ನವದೆಹಲಿ: 500-1000 ಮುಖಬೆಲೆಯ ನೋಟುಗಳನ್ನು ನಿಷೇಧಿಸುವ ಮೂಲಕ ಭ್ರಷ್ಟಾಚಾರ, ಕಪ್ಪುಹಣ ಹಾಗೂ ನಕಲಿ ನೋಟುಗಳ ಹಾವಳಿಯನ್ನು ತಡೆಗಟ್ಟುವ ನಿಟ್ಟಿನಲ್ಲಿ ದಿಟ್ಟ ಹೆಜ್ಜೆ ಇಟ್ಟಿರುವ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಬೆಂಬಲಿಸಿದ್ದ ಟೀಂ ಇಂಡಿಯಾ ಕೋಚ್ ಅನಿಲ್ ಕುಂಬ್ಳೆ ಅವರನ್ನು ಮೋದಿ ಹೊಗಳಿದ್ದಾರೆ. 

ಅನಿಲ್ ಕುಂಬ್ಳೆ ತಮ್ಮ ಟ್ವೀಟರ್ ನಲ್ಲಿ ನಮ್ಮ ಗೌರವಾನ್ವಿತ ಪ್ರಧಾನಿ ನರೇಂದ್ರ ಮೋದಿ ಅವರು ಇಂದು ಭರ್ಜರಿ ಗೂಗ್ಲಿ ಎಸೆದಿದ್ದಾರೆ. ವೆಲ್ ಡನ್ ಸರ್ ಎಂದು ಬರೆದಿದ್ದರು. ಇದಕ್ಕೆ ಪ್ರತಿಯಾಗಿ ಮೋದಿ ಸಹ ಕುಂಬ್ಳೆ ಬೌಲಿಂಗ್ ಗಿಂತ ಇದು ಅಚ್ಚರಿಯಲ್ಲ. ಇಡೀ ಭಾರತವೇ ಮೆಚ್ಚುವಂಥ ಕ್ರಿಕೆಟಿಗನಿಂದ ಈ ಟ್ವೀಟ್ ಬಂದಿದೆ. ಆದರೆ ಅವರ ಬೌಲಿಂಗ್ ಹಲವು ಬ್ಯಾಟ್ಸ್ ಮನ್ ಗಳನ್ನು ಅಚ್ಚರಿಗೆ ತಳ್ಳಿತ್ತು ಎಂದು ಪ್ರತಿಕ್ರಿಯಿಸಿದ್ದಾರೆ. 

ಕಾಳಧನದ ವಿರುದ್ಧ ದಿಟ್ಟ ನಿರ್ಧಾರ ತೆಗೆದುಕೊಂಡಿರುವ ಪ್ರಧಾನಿ ನರೇಂದ್ರ ಮೋದಿ ಅವರು ಮಂಗಳವಾರ ರಾತ್ರಿ 8 ಗಂಟೆ ಸುಮಾರಿಗೆ ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಿದರು. ಈ ವೇಳೆ ಭ್ರಷ್ಟಾಚಾರ, ಕಪ್ಪುಹಣ ಹಾಗೂ ನಕಲಿ ನೋಟುಗಳ ಹಾವಳಿಯನ್ನು ತಡೆಗಟ್ಟುವ ಸಲುವಾಗಿ 500-1000 ರುಪಾಯಿ ಮುಖಬೆಲೆಯ ನೋಟುಗಳನ್ನು ಇಂದಿನ ಮಧ್ಯರಾತ್ರಿಯಿಂದಲೇ ಚಲಾವಣೆ ಬಂದ್ ಆಗಲಿದೆ ಎಂದು ಹೇಳಿದ್ದರು.