ಬೆಂಗಳೂರು: ಖ್ಯಾತ ಕಲಾ ನಿರ್ದೇಶಕ ಮತ್ತು ನಟ ಅರುಣ್ ಸಾಗರ್ ಅವರ ಪುತ್ರಿ ಅದಿತಿ ಸಾಗರ್ ಗಾಯಕಿಯಾಗಿ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡುತ್ತಿದ್ದಾರೆ.

ಖ್ಯಾತ ನಟ ಶರಣ್ ಅಭಿನಯದ ರ್ಯಾಂಬೋ-2 ಚಿತ್ರದ ಮೂಲಕ ಅದಿತಿ ಸಾಗರ್ ಗಾಯಕಿಯಾಗಿ ಕನ್ನಡ ಚಿತ್ರರಂಗಕ್ಕೆ ಪದಾರ್ಪಣೆ ಮಾಡುತ್ತಿದ್ದು, ಸಾಹಿತಿ ಮುತ್ತು ಅವರು ಬರೆದಿರುವ ಧಮ್ ಮಾರೋ ಧಮ್ ಹಾಡಿಗೆ ಹಿನ್ನಲೆ  ಗಾಯನ ನೀಡಲಿದ್ದಾರೆ. 14 ವರ್ಷದ ಅದಿತಿ ಸಾಗರ್ ಪ್ರಸ್ತುತ 9ನೇ ತರಗತಿ ವಿದ್ಯಾಭ್ಯಾಸ ಮಾಡುತ್ತಿದ್ದು, ಸಂಗೀತ ಅಭ್ಯಾಸ ಮಾಡುತ್ತಿರುವ ಈಕೆ ರ್ಯಾಂಬೋ-2 ಚಿತ್ರದ ಮೂಲಕ ಸ್ಯಾಂಡಲ್ ವುಡ್ ಗೆ ಪರಿಚಿತರಾಗಲಿದ್ದಾರೆ.

ನಿರ್ದೇಶಕ ತರುಣ್ ಸುಧೀರ್ ಅವರು ಅದಿತಿ ಸಾಗರ್ ಅವರ ಕಲೆಯನ್ನು ನೆಚ್ಚಿಕೊಂಡಿದ್ದು, ಇವರ ಶಿಫಾರಸ್ಸಿನ ಮೇರೆಗೆ ಸಂಗೀತ ನಿರ್ದೇಶಕ ಅರ್ಜುನ್ ಜನ್ಯ ಅದಿತಿ ಸಾಗರ್ ಅವರಿಂದಲೇ ಧಮ್ ಮಾರೋ ಧಮ್ ಹಾಡನ್ನು  ಹಾಡಿಸಿದ್ದಾರಂತೆ. 

ಈ ಬಗ್ಗೆ ಮಾತನಾಡಿರುವ ನಿರ್ದೇಶಕ ತರುಣ್ ಸುಧೀರ್, ಅದಿತಿ ಬಗ್ಗೆ ನನಗೆ ಮೊದಲೇ ತಿಳಿದಿತ್ತು. ಆಕೆ ಉತ್ತಮ ಹಾಡುಗಾರ್ತಿ. ಅಕೆಯ ಪೋಷಕರೂ ಕೂಡ ಕಲಾವಿದರಾಗಿದ್ದು, ತಂದೆ ಅರುಣ್ ಸಾಗರ್ ನಮಗೆಲ್ಲರಿಗೂ  ಚಿರಪರಿಚತರು. ಅದಿತಿ ಹಾಡಿರುವ ಒಂದಷ್ಟು ಹಾಡುಗಳನ್ನು ನಾನು ಕೇಳಿದ್ದೇನೆ. ಹೀಗಾಗಿ ಈ ಚಿತ್ರಕ್ಕೂ ಅದಿತಿ ಗಾಯನ ಮಾಡಲಿ ಎಂದು ನಿರ್ಧರಿಸಿದೆವು ಎಂದು ಹೇಳಿದ್ದಾರೆ. ಅಂತೆಯೇ ಈ ಹಾಡು ಮತ್ತೊಂದು ಅರ್ಜುನ್ ಜನ್ಯ  ಅವರ ಮತ್ತೊಂದು ಸಿಗ್ನೇಚರ್ ಸಾಂಗ್ ಆಗಲಿದ್ದು, ಈ ಹಾಡು ಎಲ್ಲರಿಗೂ ಇಷ್ಟವಾಗಲಿದೆ ಎಂದೂ ತರುಣ್ ಸುಧೀರ್ ಹೇಳಿದ್ದಾರೆ.