ಬೆಂಗಳೂರು: ಐಟಿ ಉದ್ಯೋಗಿಗಳನ್ನು ಬಸ್ ಪ್ರಯಾಣದ ಕಡೆಗೆ ಆಕರ್ಷಿಸುವ ಉದ್ದೇಶದಿಂದ ಬಿಎಂಟಿಸಿ ಇದೇ ಮೊದಲ ಬಾರಿಗೆ ನೈಸ್ ರಸ್ತೆಯಲ್ಲಿ ಸಂಚರಿಸುತ್ತಿದೆ.

ಹಾಗಾಗಿ ದೂರದ ರಸ್ತೆಯಲ್ಲಿ ಕ್ರಮಿಸುವುದು ಇನ್ನು ಸುಲಭ. ಬುಧವಾರ ಎಲೆಕ್ಟ್ರಾನಿಕ್ ಸಿಟಿಯಲ್ಲಿ ಬಸ್ ದಿನಾಚರಣೆ ಕಾರ್ಯಕ್ರಮದಲ್ಲಿ ಈ ಬಸ್ ಸೇವೆಗೆ ಸಚಿವ ರಾಮಲಿಂಗಾರೆಡ್ಡಿ ಚಾಲನೆ ನೀಡಿದರು.  

ಎಲೆಕ್ಟ್ರಾನಿಕ್ ಸಿಟಿಯ 9 ಪಾಯಿಂಟ್‌ಗಳಿಂದ ಈ ಬಸ್‌ಗಳು ಸಂಚರಿಸಲಿದ್ದು, ಜಯದೇವ, ಬನಶಂಕರಿ, ಶ್ರೀನಗರ, ವಿಜಯನಗರ ಟಿಟಿಎಂಸಿ ಹಾಗೂ ಬಿಇಎಂಎಲ್ 5ನೇ ಹಂತ, ಸುಮನಹಳ್ಳಿ, ಯಶವಂತಪುರ ಟಿಟಿಎಂಸಿ, ಬಸವೇಶ್ವರ ನಗರ ಬಸ್ ನಿಲ್ದಾಣಗಳಿಂದ ಎಲೆಕ್ಟ್ರಾನಿಕ್ ಸಿಟಿಗೆ 24 ಬಸ್‌ಗಳನ್ನು ಬಿಡಲಾಗಿದೆ. ಈ ಬಸ್‌ಗಳು ದಿನಕ್ಕೆ 42 ಟ್ರಿಪ್ ಸಂಚರಿಸಲಿವೆ.

ಈ ಎಲ್ಲಾ ಮಾರ್ಗದಿಂದ ಹೊರಡುವ ಬಸ್ ಗಳು ನೈಸ್ ರಸ್ತೆ ಮುಖಾಂತರ ಶೀಘ್ರವಾಗಿ ತಲುಪಲಿವೆ. ಹಾಗಾಗಿ ಈ ಭಾಗದಲ್ಲಿ ಸಂಚರಿಸುವವರಿಗೆ ಇನ್ನು ಮುಂದೆ ಟೋಲ್ ದರ ಸಹ ಸೇರಲಿದ್ದು, ಟೋಲ್ ದರ ಸೇರಿಸಿ ಟಿಕೆಟ್ ಅಥವಾ ಪಾಸ್ ನೀಡಲಾಗುತ್ತದೆ. ಸಾಮಾನ್ಯ ದರದ ಬಸ್ ಗಳಲ್ಲಿ ಮಾಸಿಕ ಪಾಸ್ ರು. 1,900 ಇರಲಿದ್ದು, ಹವಾನಿಯಂತ್ರಿತ ಬಸ್ ಗಳ ಪಾಸ್ ರು. 3 ಸಾವಿರ ಇರಲಿದೆ ಎಂದು ಸಚಿವ ರಾಮಲಿಂಗಾರೆಡ್ಡಿ ತಿಳಿಸಿದ್ದಾರೆ.

ಮಹಿಳೆಯರಿಗೆ ವಿಶೇಷ ಬಸ್
ನಗರದ ವಿವಿಧ ಭಾಗಗಳಿಂದ ವಿಧಾನಸೌಧಕ್ಕೆ ಮಹಿಳಾ ಬಸ್ ಸೌಲಭ್ಯ ಕಲ್ಪಿಸಿರುವಂತೆ ಎಲೆಕ್ಟ್ರಾನಿಕ್ ಸಿಟಿಯಿಂದಲೂ ಮಹಿಳೆಯರಿಗಾಗಿ ವಿಶೇಷ ಬಸ್ ಸೌಲಭ್ಯ ಕಲ್ಪಿಸಲಾಗಿದೆ. ಎರಡು ಬಸ್ ಗಳು ಮಹಿಳಾ ವಿಶೇಷ ಬಸ್ ಗಳಾಗಿ ಸಂಚರಿಸಲಿದ್ದು, ಸಿಲ್ಕ್ ಬೋರ್ಡ್ ನಿಂದ ಹೊಸೂರು ರಸ್ತೆಯ ಮೇಲೇತ್ಸುವೆ ಮೂಲಕ ವಿಪ್ರೋಗೆ ಸಾಗಲಿವೆ.