ಬೆಳಗಾವಿ: ರೈಲು ಬರುತ್ತಿರುವುದನ್ನು ಗಮನಿಸಿದರೂ ರೈಲು ಹಳಿ ದಾಟಲು ಯತ್ನಿಸಿದ ಯುವಕನೊಬ್ಬನಿಗೆ ರೈಲು ಡಿಕ್ಕಿ ಹೊಡೆದ ಘಟನೆ ಮಂಗಳವಾರ ಬೆಳಗಾವಿಯ ರೇಲ್ವೆ ನಿಲ್ದಾಣದ ಬಳಿ ಸಂಭವಿಸಿದೆ. ರಾಮದುರ್ಗ ತಾಲೂಕಿನ ಸುರೇಬಾನ ಗ್ರಾಮದ ಶ್ರೀಕಾಂತ ಶಂಕರಪ್ಪ ಗೋನಬಾಳ (23) ಗಾಯಗೊಂಡಿದ್ದು, ಚಿಕಿತ್ಸೆಗಾಗಿ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ. ರೈಲು ನಿಲ್ದಾಣದಿಂದ ಹೊರಡುತ್ತಿದ್ದಂತೆಯೇ ಕೆಲವರು ರೈಲು ಹಳಿ ದಾಟಿದರು. ಈ ಯುವಕ ಕೂಡ ಆತುರದಲ್ಲಿ ಇನ್ನೇನು ಹಳಿ ದಾಟಬೇಕೆನ್ನುವಷ್ಟರಲ್ಲಿ ಬಂದ ರೈಲು ಅಪ್ಪಳಿಸಿದ್ದರಿಂದ ಯುವಕ ನೆಲಕ್ಕೆ ಅಪ್ಪಳಿಸಿ ಬಿದ್ದು, ಗಂಭೀರವಾಗಿ ಗಾಯಗೊಂಡಿದ್ದಾನೆ. ಈ ಕುರಿತು ಬೆಳಗಾವಿ ರೇಲ್ವೆ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಅಪಘಾತ                     ಐವರಿಗೆ ಗಾಯ
ಗೋಕಾಕ: ಸಂಕೇಶ್ವರ-ನರಗುಂದ ರಾಜ್ಯ ಹೆದ್ದಾರಿ ಮೇಲೆ ಕಬ್ಬು ತುಂಬಿದ ಟ್ರ್ಯಾಕ್ಟರ್‌ಗೆ ಕ್ರುಶರ್ ಹಿಂಬದಿಯಿಂದ ಡಿಕ್ಕಿ ಹೊಡೆದ ಪರಿಣಾಮವಾಗಿ ಓರ್ವ ಗಂಭೀರ ಗಾಯಗೊಂಡ ಘಟನೆ ಮಂಗಳವಾರ ರಾತ್ರಿ ತಾಲೂಕಿನ ಹೊಸನಟ್ಟಿ ಗ್ರಾಮದ ಬಳಿ ಸಂಭವಿಸಿದೆ. ಸವದತ್ತಿ ಸುಕ್ಷೇತ್ರ ಯಲ್ಲಮ್ಮ ದೇವಿಯ ದೇವರ ದರ್ಶನ ಪಡೆದು ತಾಲೂಕಿನ ಬಸಳಿಗುಂದಿ ಗ್ರಾಮಕ್ಕೆ ಮರಳುತ್ತಿದ್ದಾಗ ಚಲಿಸುತ್ತಿದ್ದ ಟ್ರ್ಯಾಕ್ಟರ್‌ಗೆ ಹಿಂಬದಿಯಿಂದ ಕ್ರೂಶರ್ ಡಿಕ್ಕಿ ಹೊಡೆದಿದ್ದರಿಂದ ಕ್ರೂಶರ್ ಚಾಲಕ ಸಿದ್ಧಪ್ಪ ಖಿಲಾರಿ (20) ಚಿಂತಾಜನಕ ಸ್ಥಿತಿಯಲ್ಲಿದ್ದಾನೆ. ಸಿದ್ದಪ್ಪ ಕುರಬಣ್ಣವರ, ಕೆಂಪಯ್ಯ ಕುರಬಣ್ಣವರ ಹಾಗೂ ಸತ್ತೆವ್ವ ವ್ಯಾಪಾರಿ ತೀವ್ರ ಗಾಯಗೊಂಡಿದ್ದಾರೆ. ಲಕ್ಕಪ್ಪ ಹಿರೇಕುರಬರ ಮತ್ತು ರೇಣುಕಾ ಚಂದರಗಿ ಅಲ್ಪವಾಗಿ ಗಾಯಗೊಂಡ ಅವರನ್ನು ಖಾಸಗಿ ಆಸ್ಪತ್ರೆಗೆ ದಾಖಲಿಸಲಾಗಿದೆ. ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.