ಬೆಂಗಳೂರು: ಧರ್ಮ, ಜನಾಂಗಗಳ ಹೆಸರಿನಲ್ಲಿ ನಮ್ಮ ದೇಶದಲ್ಲಿ  ಅನ್ಯಾಯ ನಡೆಯುತ್ತದೆ.ಸ್ವತಂತ್ರ ಜೀವನವನ್ನು ನಡೆಸಲು ಬಿಡುವುದಿಲ್ಲ. ಅನೇಕ ವಿಷಯಗಳಿಗೆ ಅಡ್ಡಪಡಿಸಲಾಗುತ್ತದೆ. ಪಾರ್ಸಿ ಜನಾಂಗದ ವ್ಯಕ್ತಿಯನ್ನು ಮದುವೆಯಾಗಿದ್ದ ಹಿನ್ನೆಲೆಯಲ್ಲಿ ಪ್ರಧಾನಿ ಇಂದಿರಾಗಾಂಧಿಯನ್ನು ಒಡಿಶಾದಲ್ಲಿ ದೇಗುಲ ಪ್ರವೇಶಿಸಲು ಬಿಟ್ಟಿರಲಿಲ್ಲ. ಶ್ರೀಕೃಷ್ಣನ ಹಾಡನ್ನು ಹಾಡುವ ಖ್ಯಾತ ಗಾಯಕ ಜೇಸುದಾಸ್ ಅವರನ್ನು ಗುರುವಾಯೂರು ದೇವಾಲಯದ ಒಳಗೆ ಬಿಡಲಿಲ್ಲ. ಶಬರಿಮಲೆಯಲ್ಲಿ ಮಹಿಳೆಯರಿಗೆ ಪ್ರವೇಶ ನಿಷಿದ್ಧವಿದೆ. ಇವೆಲ್ಲ ನಮ್ಮ ದೇಶದ ಜನರ ಕೊಳಕು ಮನಸ್ಥಿತಿಯನ್ನು ತೋರಿಸುತ್ತದೆ ಎಂದು ಹಿರಿಯ ಬಂಡಾಯ ಸಾಹಿತಿ ಪ್ರೊ.ಬರಗೂರು ರಾಮಚಂದ್ರಪ್ಪ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಇಂದು ವಿಧಾನಸೌಧದಲ್ಲಿ ನಡೆದ ವಾಲ್ಮೀಕಿ ಜಯಂತಿ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ವಾಲ್ಮೀಕಿ, ಕನಕದಾಸರು, ಅಂಬೇಡ್ಕರ್ ಮೊದಲಾದವರನ್ನು ನಾವು ಜಾತಿಗೆ ಸೀಮಿತ ಮಾಡಬಾರದು. ಸಾಮಾಜಿಕ ನಾಯಕರ ಜಯಂತಿಗಳು ಇಂದು ಜಾತಿಗಳ ಜಯಂತಿಗಳಾಗುತ್ತಿವೆ. ಇದರಿಂದ ಸಮಾಜದ ಜನರ ಮನಸ್ಸಿನಲ್ಲಿ ಬಿರುಕು ಮೂಡಿ ಸಮಾಜದ ಸ್ವಾಸ್ಥ್ಯ ಹಾಳಾಗುತ್ತದೆ  ಎಂದರು.

ನಾನು ದೇವರನ್ನು ನಂಬುವುದಿಲ್ಲ. ದೇವರಿದ್ದರೆ ಆತ ಬಡವರ ಗುಡಿಸಲಿಗೂ ಬಂದು ಅವರ ಕಷ್ಟಗಳನ್ನು ವಿಚಾರಿಸಬೇಕಾಗುತ್ತಿತ್ತು. ನಮ್ಮ ರಾಜಕೀಯ ನಾಯಕರು ಇನ್ನೂ ಜಾತಿಯ ಬಗ್ಗೆ ತಿಳಿದುಕೊಂಡಿಲ್ಲ. ನಮ್ಮ ಜಾತಿಯೇ ಶ್ರೇಷ್ಠ ಎಂದು ನಾಯಕರು ಹೇಳಿಕೊಳ್ಳುತ್ತಿದ್ದಾರೆ. ನಮ್ಮಲ್ಲಿ ಜಾತ್ಯತೀತತೆಗಿಂತ, ಜಾತಿಯೇ ಮುಖ್ಯವಾಗಿದೆ ಎಂದು ಹೇಳಿದರು.