3 ಗಂಟೆಗೆ ಮುಂಚೆಯೇ ಎಲ್ಲ ದ್ವಾರಗಳಲ್ಲಿ ಪ್ರವೇಶ
ಬೆಂಗಳೂರು: ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆಯುವ ಐಪಿಎಲ್ ಪಂದ್ಯಗಳಿಗೆ ವ್ಯಾಪಕ ಬಂದೋಬಸ್ತ್ ಕಲ್ಪಿಸಲಾಗಿದೆ. ಸೋಮವಾರದಿಂದ ಒಟ್ಟು 7 ದಿನಗಳ ಕಾಲ ನಡೆಯುವ ಪಂದ್ಯಾವಳಿಯ ಭದ್ರತೆಗೆ 816 ಪೊಲೀಸರು ಮತ್ತು 10 ಕೆಎಸ್‍ಆರ್‍ಪಿ ಸಿಬ್ಬಂದಿ ನಿಯೋಜಿಸಲಾಗಿದೆ.
ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ನಗರ ಹೆಚ್ಚುವರಿ ಪೊಲೀಸ್ ಆಯುಕ್ತ ಅಲೋಕ್ ಕುಮಾರ್, ಮುಂಜಾಗ್ರತಾ ಕ್ರಮವಾಗಿ ಈಗಾಗಲೇ ಕ್ರೀಡಾಂಗಣದ ಒಳಗಡೆ ಮತ್ತು ಸುತ್ತಮುತ್ತಲ ಪ್ರದೇಶದಲ್ಲಿನ ಪ್ರಮುಖ ಸ್ಥಳಗಳನ್ನು ಗುರುತಿಸಿ ಬಂದೋಬಸ್ತ್ ಗೆ ಸಿಬ್ಬಂದಿ ನೇಮಿಸಲಾಗಿದೆ. ಜತೆಗೆ ಕ್ರೀಡಾಂಗಣವನ್ನು ಸಂಪೂರ್ಣವಾಗಿ ತಪಾಸಣೆಗೆ ಒಳಪಡಿಸಲಾಗಿದೆ ಎಂದರು.
ಭದ್ರತೆ ದೃಷ್ಟಿಯಿಂದ ಮತ್ತು ಯಾವುದೇ ಅಹಿತಕರ ಘಟನೆ ನಡೆಯದಂತೆ ಕಟ್ಟುನಿಟ್ಟಿನ ಕ್ರಮ ಕೈಗೊಳ್ಳಲಾಗಿದೆ. ಕ್ರೀಡಾಂಗಣದ ಸುತ್ತಮುತ್ತ ಕಣ್ಗಾವಲಿಗಾಗಿ 67 ಸಿಸಿಟಿವಿ ಕ್ಯಾಮರಾಗಳನ್ನು ಅಳವಡಿಸಲಾಗಿದೆ. ಮೊಬೈಲ್ ಸಿಸಿಟಿವಿ ವಾಹನದ ಜತೆಗೆ ಎಲ್ಲ ಕ್ರಿಕೆಟ್ ಪಂದ್ಯಗಳ ದಿನದಂದು ಪೆರಿಮೀಟರ್‍ಗಳಲ್ಲಿ ಕ್ರೀಡಾಂಗಣದ ಸುತ್ತಮುತ್ತ ದ್ರೋಣ್ ಕಾಮರಾ ಬಳಸಿಕೊಳ್ಳಲಾಗುವುದು ಎಂದರು.
ಪಂದ್ಯ ನಡೆಯುವ ಮೂರು ಗಂಟೆ ಮುಂಚೆ ಸಾರ್ವಜನಿಕರಿಗೆ ಕ್ರೀಡಾಂಗಣದ ಎಲ್ಲ ಪ್ರವೇಶ ದ್ವಾರಗಳನ್ನು ತೆರೆಯಲಾಗುತ್ತದೆ. ಸಾರ್ವಜನಿಕರು ಕ್ರೀಡಾಂಗಣ ಪ್ರವೇಶಿಸಲು ಸರದಿಯಲ್ಲಿ ನಿಲ್ಲಬೇಕು. ಕ್ರೀಡಾಂಗಣದ ಸುತ್ತಮುತ್ತ ವಾಹನ ನಿಲುಗಡೆಗೆ ಅವಕಾಶ ಇಲ್ಲ. ಇದಕ್ಕೆ ಸಾರ್ವಜನಿಕರು ಸಹಕರಿಸಬೇಕೆಂದು ಮನವಿ ಮಾಡಿದರು. ಕೇಂದ್ರ ವಿಭಾಗದ ಡಿಸಿಪಿ ಸಂದೀಪ್ ಪಾಟೀಲ್ ಹಾಜರಿದ್ದರು.
ಇವನ್ನು ತರಬೇಡಿ
ಸಿಗರೇಟ್, ಮ್ಯಾಚ್ ಬಾಕ್ಸ್, ಲೈಟರ್, ತಿಂಡಿ-ತಿನಿಸು, ಹರಿತವಾದ ಅಸ್ತ್ರ, ನೀರಿನ ಬಾಟಲಿ, ಹೆಲ್ಮೆಟ್, ಬಾವುಟದ ಕಡ್ಡಿ, ಔಷಧ ಬಾಟಲಿಗಳು, ಬ್ಯಾಟರಿ ಟಾರ್ಚ್‍ಗಳು, ಕ್ಯಾಮರಾ ಮತ್ತು ಬೈನಾಕುಲರ್ಸ್, ಲ್ಯಾಪ್‍ಟಾಪ್, ವಾದ್ಯ ಸಾಧನಗಳು, ಹ್ಯಾಂಡ್ ಬ್ಯಾಗ್, ಮದ್ಯದ ಬಾಟಲಿ, ಸುಗಂಧ ದ್ರವ್ಯಗಳು, ಬಣ್ಣದ ಪುಡಿ, ಛತ್ರಿಗಳು ಮತ್ತು ಬೊಂಬೆಗಳು.
ಪಂದ್ಯದ ವೇಳೆಗೆ ಬಿಎಂಟಿಸಿ ಬಸ್ ಸೇವೆ
ಬೆಂಗಳೂರು: ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ಏ.13ರಂದು ನಡೆಯುವ ಸನ್‍ರೈಸರ್ಸ್ ಹೈದ್ರಾಬಾದ್ ಮತ್ತು ಆರ್‍ಸಿಬಿ ಪಂದ್ಯಕ್ಕೆ ಬಿಎಂಟಿಸಿ ವಿಶೇಷ ಬಸ್ ಸೇವೆ ವ್ಯವಸ್ಥೆ ಮಾಡಿದೆ. ಅಂದು ಸಂಜೆ 5 ಗಂಟೆಯಿಂದ ಹಾಗೂ ರಾತ್ರಿ 11.30ರಿಂದ ನಗರದ ಹಲವೆಡೆಯಿಂದ ಹೆಚ್ಚುವರಿ ಬಸ್‍ಗಳು ಸಂಚರಿಸಲಿವೆ ಎಂದು ಬಿಎಂಟಿಸಿ ಸಂಚಾರ ವಿಭಾಗದ ಪ್ರಧಾನ ವ್ಯವಸ್ಥಾಪಕರು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.