ಸಾಮಾನ್ಯವಾಗಿ ಜನರು ಗಡ್ಡೆ ಮತ್ತು ಕ್ಯಾನ್ಸರ್ ಎಂಬ ಪದಗಳನ್ನು ಒಂದೇ ಅರ್ಥದಲ್ಲಿ ಬಳಸುತ್ತಾರೆ. ಆದ್ದರಿಂದ ಯಾರಿಗಾದರೂ ದೇಹದ ಯಾವುದಾದರೂ ಭಾಗದಲ್ಲಿ “ಗಡ್ಡೆ ಇದೆ” ಅಥವಾ “ಗಡ್ಡೆ ಆಗಿದೆ”ಎಂದು ಕೇಳಿದ ತಕ್ಷಣ ಭಯ ಹುಟ್ಟಿಕೊಳ್ಳುವುದು ಸಹಜ. ಆದರೆ ವೈದ್ಯಕೀಯ ಅರ್ಥದಲ್ಲಿ ಈ ಎರಡೂ ಪದಗಳು ಒಂದೇ ಅಲ್ಲ. ಗಡ್ಡೆ ಮತ್ತು ಕ್ಯಾನ್ಸರ್ ನಡುವಿನ ವ್ಯತ್ಯಾಸವನ್ನು ಸರಿಯಾಗಿ ಅರ್ಥಮಾಡಿಕೊಂಡರೆ ಅನಗತ್ಯ ಆತಂಕ ಕಡಿಮೆಯಾಗುತ್ತದೆ ಮತ್ತು ಇರುವ ಸಮಸ್ಯೆಯ ವೈದ್ಯಕೀಯ ವರದಿಗಳನ್ನು ಸುಲಭವಾಗಿ ಅರ್ಥಮಾಡಿಕೊಳ್ಳಲು ಸಹಾಯವಾಗುತ್ತದೆ.

ಗಡ್ಡೆ ಎಂದರೇನು?

ಗಡ್ಡೆ ಎಂದರೆ ದೇಹದಲ್ಲಿ ಉಂಟಾಗುವ ಅಸಾಮಾನ್ಯ ಕೋಶಗಳ ಬೆಳವಣಿಗೆ. ಸಾಮಾನ್ಯವಾಗಿ ನಮ್ಮ ದೇಹದ ಕೋಶಗಳು ನಿಯಂತ್ರಿತವಾಗಿ ಬೆಳೆಯುತ್ತವೆ, ವಿಭಜನೆಗೊಳ್ಳುತ್ತವೆ ಮತ್ತು ನಂತರ ನಾಶವಾಗುತ್ತವೆ. ಕೆಲವೊಮ್ಮೆ ಈ ನಿಯಂತ್ರಣ ವ್ಯವಸ್ಥೆ ತಪ್ಪಿಹೋದಾಗ ಕೋಶಗಳು ಅಗತ್ಯಕ್ಕಿಂತ ಹೆಚ್ಚು ಬೆಳೆಯಲು ಆರಂಭಿಸುತ್ತವೆ. ಇಂತಹ ಹೆಚ್ಚುವರಿ ಕೋಶಗಳು ಒಂದು ಗುಡ್ಡೆಯಾಗಿ ಅಥವಾ ಗಟ್ಟಿಯಾಗಿ ರೂಪುಗೊಂಡಾಗ ಅದನ್ನು ಗಡ್ಡೆ ಎಂದು ಕರೆಯಲಾಗುತ್ತದೆ.

ಈ ಗಡ್ಡೆಗಳು ಮೆದುಳು, ಸ್ತನ, ಶ್ವಾಸಕೋಶ, ಚರ್ಮ, ಎಲುಬುಗಳು ಮುಂತಾದ ದೇಹದ ವಿವಿಧ ಭಾಗಗಳಲ್ಲಿ ಉಂಟಾಗಬಹುದು. ಮುಖ್ಯವಾಗಿ ತಿಳಿದುಕೊಳ್ಳಬೇಕಾದ ವಿಷಯವೆಂದರೆ ಎಲ್ಲಾ ಗಡ್ಡೆಗಳೂ ಕ್ಯಾನ್ಸರ್ ಅಲ್ಲ.

ಗಡ್ಡೆಗಳ ವಿಧಗಳು

ಗಡ್ಡೆಗಳನ್ನು ಮುಖ್ಯವಾಗಿ ಎರಡು ವಿಧಗಳಾಗಿ ವಿಂಗಡಿಸಲಾಗಿದೆ: ಸೌಮ್ಯ (ಬಿನೈನ್) ಮತ್ತು ಮಾರಕ (ಮ್ಯಾಲಿಗ್ನೆಂಟ್).

ಸೌಮ್ಯ ಗಡ್ಡೆಗಳು ಕ್ಯಾನ್ಸರ್ ಅಲ್ಲ. ಇವು ಸಾಮಾನ್ಯವಾಗಿ ನಿಧಾನವಾಗಿ ಬೆಳೆಯುತ್ತವೆ ಮತ್ತು ಒಂದೇ ಸ್ಥಳಕ್ಕೆ ಸೀಮಿತವಾಗಿರುತ್ತವೆ. ಇವು ಪಕ್ಕದ ಅಂಗಾಂಗಗಳಿಗೆ ಹರಡುವುದಿಲ್ಲ ಅಥವಾ ದೇಹದ ಬೇರೆ ಭಾಗಗಳಿಗೆ ವಿಸ್ತರಿಸುವುದಿಲ್ಲ.

ಗರ್ಭಾಶಯದ ಫೈಬ್ರಾಯ್ಡ್ಗಳು, ಚರ್ಮದ ಕೆಳಗಿನ ಕೊಬ್ಬಿನ ಗುಡ್ಡೆಗಳು (ಲಿಪೋಮಾ), ಮತ್ತು ಕೆಲವು ಮೆದುಳಿನ ಗಡ್ಡೆಗಳು ಸೌಮ್ಯವಾಗಿರುತ್ತವೆ. ಸಾಮಾನ್ಯವಾಗಿ ಇವು ಜೀವಕ್ಕೆ ಅಪಾಯಕಾರಿಯಾಗುವುದಿಲ್ಲ. ಆದರೆ ಇವು ನರಗಳು, ರಕ್ತನಾಳಗಳು ಅಥವಾ ಮುಖ್ಯ ಅಂಗಾಂಗಗಳ ಮೇಲೆ ಒತ್ತಡ ಹಾಕಿದರೆ ಚಿಕಿತ್ಸೆ ಅಥವಾ ಶಸ್ತ್ರಚಿಕಿತ್ಸೆ ಅಗತ್ಯವಾಗಬಹುದು.

ಕ್ಯಾನ್ಸರ್ ಎಂದರೇನು?

ಮಾರಕ ಗಡ್ಡೆಯೇ ಕ್ಯಾನ್ಸರ್. ಕ್ಯಾನ್ಸರ್‌ನಲ್ಲಿ ಅಸಾಮಾನ್ಯ ಕೋಶಗಳು ನಿಯಂತ್ರಣವಿಲ್ಲದೆ ಬೆಳೆಯುತ್ತವೆ, ಪಕ್ಕದ ಅಂಗಾಂಗಗಳಿಗೆ ನುಗ್ಗುತ್ತವೆ ಮತ್ತು ದೇಹದ ಬೇರೆ ಭಾಗಗಳಿಗೆ ಹರಡಬಹುದು. ಈ ಹರಡುವಿಕೆಯನ್ನು ಮೆಟಾಸ್ಟಾಸಿಸ್ ಎಂದು ಕರೆಯಲಾಗುತ್ತದೆ. ಉದಾಹರಣೆಗೆ ಸ್ತನದಲ್ಲಿ ಆರಂಭವಾದ ಕ್ಯಾನ್ಸರ್ ಎಲುಬು, ಯಕೃತ್ತು ಅಥವಾ ಶ್ವಾಸಕೋಶಗಳಿಗೆ ಹರಡಬಹುದು. ಕ್ಯಾನ್ಸರ್ ಹರಡಿದ ನಂತರ ಚಿಕಿತ್ಸೆ ಕಷ್ಟವಾಗುತ್ತದೆ.

ಗಡ್ಡೆ ಮತ್ತು ಕ್ಯಾನ್ಸರಿಗೆ ಇರುವ ಮುಖ್ಯ ವ್ಯತ್ಯಾಸಗಳು

ಸೌಮ್ಯ ಗಡ್ಡೆಗಳು ಸಾಮಾನ್ಯವಾಗಿ ಸ್ಪಷ್ಟ ಗಡಿಗಳೊಂದಿಗೆ ಇರುತ್ತವೆ ಮತ್ತು ಶಸ್ತ್ರಚಿಕಿತ್ಸೆಯಿಂದ ಸುಲಭವಾಗಿ ತೆಗೆದುಹಾಕಬಹುದು. ಕ್ಯಾನ್ಸರ್ ಗಡ್ಡೆಗಳು ಅಸಮ ಗಡಿಗಳನ್ನು ಹೊಂದಿದ್ದು ಪಕ್ಕದ ಅಂಗಕ್ಕೂ ಬೆಳೆಯುತ್ತವೆ. ಸೂಕ್ಷ್ಮದರ್ಶಕದಲ್ಲಿ ನೋಡಿದಾಗ ಕ್ಯಾನ್ಸರ್ ಕೋಶಗಳು ಅಸಾಮಾನ್ಯವಾಗಿ ಕಾಣುತ್ತವೆ.

ಜೀವಕ್ಕೆ ಇರುವ ಅಪಾಯ

ಸೌಮ್ಯ ಗಡ್ಡೆಗಳು ಜೀವಕ್ಕೆ ಅಪಾಯಕಾರಿಯಾಗುವುದು ಅಪರೂಪ. ಆದರೆ ಕ್ಯಾನ್ಸರ್ ಸಮಯಕ್ಕೆ ಪತ್ತೆಯಾಗದೆ ಚಿಕಿತ್ಸೆ ದೊರಕದಿದ್ದರೆ ಜೀವಕ್ಕೆ ಅಪಾಯ ಉಂಟಾಗಬಹುದು. ಆದ್ದರಿಂದಲೇ ವೈದ್ಯರು ಆರಂಭಿಕ ಪತ್ತೆ ಮತ್ತು ಸಮಯೋಚಿತ ಚಿಕಿತ್ಸೆಗೆ ಹೆಚ್ಚು ಒತ್ತು ನೀಡುತ್ತಾರೆ.

ಎಲ್ಲಾ ಕ್ಯಾನ್ಸರ್‌ಗಳು ಗಡ್ಡೆಯೇ?

ಇಲ್ಲ. ಕೆಲವು ಕ್ಯಾನ್ಸರ್‌ಗಳು, ಉದಾಹರಣೆಗೆ ಲ್ಯೂಕೇಮಿಯಾ ಮುಂತಾದ ರಕ್ತ ಕ್ಯಾನ್ಸರ್‌ಗಳು, ಗಡ್ಡೆಯಾಗಿ ಕಾಣಿಸುವುದಿಲ್ಲ. ಅವು ರಕ್ತ ಮತ್ತು ಎಲುಬು ಮಜ್ಜೆಯನ್ನು ಪ್ರಭಾವಿತಗೊಳಿಸುತ್ತವೆ.

ರೋಗನಿರ್ಣಯ ಮತ್ತು ಚಿಕಿತ್ಸೆ

ಇತ್ತೀಚಿನ ದಿನಗಳಲ್ಲಿ ಆರೋಗ್ಯ ಜಾಗೃತಿ ಹೆಚ್ಚುತ್ತಿರುವುದರಿಂದ, ಜನರು ಯಾವುದೇ ಅಸಾಮಾನ್ಯ ಲಕ್ಷಣಗಳನ್ನು ತಡಮಾಡದೆ ಗಮನಿಸುವುದು ಬಹಳ ಮುಖ್ಯವಾಗಿದೆ. ದೇಹದಲ್ಲಿ ಕಾಣಿಸುವ ಗಡ್ಡೆ, ನಿರಂತರ ನೋವು, ಅಸಹಜ ಊತ ಅಥವಾ ತೂಕ ಇಳಿಕೆಯಂತಹ ಲಕ್ಷಣಗಳನ್ನು ನಿರ್ಲಕ್ಷಿಸದೆ ವೈದ್ಯಕೀಯ ಸಲಹೆ ಪಡೆಯುವುದರಿಂದ ಗಂಭೀರ ಸಮಸ್ಯೆಗಳನ್ನು ಆರಂಭದಲ್ಲೇ ಗುರುತಿಸಬಹುದು. ಸಮಯಕ್ಕೆ ಸರಿಯಾದ ಮಾಹಿತಿ ಮತ್ತು ತಪಾಸಣೆ ಜೀವ ರಕ್ಷಣೆಗೆ ಕಾರಣವಾಗಬಹುದು. ಹೀಗೆ ಅಸಾಮಾನ್ಯ ಗಡ್ಡೆ ಕಂಡುಬಂದರೆ ತಡಮಾಡದೇ ವೈದ್ಯರನ್ನು ಕಾಣಬೇಕು.

ಗಡ್ಡೆ ಸೌಮ್ಯವೋ ಅಥವಾ ಕ್ಯಾನ್ಸರೋ ಎಂಬುದನ್ನು ತಿಳಿಯಲು ಎಕ್ಸ್-ರೇ, ಸಿಟಿ ಸ್ಕ್ಯಾನ್, ಎಂಆರ್‌ಐ ಮತ್ತು ಬಯೋಪ್ಸಿ ಪರೀಕ್ಷೆಗಳನ್ನು ಮಾಡಲಾಗುತ್ತದೆ. ಈ ಮಾಹಿತಿಯ ಆಧಾರದ ಮೇಲೆ ಶಸ್ತ್ರಚಿಕಿತ್ಸೆ, ಔಷಧೋಪಚಾರ, ಕಿರಣ ಚಿಕಿತ್ಸೆ ಅಥವಾ ಇವುಗಳ ಸಂಯೋಜಿತ ಚಿಕಿತ್ಸೆ ನೀಡಲಾಗುತ್ತದೆ.

ಸಾರಾಂಶ

ಗಡ್ಡೆ ಎಂದರೆ ದೇಹದಲ್ಲಿ ಉಂಟಾಗುವ ಅಸಾಮಾನ್ಯ ಕೋಶಗಳ ಬೆಳವಣಿಗೆ. ಎಲ್ಲ ಗಡ್ಡೆಗಳೂ ಕ್ಯಾನ್ಸರ್ ಅಲ್ಲ. ಆದರೆ ಕ್ಯಾನ್ಸರ್ ಎಂದರೆ ನಿಯಂತ್ರಣವಿಲ್ಲದೆ ಬೆಳೆಯುವ, ಪಕ್ಕದ ಅಂಗಾಂಗಗಳಿಗೆ ಮತ್ತು ದೇಹದ ಇತರ ಭಾಗಗಳಿಗೆ ಹರಡುವ ಅಪಾಯಕಾರಿಯಾದ ಸ್ಥಿತಿ. ಈ ವ್ಯತ್ಯಾಸವನ್ನು ತಿಳಿದುಕೊಂಡರೆ ಅನಗತ್ಯ ಭಯ ಕಡಿಮೆಯಾಗುತ್ತದೆ ಮತ್ತು ಲಕ್ಷಣಗಳು ಕಂಡಾಗ ತಡಮಾಡದೆ ವೈದ್ಯರನ್ನು ಸಂಪರ್ಕಿಸುವ ಜಾಗೃತಿ ಮೂಡುತ್ತದೆ. ಇಂದಿನ ವೈದ್ಯಕೀಯ ಪ್ರಗತಿಯಿಂದ ಅನೇಕ ಗಡ್ಡೆಗಳು ಮತ್ತು ಕ್ಯಾನ್ಸರ್‌ಗಳನ್ನು ಪರಿಣಾಮಕಾರಿಯಾಗಿ ನಿಯಂತ್ರಿಸಲು ಸಾಧ್ಯವಾಗಿದ್ದು, ರೋಗಿಗಳು ಹಾಗೂ ಕುಟುಂಬಗಳಿಗೆ ಭರವಸೆಯನ್ನು ನೀಡುತ್ತದೆ.