ಹೈದರಾಬಾದ್: ಬರೊಬ್ಬರಿ 3 ವರ್ಷಗಳು ಒಂದೇ ಚಿತ್ರಕ್ಕಾಗಿ ತಮ್ಮನ್ನು ತಾವು ಮೀಸಲಿಟ್ಟುಕೊಂಡಿದ್ದ ಬಾಹುಬಲಿ ನಟ ಪ್ರಭಾಸ್ ಗೆ ನಿರ್ದೇಶಕ ಎಸ್ ಎಸ್ ರಾಜಮೌಳಿ ವಿಶೇಷ ಉಡುಗೊರೆ ನೀಡಲು ಮುಂದಾಗಿದ್ದಾರೆ.

ಇದೇ ಏಪ್ರಿಲ್ 28ರಂದು ಬಾಹುಬಲಿ 2 ಚಿತ್ರ ವಿಶ್ವಾದ್ಯಂತ ಏಕಕಾಲಕ್ಕೆ ತೆರೆ ಕಾಣುತ್ತಿದ್ದು, ಇದಕ್ಕೂ ಮೊದಲೇ ರಾಜಮೌಳಿ ನಟ ಪ್ರಭಾಸ್ ಗೆ ಉಡುಗೊರೆ ನೀಡಲಿದ್ದಾರೆ ಎಂದು ತಿಳಿದುಬಂದಿದೆ. ಖಾಸಗಿ ದೈನಿಕವೊಂದು ವರದಿ  ಮಾಡಿರುವಂತೆ ಬಾಹುಬಲಿ ಚಿತ್ರದಲ್ಲಿ ಪ್ರಭಾಸ್ ಬಳಕೆ ಮಾಡಿರುವ ಅಷ್ಟೂ ಯುದ್ಧೋಪಕರಣಗಳನ್ನು ಅವರಿಗೇ ಉಡುಗೊರೆಯಾಗಿ ನೀಡಲು ರಾಜಮೌಳಿ ಮುಂದಾಗಿದ್ದಾರೆ ಎಂದು ವರದಿ ಮಾಡಲಾಗಿದೆ.

ಬಾಹುಬಲಿ ಮತ್ತು ಬಾಹುಬಲಿ 2 ಚಿತ್ರದಲ್ಲಿ ನಟ ಪ್ರಭಾಸ್ ದ್ವಿಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದು, ವಿವಿಧ ಯುದ್ಧೋಪಕರಣಗಳನ್ನು ಬಳಕೆ ಮಾಡಿದ್ದಾರೆ. ಆ ಎಲ್ಲ ಯುದ್ಧೋಪಕರಣಗಳನ್ನೂ ನಟ ಪ್ರಭಾಸ್ ಗೆ ಉಡುಗೊರೆಯಾಗಿ ನೀಡಲು  ರಾಜಮೌಳಿ ಮುಂದಾಗಿದ್ದಾರೆ. ಪ್ರಮುಖವಾಗಿ ಬಾಹುಬಲಿ ಪಾತ್ರದಲ್ಲಿ ಪ್ರಭಾಸ್ ಕೈಯಲ್ಲಿದ್ದ ಕುದುರೆ ಮುಖದ ಖಡ್ಗ ಹಾಗೂ ಟ್ರೈಲರ್ ನಲ್ಲಿ ಕಾಣಿಸುವ ಕೊಡಲಿಯನ್ನು ಪ್ರಭಾಸ್ ರಾಜಮೌಳಿ ಅವರಿಂದ ಉಡುಗೊರೆಯಾಗಿ  ಪಡೆಯಲಿದ್ದಾರಂತೆ.