ಮಂಗಳವಾರ ಮುಲ್ಲನ್ಪುರದ ಮಹಾರಾಜ ಯಾದವೀಂದ್ರ ಸಿಂಗ್ ಅಂತರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂನಲ್ಲಿ ನಡೆದ ಐಪಿಎಲ್ 2025ನೇ ಆವೃತ್ತಿಯ 22ನೇ ಪಂದ್ಯದಲ್ಲಿ ಪಂಜಾಬ್ ಕಿಂಗ್ಸ್ ತಂಡ ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ 18 ರನ್‌ಗಳ ರೋಚಕ ಗೆಲುವು ಸಾಧಿಸಿದೆ. ಈ ಮೂವಕ ಸಿಎಸ್‌ಕೆ ಸತತ ನಾಲ್ಕು ಪಂದ್ಯಗಳಲ್ಲಿ ಸೋಲು ಕಂಡಿದೆ. ಈ ಪಂದ್ಯದಲ್ಲಿ ಎಂಎಸ್ ಧೋನಿ ಐದನೇ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡಲು ಬರುವ ಮೂಲಕ ಅಭಿಮಾನಿಗಳಿಗೆ ತಮ್ಮ ಹಿಂದಿನ ಖದರ್ ಅನ್ನು ತೋರಿಸಿದರು.
ಟಾಸ್ ಗೆದ್ದ ಪಂಜಾಬ್ ಕಿಂಗ್ಸ್ ಮೊದಲು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡಿತು. ಪ್ರಿಯಾಂಶ್ ಆರ್ಯ ಅಮೋಘ ಶತಕ ಸಿಡಿಸಿ, ಐಪಿಎಲ್ ಇತಿಹಾಸದಲ್ಲಿ ಎರಡನೇ ಅತಿ ವೇಗದ ಶತಕ ಸಿಡಿಸಿದ ಭಾರತೀಯ ಬ್ಯಾಟರ್ ಎನಿಸಿಕೊಂಡರು. ಪಂಜಾಬ್ ತಂಡ ಆರು ವಿಕೆಟ್ ನಷ್ಟಕ್ಕೆ 219 ರನ್ ಗಳಿಸಿತು.
ಪಂಜಾಬ್ ನೀಡಿದ 220 ರನ್ ಗುರಿ ಬೆನ್ನತ್ತಿದ ಸಿಎಸ್‌ಕೆ ಪರವಾಗಿ ಪ್ರತಿ ಬಾರಿ ತಡವಾಗಿ ಬರುತ್ತಿದ್ದ ಎಂಎಸ್ ಧೋನಿ 5ನೇ ಸ್ಥಾನದಲ್ಲಿ ಬ್ಯಾಟಿಂಗ್ ಮಾಡಲು ಬಂದರು. 12 ಎಸೆತಗಳಲ್ಲಿ ಮೂರು ಸಿಕ್ಸರ್‌ ಮತ್ತು ಒಂದು ಬೌಂಡರಿಯೊಂದಿಗೆ 27 ರನ್ ಗಳಿಸಿದರು. ಸಿಎಸ್‌ಕೆ ಅಂತಿಮವಾಗಿ ಪಂದ್ಯವನ್ನು 18 ರನ್‌ಗಳಿಂದ ಸೋತಿತು.
ಎಂಎಸ್ ಧೋನಿ ಬ್ಯಾಟಿಂಗ್ ಮಾಡಲು ಬಂದಾಗ, ಮಾಜಿ ಸಿಎಸ್‌ಕೆ ಮತ್ತು ಎಂಐ ತಾರೆ ಅಂಬಟಿ ರಾಯುಡು ಅವರ ಅತಿರೇಕದ ಕಾಮೆಂಟ್‌ಗೆ ನವಜೋತ್ ಸಿಂಗ್ ಸಿಧು ಅವರು ಅದ್ಭುತ ಪ್ರತಿಕ್ರಿಯೆ ನೀಡಿದರು.
ಫಿನಿಷರ್ ಎಂದೇ ಹೆಸರಾಗಿರುವ ಎಂಎಸ್ ಧೋನಿ ಬ್ಯಾಟಿಂಗ್ ಮಾಡಲು ಬಂದಾಗ, ಕಠಿಣ ಗುರಿಗಳನ್ನು ಸಹ ಸಾಧಿಸಬಹುದು ಎಂಬಂತೆಯೇ ಕಾಣುತ್ತದೆ. ಆದಾಗ್ಯೂ, ಈ ಬಾರಿ ಪಂಜಾಬ್ ಕಿಂಗ್ಸ್ ಗೆಲ್ಲಲು ಒಂದು ಸಣ್ಣ ಅವಕಾಶವನ್ನು ಹೊಂದಿದೆ ಮತ್ತು ಅವರು ಅದನ್ನು ಸದುಪಯೋಗಪಡಿಸಿಕೊಳ್ಳಲು ಪ್ರಯತ್ನಿಸುತ್ತಾರೆ. ಧೋನಿ ಮೈದಾನಕ್ಕೆ ಬರುತ್ತಿರುವಾಗ ಅವರ ಇಂಟೆಂಟ್ ಸ್ಪಷ್ಟವಾಗಿರುತ್ತದೆ' ನವಜೋತ್ ಸಿಂಗ್ ಸಿಧು ಧೋನಿ ಅವರ ಆಗಮನದ ಸಮಯದಲ್ಲಿ ಹೇಳಿದರು.
ಎಂಎಸ್ ಧೋನಿ ಅವರ ಪ್ರವೇಶದ ಬಗ್ಗೆ ಅಂಬಟಿ ರಾಯುಡು ತಮ್ಮ ವಿವರಣೆಯಲ್ಲಿ, 'ಎಂಎಸ್ ಧೋನಿ ಬ್ಯಾಟ್ ಅಲ್ಲ, ಕೈಯಲ್ಲಿ ಕತ್ತಿ ಹಿಡಿದುಕೊಂಡು ಹೊರಬರುತ್ತಿರುವಂತೆ ತೋರುತ್ತಿದೆ. ಇಂದು ರಾತ್ರಿ ಈ ಕತ್ತಿಯನ್ನು ಪ್ರಯೋಗಿಸಲಾಗುವುದು ಮತ್ತು ಇದು ಧೋನಿಯ ಕತ್ತಿ' ಎನ್ನುತ್ತಾರೆ.
ಇದಕ್ಕೆ ಪ್ರತಿಕ್ರಿಯಿಸಿದ ಸಿಧು, 'ಗುರು, ಅವರು ಕ್ರಿಕೆಟ್ ಆಡಲು ಬರುತ್ತಿಲ್ಲ, ಯುದ್ಧ ಮಾಡಲು ಬರುತ್ತಿದ್ದಾರೆ ಎನ್ನುವಂತೆ ನೀವು ಹೇಳುತ್ತಿದ್ದೀರಿ' ಎನ್ನುತ್ತಾರೆ.
'ನೀವು ಅವರ ನಡಿಗೆಯನ್ನು ನೋಡಬಹುದು. ಕೊನೆಯ ಪಂದ್ಯದಲ್ಲಿ ಅವರು ಶಾಂತವಾಗಿ ಕ್ರೀಸ್‌ಗೆ ಬಂದರು. ಆದರೆ, ಇಂದು, ಅಭ್ಯಾಸದ ಸಮಯದಲ್ಲಿಯೂ ಸಹ ಅವರು ಸಾಮಾನ್ಯವಾಗಿ ಮೊಣಕಾಲಿನ ಮೇಲೆ ಧರಿಸುವ ಕಪ್ಪು ವಸ್ತುವನ್ನು ತೆಗೆದರು. ಇಂದು ರಾತ್ರಿ, ನಾವು ನಿರ್ಭೀತ ಧೋನಿಯನ್ನು ನೋಡುತ್ತೇವೆ' ಎಂದು ಅವರು ಹೇಳಿದರು.
ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ಮತ್ತು ಮುಂಬೈ ಇಂಡಿಯನ್ಸ್ (ಎಂಐ) ತಂಡದ ಮಾಜಿ ಬ್ಯಾಟ್ಸ್‌ಮನ್ ಅಂಬಟಿ ರಾಯುಡು ಸಾಮಾಜಿಕ ಮಾಧ್ಯಮದಲ್ಲಿ ನಿರಂತರ ಚರ್ಚೆಯ ವಿಷಯವಾಗಿದ್ದಾರೆ. ಭಾರತದ ಮಾಜಿ ಕ್ರಿಕೆಟಿಗ ಸಂಜಯ್ ಬಂಗಾರ್ ಅವರೊಂದಿಗಿನ ಬಿಸಿ ಚರ್ಚೆಯ ಒಂದು ದಿನದ ನಂತರ, ರಾಯುಡು ಲೈವ್ ವೇಳೆಯಲ್ಲಿಯೇ ನವಜೋತ್ ಸಿಂಗ್ ಸಿಧು ಅವರೊಂದಿಗೆ ಘರ್ಷಣೆ ನಡೆಸಿದರು. ಮಂಗಳವಾರ ಪಂಜಾಬ್ ಕಿಂಗ್ಸ್ (ಪಿಬಿಕೆಎಸ್) ಮತ್ತು ಚೆನ್ನೈ ಸೂಪರ್ ಕಿಂಗ್ಸ್ (ಸಿಎಸ್‌ಕೆ) ನಡುವಿನ ಪಂದ್ಯದ ವೇಳೆ ರಾಯುಡು ಸಿಧು ಅವರನ್ನು 'ಗಿರ್ಗಿಟ್' (ಗೋಸುಂಬೆ) ಎಂದು ಕರೆದು, ತಮ್ಮ ತಂಡವನ್ನು ಬದಲಾಯಿಸಿದ್ದಾರೆ ಎಂದು ಆರೋಪಿಸಿದರು. ಸಿಧು ಅವರಿಂದ ಕಠಿಣ ಉತ್ತರವನ್ನು ಪಡೆದರು.
ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿರುವ ವಿಡಿಯೋವೊಂದರಲ್ಲಿ, ತಂಡಗಳನ್ನು ಬದಲಾಯಿಸುವ ರಾಯುಡು ಅವರ ಆರೋಪಕ್ಕೆ ಸಿಧು ಪ್ರತಿಕ್ರಿಯಿಸಿದ್ದು, 'ಈ ಜಗತ್ತಿನಲ್ಲಿ ಊಸರವಳ್ಳಿಯಂತೆ ಇರುವ ಯಾರಾದರೂ ಇದ್ದರೆ, ಅವರು ನಿಮ್ಮ ಆರಾಧ್ಯ ದೈವ' ಎಂದು ತಿರುಗೇಟು ನೀಡಿದರು.