ಪ್ಲಾಸ್ಟಿಕ್ ಸರ್ಜರಿ ಇತ್ತೀಚೆಗಂತೂ ಜನಪ್ರಿಯವಾಗುತ್ತಿರುವ ಚಿಕಿತ್ಸೆ. ಶಸ್ತ್ರಚಿಕಿತ್ಸೆಯ ವಿಶೇಷ ವಿಭಾಗಕ್ಕೆ ಪ್ಲಾಸ್ಟಿಕ್ ಸರ್ಜರಿ ಅಂತಾರೆ. ನಿಮಗೆ ಗೊತ್ತಾ, ಭಾರತದಲ್ಲಿ 2500 ವರ್ಷಗಳ ಹಿಂದಿನಿಂದಲೂ ಈ ಚಿಕಿತ್ಸೆ ಜಾರಿಯಲ್ಲಿದೆ! ದೇಹದ ವಿಕಾರಗಳನ್ನು ಇಲ್ಲವೇ ಅಪಘಾತದಿಂದ ಸಂಭವಿಸುವ ವಿಕಾರಗಳನ್ನು ಸರಿಪಡಿಸಲು ಪ್ಲಾಸ್ಟಿಕ್ ಸರ್ಜರಿ ಮಾಡಲಾಗುತ್ತದೆ. ಮಹಾಯುದ್ಧಗಳ ವೇಳೆ ಈ ಸರ್ಜರಿ ಭರ್ಜರಿಯಾಗಿ ಚಾಲ್ತಿಯಲ್ಲಿ ಬಂತು. ಚರ್ಮವನ್ನು ಕಸಿ ಮಾಡಿ, ಸುಟ್ಟ ಗಾಯಗಳನ್ನು, ಸೀಳು ತುಟಿ, ಸೀಳು ಅಂಗಗಳನ್ನು ಸರಿಪಡಿಸುವುದು ಪ್ಲಾಸ್ಟಿಕ್ ಸರ್ಜರಿಯ ಪ್ರಮುಖ ಉದ್ದೇಶ. ವಿಶೇಷ ಎಂದರೆ, ಈ ಸರ್ಜರಿಯನ್ನು ಕ್ಯಾನ್ಸರ್ ಮತ್ತು ಕುಷ್ಠ ರೋಗಿಗಳಿಗೂ ಮಾಡಲಾಗುತ್ತದೆ. ಪ್ಲಾಸ್ಟಿಕ್ ಸರ್ಜರಿಗೆ ಹೆಚ್ಚಿನ ಪರಿಣಿತಿ ಬೇಕು. ಹಾಗಾಗಿ ಇದು ತುಸು ದುಬಾರಿಯ ಶಸ್ತ್ರ ಚಿಕಿತ್ಸೆ.