತಮ್ಮ ಅಧಿಕೃತ ಬಯೋಪಿಕ್ ದಾದಾ - ದಿ ಸೌರವ್ ಗಂಗೂಲಿ ಸ್ಟೋರಿ ನಿರ್ಮಾಣಕ್ಕೆ ಪ್ರತ್ಯೇಕ ಒಪ್ಪಂದ ಮಾಡಿಕೊಂಡಿದ್ದಾರೆ. ಹೀಗಾಗಿ, ದೂಸ್ರಾ ಚಿತ್ರದ ಟ್ರೈಲರ್‌ನಲ್ಲಿ ಗಂಗೂಲಿ ಅವರ ದೃಶ್ಯಗಳನ್ನು ವ್ಯಾಪಕವಾಗಿ ಬಳಸಿರುವುದರಿಂದ ಸಾರ್ವಜನಿಕರಲ್ಲಿ ಗೊಂದಲ ಮೂಡಬಹುದು ಮತ್ತು ಇದು ತಮ್ಮ ವಾಣಿಜ್ಯ ಹಕ್ಕುಗಳ ಉಲ್ಲಂಘನೆ ಎಂದು ಅವರು ಕೋರ್ಟ್ ಮೆಟ್ಟಿಲೇರಿದ್ದರು.
ಮುಂದುವರೆದು, ದೂಸ್ರಾ ಚಿತ್ರದ ನಿರ್ಮಾಪಕರು ಮತ್ತು ನಿರ್ದೇಶಕ ಅಭಿನಯ್ ದಿಯೋ ಅವರು, ಇದು ಸೌರವ್ ಗಂಗೂಲಿ ಅವರ ಬಯೋಪಿಕ್ ಅಲ್ಲ ಎಂದು ಸ್ಪಷ್ಟಪಡಿಸಿದ್ದು, ಇದು ರಾಜಸ್ಥಾನದ ಮಧ್ಯಮ ವರ್ಗದ ತಾರಾ ಎಂಬ ಹೆಣ್ಣುಮಗಳ ಕಥೆಯಾಗಿದ್ದು, ಆಕೆ ಸೌರವ್ ಗಂಗೂಲಿ ಅವರ ಲಾರ್ಡ್ಸ್ ಆಚರಣೆಯನ್ನು ಟಿವಿಯಲ್ಲಿ ನೋಡಿ ತನ್ನ ವೈಯಕ್ತಿಕ ಸ್ವಾತಂತ್ರ್ಯ ಮತ್ತು ಹಕ್ಕುಗಳಿಗಾಗಿ ಹೋರಾಡಲು ಪ್ರೇರಣೆ ಪಡೆಯುತ್ತಾಳೆ ಎಂದು ತಿಳಿಸಿದೆ. ಇದರೊಂದಿಗೆ, ಚಿತ್ರದಲ್ಲಿ ಬಳಸಲಾದ ಕ್ರಿಕೆಟ್ ಪಂದ್ಯದ ಹಳೆಯ ದೃಶ್ಯಾವಳಿಗಳಿಗೆ ಭಾರತೀಯ ಕ್ರಿಕೆಟ್ ನಿಯಂತ್ರಣ ಮಂಡಳಿಯಿಂದ ಸೂಕ್ತ ಲೈಸೆನ್ಸ್ ಮತ್ತು ಅನುಮತಿ ಪಡೆಯಲಾಗಿದೆ ಎಂದು ಚಿತ್ರತಂಡ ಕೋರ್ಟ್‌ಗೆ ತಿಳಿಸಿದೆ.
ಇನ್ನು ಪ್ರಕರಣದ ವಿಚಾರಣೆ ನಡೆಸಿದ, ನ್ಯಾಯಮೂರ್ತಿ ದಿನೇಶ್ ಭಟ್ ಅವರ ನೇತೃತ್ವದ ರಜಾಕಾಲದ ಪೀಠವು, ಚಿತ್ರ ಬಿಡುಗಡೆಗೆ ಎಲ್ಲಾ ಸಿದ್ಧತೆಗಳು ನಡೆದಿರುವುದರಿಂದ ಸಮತೋಲನದ ಅನುಕೂಲತೆ ಚಿತ್ರತಂಡದ ಪರವಾಗಿದೆ ಎಂದು ಅಭಿಪ್ರಾಯಪಟ್ಟು ತಡೆಯಾಜ್ಞೆ ನೀಡಲು ನಿರಾಕರಿಸಿತು. ಈ ಮೂಲಕ "ನಾನು ಯಾವುದೇ ತಡೆ ನೀಡಿಲ್ಲ, ಸಿನಿಮಾ ಬಿಡುಗಡೆ ಮುಂದುವರಿಯಬಹುದು" ಎಂದು ಕೋರ್ಟ್ ಸ್ಪಷ್ಟಪಡಿಸಿದೆ. ಏತನ್ಮಧ್ಯೆ, ಚಿತ್ರದ ಬಿಡುಗಡೆಗೆ ಕೋರ್ಟ್ ತಡೆ ನೀಡದಿದ್ದರೂ, ಗಂಗೂಲಿ ಅವರ ವ್ಯಕ್ತಿತ್ವದ ಹಕ್ಕುಗಳ ಕುರಿತಾದ ಮುಖ್ಯ ಪ್ರಕರಣದ ಕಾನೂನು ವಿಚಾರಣೆಯನ್ನು ಮುಂದುವರಿಸುವುದಾಗಿ ತಿಳಿಸಿದೆ.