ಬೆಂಗಳೂರು: ಬಿಗ್ ಬಾಸ್ ಕನ್ನಡ ಸೀಸನ್‌ 13ರಲ್ಲಿ ಸ್ಪರ್ಧಿಗಳು ಹದ್ದು ಮೀರಿ ವರ್ತಿಸಿದ್ದಾರೆ. ಅಸಭ್ಯ ಮಾತುಗಳನ್ನಾಡಿದ್ದ ಸ್ಪರ್ಧಿಗಳಿಗೆ ಇಂದು ಕಿಚ್ಚ ಸುದೀಪ್ ತೀವ್ರ ತರಾಟೆಗೆ ತೆಗೆದುಕೊಂಡರು. ಈ ವಾರ ನೀಡಲಾಗಿದ್ದ ರಾಕ್ಷಸರು ಮತ್ತು ಗಂಧರ್ವರು ಟಾಸ್ಕ್ ಅತ್ಯಂತ ಆಕ್ರಮಣಕಾರಿ ಹಾಗೂ ವೈಯಕ್ತಿಕ ದಾಳಿಗಳಿಗೆ ವೇದಿಕೆಯಾಗಿತ್ತು.
ಬಿಗ್ ಬಾಸ್ ರಿಯಾಲಿಟಿ ಶೋ ಸ್ಕ್ರಿಪ್ಟೆಡ್ ಎಂಬ ಪ್ರಶ್ನೆಯಿಂದ ಸುದೀಪ್ ಅವರು ಶೋ ಶುರು ಮಾಡಿದರು. ನಂತರ ಗಗನ್ ಚಿನ್ನಪ್ಪ ಮತ್ತು ತಾಂಡವ್ ನಡುವಿನ ಬಿಗ್ ಬಾಸ್ ಫೇವರಿಸಂ ಮಾಡುತ್ತಿದೆ ಎಂಬ ಹೇಳಿಕೆಗೆ ಸ್ಫಷ್ಟನೆ ಕೊಟ್ಟಿದ್ದು ಬಿಗ್ ಬಾಸ್ಸ್ಕ್ರಿಪ್ಟೆಡ್, ಫೇವರಿಸಂ ಅಲ್ಲ ಎಂಬುದನ್ನು ಸ್ಪರ್ಧಿಗಳ ಬಾಯಿಂದಲೇ ಕಕ್ಕಿಸಿದರು. ನಂತರ ಗಗನ್ ಕುಟುಂಬ ಹಾಗೂ ತಾಯಿ ವಿರುದ್ಧ ಗಾನವಿ ಹಗುರವಾಗಿ ಮಾತನಾಡಿದ್ದಕ್ಕೆ ತೀವ್ರವಾಗಿ ತರಾಟೆಗೆ ತೆಗೆದುಕೊಂಡರು. ಒಂದು ಹಂತದಲ್ಲಿ ಸುದೀಪ್ ಭಾವುಕರಾದರು. ಶೋನಲ್ಲಿ ಗಾನವಿ ಆಡಿದ ಮಾತಿಗೆ ಗಗನ್ ತಾಯಿಗೆ ಸುದೀಪ್ ಕ್ಷಮೆ ಕೇಳಿ ಕಣ್ಣೀರಿಟ್ಟರು.
ನಿಮ್ಮ ಅತಿರೇಕದ ವರ್ತನೆ ಇರಲಿ. ಆದರೆ ನಿಮ್ಮ ನಿಮ್ಮ ಮಧ್ಯೆ ವಾಕ್ಸಮರ ನಡೆಸಿ ಅದನ್ನು ಬಿಟ್ಟು ತಾಯಿ-ಕುಟುಂಬವನ್ನು ಎಳೆದು ತಂದಿರುವ ರೀತಿಗೆ ಕಿಚ್ಚ ಸುದೀಪ್ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದರು. ಆಟದ ರೀತಿ ಬೇರೆ, ಆದರೆ ವೈಯಕ್ತಿಕವಾಗಿ ತಾಯಂದಿರನ್ನು ಹಾಗೂ ಕುಟುಂಬವನ್ನು ಹೀಯಾಳಿಸುವುದು ಎಷ್ಟು ಸರಿ ಎಂದು ಸ್ಪರ್ಧಿಗಳನ್ನು ತರಾಟೆಗೆ ತೆಗೆದುಕೊಂಡರು.