ಬೆಂಗಳೂರು: ಆಫ್ಘಾನಿಸ್ತಾನ ವಿರುದ್ಧದ ಐತಿಹಾಸಿಕ ಏಕೈಕ ಟೆಸ್ಟ್ ಪಂದ್ಯದಲ್ಲಿ ಟೀಂ ಇಂಡಿಯಾದ ಆರಂಭಿಕ ಆಟಗಾರ ಶಿಖರ್ ಧವನ್ ದಾಖಲೆಯ ಶತಕ ಸಿಡಿಸಿದ್ದಾರೆ. 

ಆಫ್ಘಾನಿಸ್ತಾನ ಡಿಆರ್‌ಎಸ್ ತೆಗೆದುಕೊಳ್ಳದೆ ಎಡವಿದ್ದೆ ಶಿಖರ್ ಧವನ್ ದಾಖಲೆಯ ಶತಕ ಸಿಡಿಸಲು ಕಾರಣವಾಗಿದೆ. ಹೌದು ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಏಕೈಕ ಟೆಸ್ಟ್ ಪಂದ್ಯದಲ್ಲಿ ಟಾಸ್ ಗೆದ್ದ ಭಾರತ ಇನ್ನಿಂಗ್ಸ್ ಆರಂಭಿಸಿತು. 

ಆರಂಭಿಕರಾಗಿ ಕಣಕ್ಕಿಳಿದ ಧವನ್ 23 ರನ್ ಗಳಿಸಿದ್ದಾಗ ಆಫ್ಘಾನ್ ಬೌಲರ್ ವಫಾದಾರ್ ಎಸೆದ 9ನೇ ಓವರ್ ನ 5 ಎಸೆತ ಬ್ಯಾಟ್ ಗೆ ತಗುಲಿ ಕೀಪರ್ ಕೈಸೇರಿತು. ಈ ವೇಳೆ ಕೀಪರ್ ಸೇರಿದಂತೆ ಮೈದಾನದಲ್ಲಿದ್ದ ಆಟಗಾರರೆಲ್ಲಾ ಅಪೀಲ್ ಮಾಡಿದರು. ಆದರೆ ಅಂಪೈರ್ ಇದನ್ನು ನಾಟೌಟ್ ಎಂದು ಘೋಷಿಸಿದರು. ಆಗ ಆಫ್ಘಾನ್ ನಾಯಕ ಸೇರಿದಂತೆ ಎಲ್ಲರು ಚರ್ಚೆ ನಡೆಸಿದರು. ಆದರೆ ಯಾರೂ ಬಾಲ್ ಬ್ಯಾಟ್ ಗೆ ತಗುಲಿದ್ದಾಗಿ ಸ್ಪಷ್ಟವಾಗಿ ಹೇಳದಿದ್ದ ಕಾರಣ ನಾಯಕ ಡಿಆರ್‌ಎಸ್ ತೆಗೆದುಕೊಳ್ಳಲು ಮುಂದಾಗಲಿಲ್ಲ. ಇದು ಧವನ್ ಸಿಕ್ಕ ಜೀವದಾನವಾಗಿದ್ದು ನಂತರ ಅವರು ಶತಕ ಸಿಡಿಸಿ ಸಂಭ್ರಮಿಸಿದರು. 

ಶಿಖರ್ ಧವನ್ ಭರ್ಜರಿ ಶತಕ ಸಿಡಿಸಿದ್ದು,ಕೇವಲ 96 ಎಸೆತಗಳಲ್ಲಿ 19 ಬೌಂಡರಿ ಹಾಗೂ 3 ಭರ್ಜರಿ ಸಿಕ್ಸರ್ ಗಳ ಮೂಲಕ 107 ರನ್ ಸಿಡಿಸಿ ಔಟ್ ಆಗಿದ್ದಾರೆ.