ಬೆಂಗಳೂರು: ವಿವಾದಕ್ಕೆ ಕಾರಣವಾಗಿದ್ದ ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರದ ಜಿ ಕೆಟಗರಿ(ಮುಖ್ಯಮಂತ್ರಿ ವಿವೇಚನಾ ಕೋಟಾ) ನಿವೇಶನಗಳ ಹಂಚಿಕೆಗೆ ಸಂಬಂಧಪಟ್ಟಂತೆ ಸರ್ಕಾರ ನಿಯಮಾವಳಿಗೆ ಅಗತ್ಯ ತಿದ್ದುಪಡಿ ತಂದಿದೆ. 

ಹಾಗಾಗಿ ಇನ್ನು ಮುಂದೆ ಮುಖ್ಯಮುಖ್ಯಮಂತ್ರಿಗೆ ಸಮಾಜದ ವಿವಿಧ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ವ್ಯಕ್ತಿಗಳಿಗೆ ಬಿಡಿಎಯಿಂದ ಜಿ ಕೆಟಗರಿಯಲ್ಲಿ ನಿವೇಶನ ಹಂಚಿಕೆ ಮಾಡುವ ಅಧಿಕಾರ ಲಭ್ಯವಾಗಲಿದೆ. ಈ ಸಂಬಂಧ ನಗರಾಭಿವೃದ್ಧಿ ಇಲಾಖೆ ನಿಯಮ ರೂಪಿಸಿದೆ. 

ಬಿಡಿಎ ಅಧೀನದಲ್ಲಿದ್ದ ಸುಮಾರು 8 ಸಾವಿರ ನಿವೇಶನಗಳಲ್ಲಿ ಶೇ.30ರಷ್ಟು ನಿವೇಶನಗಳನ್ನು ಜಿ ಕೆಟಗರಿ ಕೋಟಾದಲ್ಲಿ ವಿತರಣೆ ಮಾಡಲು ಅವಕಾಶ ದೊರೆತಂತೆ ಆಗಿದೆ. ಹೀಗಾಗಿ ಈ ನಿವೇಶನಗಳು ಬಹುಪಾಲು ಜನಪ್ರತಿನಿಧಿಗಳ ಪಾಲಾಗಲಿವೆ ಎಂಬುದು ಸಾರ್ವಜನಿಕರ ಆತಂಕ. ನೂತನವಾಗಿ ರೂಪಿಸಿರುವ ನಿಯಮದಲ್ಲಿ ತಿದ್ದುಪಡಿ ತರಲಾಗಿದ್ದು, ಹೊಸದಾಗಿ ನಿರ್ಮಾಣವಾಗುತ್ತಿರುವ ಬಡಾವಣೆಗೆ ಈ ನಿಯಮಗಳು ಅನ್ವಯವಾಗುತ್ತಿವೆ. 

ಆದರೆ, ಹಳೆಯ ಬಡಾವಣೆಗಳಲ್ಲಿಯೂ ಈ ನಿಯಮಗಳು ಅನ್ವಯಿಸಲಿದ್ದೂ, ಜನ ಪ್ರತಿನಿಧಿಗಳಿಗೆ ನಿವೇಶನ ಹಂಚಿಕೆ ಮಾಡುವ ಉದ್ದೇಶ ಸರ್ಕಾರದ ಮುಂದಿದೆ. ಹೊಸ ನಿಯಮಾವಳಿ ಪ್ರಕಾರ, ನೂತನವಾಗಿ ಅಭಿವೃದ್ಧಿಪಡಿಸುವ ಬಡಾವಣೆಗಳಲ್ಲಿ ಶೇ.30 ನಿವೇಶನಗಳನ್ನು ಮಾತ್ರ ಜಿ ಕೆಟಗರಿ ಕೋಟಾದಡಿ ವಿತರಣೆ ಮಾಡಲು ನಿರ್ಧರಿಸಲಾಗಿದೆ.

ಇನ್ನುಳಿದ ಶೇ.30ರಷ್ಟು ನಿವೇಶನಗಳನ್ನು ಹರಾಜಿನ ಮೂಲಕ ಸಾರ್ವಜನಿಕರಿಗೆ ಮಾರಾಟ ಮಾಡುವುದು ಸರ್ಕಾರದ ಉದ್ದೇಶವಾಗಿದೆ. ಅಂತಾರಾಷ್ಟ್ರೀಯ ಹಾಗೂ ರಾಷ್ಟ್ರೀಯ ಮಟ್ಟದ ಕ್ರೀಡಾ ಸಾಧನೆ ಮಾಡಿದವರಿಗೆ ಶೇ.10, ಕಲೆ, ಚಿತ್ರಕಲೆ, ಶಿಲ್ಪಕಲೆ ಸಂಗೀತ, ವಿಜ್ಞಾನ, ಸಾಹಿತ್ಯ, ಶಿಕ್ಷಣ, ವೈದ್ಯಕೀಯ, ಮಾಧ್ಯಮ ಕ್ಷೇತ್ರದಲ್ಲಿ ವಿಶೇಷ ಸಾಧನೆ ಮಾಡಿದವರಿಗೆ ಶೇ.15, ನಿವೃತ್ತ ಯೋಧರಿಗೆ ಶೇ.5, ಬೆಂಗಳೂರು ಮಹಾನಗರ ವ್ಯಾಪ್ತಿಯ ಸ್ವಾತಂತ್ರ್ಯ ಯೋಧರಿಗೆ ಶೇ.5, ಸೇವೆಯಲ್ಲಿ ಮೃತಪಟ್ಟ ರಾಜ್ಯ ಸರ್ಕಾರಿ ನೌಕರರ ಕುಟುಂಬಕ್ಕೆ ಶೇ.5ರಷ್ಟು ನಿವೇಶನಗಳನ್ನು ನೀಡುವುದಕ್ಕೆ ತೀರ್ಮಾನಿಸಲಾಗಿದೆ.