ಭದ್ರಾವತಿ: ಕರ್ನಾಟಕ ಭದ್ರಾವತಿ ಮೂಲದವರಾದ ಆಶಾ ಭಟ್ ಮಿಸ್ ಸುಪ್ರಾ ಇಂಟರ್ ನ್ಯಾಷನಲ್ ಸೌಂದರ್ಯ ಕಿರೀಟ ಮುಡಿಗೇರಿಸಿಕೊಂಡಿದ್ದು, ಇಂದು ತವರಿಗೆ ಮರಳಿದ ಅವರಿಗೆ ಭರ್ಜರಿ ಸ್ವಾಗತ ಸಿಕ್ಕಿದೆ.
ಭಾನುವಾರ ಭದ್ರಾವತಿಯ ಮಾಧವ ನಗರದಲ್ಲಿ ಆಶಾ ಭಟ್ ಅವರನ್ನು ತೆರೆದ ವಾಹನದಲ್ಲಿ ಮೆರವಣಿಗೆ ಮಾಡಲಾಯಿತು. ಈ ವೇಳೆ ಮಾತನಾಡಿದ ಆಶಾ, ಇಂದು ನಿಜವಾದ ನಜರ ಪ್ರೀತಿ ಗಳಿಸಿದ್ದೇನೆ. ನನಗೆ ತುಂಬಾ ಸಂತೋಷವಾಗಿದೆ. ದೇಶಕ್ಕಾಗಿ ಇನ್ನು ಏನಾದರೂ ಸಾಧನೆ ಮಾಡುವ ಕನಸಿದೆ ಎಂದರು.
ತೆರೆದ ವಾಹನದಲ್ಲಿ ಆಶಾ ಜತೆ ತಂದೆ ಸುಬ್ರಹ್ಮಣ್ಯ ಭಟ್ ಮತ್ತು ತಾಯಿ ಶ್ಯಾಮಲಾ ಇದ್ದರು. ಶಾಸಕ ಎಂಜೆ ಅಪ್ಪಾಜಿ ಆಶಾ ಭಟ್ ಅವರನ್ನು ಬರಮಾಡಿಕೊಂಡರು. ಸಾವಿರಾರು ಜನರು ಮೆರವಣಿಗೆಯಲ್ಲಿ ಭಾಗವಹಿಸಿ ಡೊಳ್ಳು ಮತ್ತು ವಾದ್ಯಗಳಿಗೆ ಕುಣಿದು ಸಂಭ್ರಮಿಸಿದರು.
ಪೊಲೆಂಡಿನಲ್ಲಿ ನಡೆದ ಸುಪ್ರಾ ನ್ಯಾಷನಲ್ ಸೌಂದರ್ಯ ಸ್ಪರ್ಧೆಯಲ್ಲಿ ಆಶಾ ಭಟ್ ಮಿಸ್ ಸುಪ್ರಾ ನ್ಯಾಷನಲ್ ಕಿರೀಟ ಧರಿಸಿದ್ದು, ದಕ್ಷಿಣ ಆಫ್ರಿಕಾ ಮೂಲದ ಸಂಸ್ಥೆ ನಡೆಸಿದ ಈ ಸೌಂದರ್ಯ ಸ್ಪರ್ಧೆಯಲ್ಲಿ ವಿಜೇತರಾದ ಮೊದಲ ಭಾರತೀಯರೆಂಬ ಕೀರ್ತಿಗೂ ಆಶಾ ಭಟ್ ಭಾಜನರಾಗಿದ್ದಾರೆ.