ಬೆಂಗಳೂರು: ರಾಷ್ಟ್ರೀಯ ಸ್ವಯಂ ಸೇವಕ ಸಂಘದ ಅಂಗ ಸಂಸ್ಥೆಗಳ ಸಮನ್ವಯ ಸಭೆ ಬುಧವಾರ ನಡೆಯಿತು. ಬಿಜೆಪಿ ಸೇರಿದಂತೆ 30ಕ್ಕೂ ಹೆಚ್ಚು ಸಂಸ್ಥೆಗಳ ಪ್ರಮುಖರು ಸಭೆಯಲ್ಲಿ
ಪಾಲ್ಗೊಂಡು ವರದಿಗಳನ್ನು ಮಂಡಿಸಿ ಮಾಹಿತಿ ವಿನಿಮಯ ಮಾಡಿಕೊಂಡರು.

ಕಳಸಾಬಂಡೂರಿ, ಎತ್ತಿನಹೊಳೆ, ದತ್ತ ಪೀಠದಂತಹ ಪ್ರಾದೇಶಿಕ ವಿಚಾರಗಳು ಸಭೆಯಲ್ಲಿ ಚರ್ಚೆಗೆ ಬಂದವು. ಜೊತೆಗೆ ಸಂಘಟನೆಯನ್ನು ಬಲಪಡಿಸುವುದು, ಅದಕ್ಕಾಗಿನ ಕಾರ್ಯಕ್ರಮಗಳ ಬಗ್ಗೆ ಚರ್ಚೆ ನಡೆಯಿತೆಂದು ಮೂಲಗಳು ತಿಳಿಸಿವೆ. ಬಿಜೆಪಿ ಕಡೆಯಿಂದ ರೈತ ಸಾಂತ್ವನ ಯಾತ್ರೆ, ರೈತ ಚೈತನ್ಯ ಯಾತ್ರೆ ಕುರಿತಂತೆ ಪ್ರಮುಖರು ವರದಿ ಮುಂದಿಟ್ಟರು. ಶಿಕ್ಷಣದಲ್ಲಿ ಭಾರತೀಯತೆ, ಪ್ಲಾಸ್ಟಿಕ್ ಮುಕ್ತವಲಯ, ಮಾತೃಭಾಷೆ ಬಳಕೆ, ಜ.12ರಂದು ಸ್ವಾಮಿ ವಿವೇಕಾನಂದ ಜಯಂತಿ ಆಚರಣೆ ಸೇರಿದಂತೆ ವಿವಿಧ ವಿಚಾರವಾಗಿ ಮಾಹಿತಿಗಳ ವಿನಿಮಯ ನಡೆಯಿತು.

ಸಂಘದ ಕ್ಷೇತ್ರೀಯ ಪ್ರಮುಖರಾದ ವಿ.ನಾಗರಾಜ್, ಶ್ಯಾಂಕುಮಾರ್ ಅವರು ಸಭೆಯ ನೇತೃತ್ವ ವಹಿಸಿದ್ದರು. ಬಿಜೆಪಿ ರಾಜ್ಯಾಧ್ಯಕ್ಷ ಪ್ರಹ್ಲಾದ್ ಜೋಷಿ, ಕೇಂದ್ರ ಸಚಿವರಾದ ಸದಾನಂದ ಗೌಡ, ವಕ್ತಾರ ಸಿ.ಟಿ.ರವಿ ಸೇರಿದಂತೆ ಪ್ರಮುಖರು ಸಭೆಯಲ್ಲಿದ್ದರು.