ನ್ಯೂಯಾರ್ಕ್: ಟಿವಿ ಪೋರ್ನ್ ದೃಶ್ಯಗಳನ್ನು ವೀಕ್ಷಿಸುವುದು ಅಪ್ರಾಪ್ತ ಯುವಕ, ಯುವತಿಯರ ಮನಸ್ಸಿನ ಮೇಲೆ ಅಪಾಯಕಾರಿ ಪರಿಣಾಮ ಬೀರಲಿದೆ ಎಂದು ಸಂಶೋಧಕರು ಎಚ್ಚರಿಸಿದ್ದಾರೆ.
ದೂರದರ್ಶನಗಳಲ್ಲಿ ಅಶ್ಲೀಲ/ ಲೈಂಗಿಕ ಪ್ರಚೋದನಕಾರಿ ದೃಶ್ಯಗಳನ್ನು ವೀಕ್ಷಿಸುವುದು 13 -17 ವರ್ಷದ ಯುವಕ ಯುವತಿಯರಿಗೆ ತಮ್ಮ ಚಿತ್ರಗಳನ್ನೂ ಸಾಮಾಜಿಕ ಜಾಲತಾಣಗಳಲ್ಲಿ ಅಪ್ ಡೇಟ್ ಮಾಡಲು ಉತ್ತೇಜಿಸುತ್ತದೆಯಂತೆ. ಸಾಮಾಜಿಕ ಜಾಲತಾಣಗಳಲ್ಲಿ ಈ ರೀತಿಯ ಚಿತ್ರಗಳು ಲೈಂಗಿಕ ಪ್ರಚೋದನಕಾರಿ ದೃಶ್ಯಗಳನ್ನು ವೀಕ್ಷಿಸಲು ಪ್ರಚೋದನೆ ನೀಡುತ್ತದೆ ಎಂದು ಸಂಶೋಧಕರು ಹೇಳಿದ್ದಾರೆ.
ಈ ರೀತಿಯ ಅಪಾಯಕಾರಿ ವರ್ತನೆಗಳನ್ನು ತಡೆಗಟ್ಟಲು ಮಾನಸಿಕ ಆರೋಗ್ಯ ತಜ್ಞರು ಹದಿಹರೆಯದವರು ಟಿವಿಗಳಲ್ಲಿ ನೋಡುವ ದೃಶ್ಯದ ಮಾದರಿಗಳನ್ನು ನಿರ್ಣಯಿಸಬೇಕು ಎಂದು ಕ್ಯಾಲಿಫೋರ್ನಿಯಾದ ತಜ್ಞರೊಬ್ಬರು ಅಭಿಪ್ರಾಯಪಟ್ಟಿದ್ದಾರೆ. ನೆದರ್ ಲ್ಯಾಂಡ್ ನ ಆಂಸ್ಟರ್ಡ್ಯಾಮ್ ವಿಶ್ವವಿದ್ಯಾಲಯ ಇಂಟರ್ ನೆಟ್ ನಲ್ಲಿ ಅಶ್ಲೀಲತೆ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ಅಪ್ರಾಪ್ತ ವಯಸ್ಸಿನವರ ಕಂಟೆಂಟ್ ಬಗ್ಗೆ ಸಂಶೋಧನೆ ನಡೆಸಿದ್ದು ಈ ವಿಷಯ ಬಹಿರಂಗವಾಗಿದೆ. 
ವಿದ್ಯುನ್ಮಾನ ಮಾಧ್ಯಮಗಳಲ್ಲಿ ಬರುವ ಕಾರ್ಯಕ್ರಮಗಳನ್ನು ಆಯ್ಕೆ ಮಾಡಿಕೊಳ್ಳುವುದರ ಬಗ್ಗೆ ಮಕ್ಕಳಿಗೆ ಪರಿಣಾಮಕಾರಿಯಾಗಿ ಬೋಧನೆ ಮಾಡುವುದಕ್ಕೆ ಈ ಸಂಶೋಧನೆ ನೆರವಾಗಲಿದೆ. ಸೈಬರ್ ಸೈಕಾಲಜಿ, ನಡವಳಿಕೆ, ಸಾಮಾಜಿಕ ನೆಟ್ವರ್ಕಿಂಗ್ ಕುರಿತಾದ ಜರ್ನಲ್ ನಲ್ಲಿ ಈ ಸಂಶೋಧನಾ ವರದಿ ಪ್ರಕಟವಾಗಿದೆ.