ಲಾಕ್ ಡೌನ್ ಮುಕ್ತಾಯಗೊಂಡ ಬಳಿಕ ನಟ ಶಿವರಾಜ್ ಕುಮಾರ್ ಬಿಡುವಿಲ್ಲದಂತೆ ಶೂಟಿಂಗ್ ನಲ್ಲಿ ತೊಡಗಿದ್ದಾರೆ. 122 ಸಿನಿಮಾಗಳಲ್ಲಿ ಅಭಿನಯಿಸಿರುವ ಶಿವಣ್ಣ, ಭಜರಂಗಿ-2 ಸಿನಿಮಾದ ಬಾಕಿ ಉಳಿದಿದ್ದ ಭಾಗಗಳನ್ನು ಪೂರ್ಣಗೊಳಿಸಿದ್ದು, ಪ್ರಸ್ತುತ ವಿಜಯ್ ಮಿಲ್ಟನ್ ನ ಶಿವಪ್ಪ ಸಿನಿಮಾದಲ್ಲಿ ತೊಡಗಿದ್ದಾರೆ.
2021 ರಲ್ಲಿ ಹರ್ಷ ನಿರ್ದೇಶನದ ಶಿವರಾಜ್ ಕುಮಾರ್ ಅಭಿನಯದ ಸಿನಿಮಾ ಸೆಟ್ಟೇರಲಿದ್ದು ಜನವರಿಯಿಂದ ಚಿತ್ರೀಕರಣ ಪ್ರಾರಂಭಗೊಳ್ಳಲಿದೆ. ಇತ್ತೀಚೆಗಷ್ಟೇ ಸರಳ ಸಮಾರಂಭದಲ್ಲಿ ಸಿನಿಮಗೆ ಮುಹೂರ್ತ ಕೂಡ ನೆರವೇರಿದ್ದು, ಜ.14-15 ರಿಂದ ಚಿತ್ರೀಕರಣ ಪ್ರಾರಂಭಗೊಳ್ಳಲಿದೆ.
ಈ ನಡುವೆ ಶಿವಣ್ಣ ಚಿನ್ನಾಭರಣಗಳ ಜಾಹಿರಾತನ್ನು ಚಿತ್ರೀಕರಣವನ್ನು ಪೂರ್ಣಗೊಳಿಸಿದ್ದಾರೆ. ವಜ್ರಕಾಯ, ಭಜರಂಗಿ, ಭಜರಂಗಿ-2 ಆದನಂತರ ಶಿವಣ್ಣ-ಹರ್ಷ ಜೊತೆಗೂಡಿ ಮಾಡುತ್ತಿರುವ 4 ನೇ ಚಿತ್ರ ಇದಾಗಿರಲಿದ್ದು ಶೀರ್ಷಿಕೆಯನ್ನು ಇನ್ನಷ್ಟೇ ನಿರ್ಧಾರ ಮಾಡಬೇಕಿದೆ.
ಹೊಸ ಸಿನಿಮಾ ವಾಸ್ತವಿಕ ಕಥಾವಸ್ತು ಮತ್ತು ವಿಷಯವನ್ನು ಹೊಂದಿರಲಿದ್ದು, ತಮ್ಮ ಹಿಂದಿನ ಎಲ್ಲಾ ಚಿತ್ರಗಳಿಗಿಂತಲೂ ಇದು ಭಿನ್ನವಾಗಿರಲಿದೆ ಎನ್ನುತ್ತಾರೆ ನಿರ್ದೇಶಕ ಹರ್ಷ. ಈ ಚಿತ್ರ ಶಿವಣ್ಣ ಅವರಿಗೆ 124 ನೇ ಚಿತ್ರವಾಗಿರಲಿದ್ದು, 125 ನೇ ಸಿನಿಮಾ ಭೈರತಿ ರಣಗಲ್ ಆಗಿರಲಿದೆ.