ದುಬೈ ಅಂತರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಭಾರತ ಮತ್ತು ಪಾಕಿಸ್ತಾನ ನಡುವೆ ಚಾಂಪಿಯನ್ಸ್ ಟ್ರೋಫಿ ಪಂದ್ಯ ನಡೆಯುತ್ತಿದೆ. ಬಾಂಗ್ಲಾದೇಶ ವಿರುದ್ಧದ ಕೊನೆಯ ಪಂದ್ಯದಲ್ಲಿ ಭಾರತದ ಕ್ಷೇತ್ರರಕ್ಷಣೆ ತುಂಬಾ ಕಳಪೆಯಾಗಿತ್ತು. ಅನೇಕ ಆಟಗಾರರು ಮೈದಾನದಲ್ಲಿ ಕ್ಯಾಚ್‌ಗಳನ್ನು ಬಿಟ್ಟರು. ಆದರೆ ಭಾರತ ತಂಡ ಪಾಕಿಸ್ತಾನ ವಿರುದ್ಧ ಅತ್ಯುತ್ತಮ ಕ್ಷೇತ್ರರಕ್ಷಣೆಯನ್ನು ಪ್ರದರ್ಶಿಸುತ್ತಿದೆ. ಆಲ್ ರೌಂಡರ್ ಅಕ್ಷರ್ ಪಟೇಲ್ ಇಮಾಮ್ ಉಲ್ ಹಕ್ ಅವರನ್ನು ರನೌಟ್ ಮಾಡಿ ಪೆವಿಲಿಯನ್ ಗೆ ಕಳುಹಿಸಿದರು. ಅಕ್ಷರ್ ಅವರ ನೇರ ಎಸೆತವು ಇಮಾಮ್ ಅವರ ಇನ್ನಿಂಗ್ಸ್ ಅನ್ನು ಕೊನೆಗೊಳಿಸಿತು.
ಪಾಕಿಸ್ತಾನದ ಇನ್ನಿಂಗ್ಸ್‌ನ 10 ನೇ ಓವರ್ ನಲ್ಲಿ ಇಮಾಮ್ ರನ್ ಔಟ್ ಆದರು. ಕುಲ್ದೀಪ್ ಯಾದವ್ ಎಸೆತದಲ್ಲಿ ಇಮಾಮ್ ಮಿಡ್-ಆನ್ ಕಡೆಗೆ ಶಾಟ್ ಹೊಡೆದರು. ರನ್ ತೆಗೆದುಕೊಳ್ಳುವ ಸಲುವಾಗಿ ಇಮಾಮ್ ಕ್ರೀಸ್ ನಿಂದ ವೇಗವಾಗಿ ಓಡಿದರು. ಆದರೆ 30-ಗಜ ವೃತ್ತದ ಒಳಗಿದ್ದ ಅಕ್ಷರ್, ಚೆಂಡನ್ನು ಹಿಡಿದು, ಬುಲೆಟ್ ಸ್ಪೀಡ್ ನಲ್ಲಿ ಚೆಂಡನ್ನು ಸ್ಟಂಪ್‌ಗೆ ಹೊಡೆದರು. ಈ ಸಮಯದಲ್ಲಿ ಇಮಾಮ್ ಕ್ರೀಸ್‌ನಿಂದ ಹೊರಗಿದ್ದರು. ಪೆವಿಲಿಯನ್‌ಗೆ ಕಳುಹಿಸಲಾಯಿತು. ಈ ಅದ್ಭುತ ರನ್ ಔಟ್ ಭಾರತಕ್ಕೆ ಎರಡನೇ ಯಶಸ್ಸನ್ನು ತಂದುಕೊಟ್ಟಿತು.
ಇಮಾಮ್ ಉಲ್ ಹಕ್ 26 ಎಸೆತಗಳಲ್ಲಿ 10 ರನ್ ಗಳಿಸಿ ಔಟಾದರು. ಅವರಿಗೆ ಫಖರ್ ಜಮಾನ್ ಬದಲಿಗೆ ಆಡಲು ಅವಕಾಶ ಸಿಕ್ಕಿದೆ. ಅವರು ಈ ಚಾಂಪಿಯನ್ಸ್ ಟ್ರೋಫಿ ತಂಡದ ಭಾಗವೂ ಆಗಿರಲಿಲ್ಲ. ಮೊದಲ ಪಂದ್ಯದಲ್ಲಿ ಫಖರ್ ಜಮಾನ್ ಗಾಯಗೊಂಡರು. ಅವರ ಸ್ಥಾನದಲ್ಲಿ ಇಮಾಮ್ ಅವರನ್ನು ತಂಡಕ್ಕೆ ಸೇರಿಸಲಾಯಿತು. 2023ರ ವಿಶ್ವಕಪ್ ನಂತರ ಅವರು ಪಾಕಿಸ್ತಾನಿ ಏಕದಿನ ತಂಡದಿಂದ ಹೊರಗುಳಿದಿದ್ದರು. ಅವರು ವಿಶ್ವಕಪ್‌ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ತಮ್ಮ ಕೊನೆಯ ಏಕದಿನ ಪಂದ್ಯವನ್ನು ಆಡಿದರು.