ಮುಂಬಯಿ: ಬಾಲಿವುಡ್ ನ ಆದರ್ಶ ದಂಪತಿ ಎಂದೇ ಖ್ಯಾತರಾಗಿದ್ದ ಮಲೈಕಾ ಅರೋರಾ ಮತ್ತು ಅರ್ಬಾಜ್ ಖಾನ್ ತಮ್ಮ 17 ವರ್ಷಗಳ ದಾಂಪತ್ಯಕ್ಕೆ ಎಳ್ಳುನೀರು ಬಿಡಲು ನಿರ್ಧರಿಸಿದ್ದಾರೆ.

ಕೆಲ ತಿಂಗಳ ಹಿಂದೆ ಅರ್ಬಾಜ್ ಖಾನ್ ಮನೆ ಬಿಟ್ಟು ಹೊರ ಬಂದಿದ್ದ ಮಲೈಕಾ ಅರೋರಾ ತಾವಿಬ್ಬರು ಪ್ರತ್ಯೇಕವಾಗುತ್ತಿರುವುದಾಗಿ ತಿಳಿಸಿದ್ದರು. ಬಾಂದ್ರಾದ ಕೌಟುಂಬಿಕ ನ್ಯಾಯಾಲಯದಲ್ಲಿ ವಿಚ್ಛೇದನಕ್ಕಾಗಿ ಅರ್ಜಿ ಸಲ್ಲಿಸಿದ್ದರು. ಇಬ್ಬರು ಪರಸ್ಪರ ಒಪ್ಪಿಗೆ ಮೇರೆಗೆ ಡಿವೋರ್ಸ್ ಗಾಗಿ ಅರ್ಜಿ ಸಲ್ಲಿಸಿರುವುದಾಗಿ ಹೇಳಿದ್ದರು. ನ್ಯಾಯಾಲಯದ ಆದೇಶದಂತೆ ಆರು ತಿಂಗಳ ಗಡುವಿನಲ್ಲಿ ವಿಚ್ಛೇದನದ ಬಗ್ಗೆ ಮರು ಚಿಂತಿಸುವಂತೆ ನ್ಯಾಯಾಲಯ ತಿಳಿಸಿತ್ತು. ಆದರಂತೆ ಆರು ತಿಂಗಳ ನಂತರ ಇಂದು ಮತ್ತೆ ಕೌಟುಂಬಿಕ ನ್ಯಾಯಾಲಯಕ್ಕೆ ಇಬ್ಬರು ಕೌನ್ಸಿಲಿಂಗ್ ಗೆ ಹಾಜರಾಗಿದ್ದಾರೆ.

ಅರ್ಜುನ್ ಕಪೂರ್ ಜೊತೆಗಿನ ಸ್ನೇಹ ಇಬ್ಬರ ನಡುವಿನ ಬಿರುಕಿಗೆ ಕಾರಣ ಎಂದು ಮಾಧ್ಯಮಗಳಲ್ಲಿ ವರದಿಯಾಗಿತ್ತು. ಸದಾ ತನ್ನ ಸಹೋದರ ಸಲ್ಮಾನ್ ಖಾನ್ ನೆರಳಿನಲ್ಲೇ ಅರ್ಬಾಜ್ ಖಾನ್ ಜೀವನ ಮಾಡುತ್ತಿರುವುದು ಆಕೆಗೆ ಇಷ್ಟವಿರಲಿಲ್ಲ, ಹೀಗಾಗಿ ಸ್ವತಂತ್ರ್ಯವಾಗಿ ಬದುಕಲು ಬಯಸುತ್ತಿದ್ದಳು ಎಂದು ಹೇಳಲಾಗುತ್ತಿದೆ. ಅರ್ಬಾಜ್ ಖಾನ್ ಮತ್ತು ಮಲೈಕಾ ಅರೋರಾ ದಂಪತಿಗೆ 14 ವರ್ಷದ ಆರ್ಹಾನ್ ಎಂಬ ಮಗನಿದ್ದಾನೆ.