ಮೊಹಾಲಿ: ಭಾರತದ ವಿರುದ್ಧ ಮೊಹಾಲಿಯಲ್ಲಿ ನಡೆಯುತ್ತಿರುವ ಮೂರನೇ ಟೆಸ್ಟ್ ಪಂದ್ಯದಲ್ಲಿ ಇಂಗ್ಲೆಂಡ್ ತಂಡ ತನ್ನ ಎರಡನೇ ಇನ್ನಿಂಗ್ಸ್ ನಲ್ಲಿ ಕೇವಲ 236ರನ್ ಗಳಿಗೆ ಆಲ್ ಔಟ್ ಆಗಿದ್ದು, ಕೊಹ್ಲಿ ಪಡೆಗೆ ಗೆಲ್ಲಲು 103 ರನ್ ಗಳ  ಸಾಧಾರಣ ಗುರಿ ನೀಡಿದೆ.

ನಿನ್ನೆ 4 ವಿಕೆಟ್ ಕಳೆದುಕೊಂಡು 78 ರನ್ ಕಲೆಹಾಕಿದ್ದ ಇಂಗ್ಲೆಂಡ್ ತಂಡ ಇಂದು ಕೇವಲ 158 ರನ್ ಗಳನ್ನು ಪೇರಿಸುವಷ್ಟರಲ್ಲಿ ತನ್ನ ಆರು ವಿಕೆಟ್ ಕಳೆದುಕೊಂಡಿತು. ಭಾರತದ ಮಾರಕ ಬೌಲಿಂಗ್ ಗೆ ಕಂಗಾಲಾದ ಇಂಗ್ಲೆಂಡ್  ಬ್ಯಾಟ್ಸಮನ್ ಪೆವಿಲಿಯನ್ ಪರೇಡ್ ನಡೆಸುವುದರೊಂದಿಗೆ ಕೇವಲ 236 ರನ್ ಗಳಿಗೆ ಆಲ್ ಔಟ್ ಆಗಿದ್ದಾರೆ. ಆ ಮೂಲಕ ಭಾರತಕ್ಕೆ ಗೆಲ್ಲಲು 103 ರನ್ ಗಳ ಗುರಿ ನೀಡಿದ್ದಾರೆ. ಇನ್ನೂ ಒಂದೂವರೆ ದಿನದ ಆಟ ಬಾಕಿ ಇದ್ದು, ಇಂಗ್ಲೆಂಡ್  ನೀಡಿರುವ 103 ರನ್ ಗಳ ಸಾಧಾರಣ ಗುರಿಯನ್ನು ಭಾರತ ಇಂದೇ ಯಶಸ್ವಿಯಾಗಿ ಬೆನ್ನತ್ತುವ ಸಾಧ್ಯತೆ ಇದೆ.

ಇನ್ನು ಬೌಲಿಂಗ್ ನಲ್ಲಿ ಭಾರತ ತಂಡದ ಪರ ಆರ್ ಅಶ್ವಿನ್ 3 ವಿಕೆಟ್ ಪಡೆದು ಯಶಸ್ವಿ ಬೌಲರ್ ಎನಿಸಿದರೆ, ಮಹಮದ್ ಶಮಿ, ಜಡೇಜಾ ಮತ್ತು ಯಾದವ್ ತಲಾ 2 ವಿಕೆಟ್ ಗಳಿಸಿದರು. ಇಂಗ್ಲೆಂಡ್ ಪರ ಜೋ ರೂಟ್ 78 ರನ್ ಹಾಗೂ  ಹಮೀದ್ ಅಜೇಯ 59 ರನ್ ಗಳಿಸಿದರು. ಇತ್ತೀಚಿನ ವರದಿಗಳು ಬಂದಾಗ ಭಾರತ ತಂಡ ಯಾವುದೇ ವಿಕೆಟ್ ನಷ್ಟವಿಲ್ಲದೇ 7 ರನ್ ಗಳಿಸಿದೆ. ಮುರಳಿ ವಿಜಯ್ ಹಾಗೂ ಪಾರ್ಥೀವ್ ಪಟೇಲ್ ಆರಂಭಿಕರಾಗಿ ಕಣಕ್ಕಿಳಿದಿದ್ದಾರೆ.