ಬೆಂಗಳೂರು: ವಿವಿಧ ಇಲಾಖೆಗಳಲ್ಲಿ ಖಾಲಿ ಇರುವ ಸುಮಾರು 2,52,625 ಹುದ್ದೆಗಳನ್ನು ಭರ್ತಿ ಮಾಡಲು ಕ್ರಮ ಕೈಗೊಳ್ಳಲಾಗುತ್ತಿದೆ ಎಂದು ರಾಜ್ಯ ಸರ್ಕಾರ ತಿಳಿಸಿದೆ.

ಸದನದಲ್ಲಿ ನಿನ್ನೆ ಉತ್ತರಿಸಿದ ಕೃಷಿ ಸಚಿವ ಕೃಷ್ಣ ಭೈರೇಗೌಡ, ಸದ್ಯದಲ್ಲಿಯೇ 30,152 ಹುದ್ದೆಗಳನ್ನು ಭರ್ತಿ ಮಾಡಲಾಗುವುದು. ಮತ್ತು 17,000 ಅಭ್ಯರ್ಥಿಗಳನ್ನು ನೇಮಕಾತಿ ಮಾಡಿಕೊಳ್ಳಲು ಪ್ರಕ್ರಿಯೆ ನಡೆಯುತ್ತಿದೆ. ಅನುಮೋದನೆಗೊಂಡ 5,20,829 ಹುದ್ದೆಗಳಲ್ಲಿ 58,004 ಹುದ್ದೆಗಳು ಅಧಿಕಾರಿ ಹುದ್ದೆ ಮತ್ತು 4,62,825 ಹುದ್ದೆಗಳು ಸಿಬ್ಬಂದಿ ಹುದ್ದೆಗಳಾಗಿವೆ.

ಭಾರತೀಯ ಸಂವಿಧಾನ ವಿಧಿ 371(ಜೆ) ಪ್ರಕಾರ, ಹೈದರಾಬಾದ್-ಕರ್ನಾಟಕ ವೃಂದದ ನಿವಾಸಿಗಳಲ್ಲಿ ನೇಮಕಾತಿಯಾಗುವ 44,041 ಹುದ್ದೆಗಳಲ್ಲಿ 33,024 ಹುದ್ದೆಗಳು ನೇರ ನೇಮಕಾತಿಯಾಗಿವೆ ಎಂದು ಸಚಿವರು ವಿವರಿಸಿದರು.