ಬೆಳಗಾವಿ: ಮನೆ ಮುಂದೆ, ರಸ್ತೆಗಳಲ್ಲಿ ನಿಲ್ಲಿಸುವ ಕಾರುಗಳಿಗೆ ಹೆಲ್ಮೆಟ್ ಧರಿಸಿ ಬೆಂಕಿ ಹಚ್ಚಿ ವಿಕೃತವಾಗಿ ವರ್ತಿಸುತ್ತಿದ್ದ ವೈದ್ಯನನ್ನು ಬೆಳಗಾವಿ ಠಾಣೆ ಪೊಲೀಸರು ಬುಧವಾರ ರಾತ್ರಿ ಬಂಧನಕ್ಕೊಳಪಡಿಸಿದ್ದಾರೆ. 

ಬೆಳಗಾವಿ ವೈದ್ಯಕೀಯ ಕಾಲೇಜು (ಬಿಮ್ಸ್)ನ ರಕ್ತ ಭಂಡಾರದ ಮುಖ್ಯಸ್ಥ, ಗುಲ್ಬರ್ಗ ಮೂಲದ ಡಾ.ಅಮಿತ್ ಗಾಯಕವಾಡ (37) ಬಂಧಿತ ಆರೋಪಿ ಎಂದು ತಿಳಿದುಬಂದಿದೆ. 

ವಿಶ್ವೇಶ್ವರಯ್ಯ ನಗರದ ವಿವಂತಾ ಅಪಾರ್ಟ್'ಮೆಂಟ್'ನ ಕಾರ್ ಪಾರ್ಕಿಂಗ್ ನಲ್ಲಿ ನಿಲ್ಲಿಸಿದ್ದ ಕಾರಿಗೆ ಅಮಿತ್ ಬುಧವಾರ ಬೆಂಕಿ ಹಚ್ಚಲು ಯತ್ನಿಸುತ್ತಿದ್ದ ಸಂದರ್ಭದಲ್ಲಿ ಸ್ಥಳೀಯರು ಈತನನ್ನು ಹಿಡಿದು ಪೊಲೀಸರಿಗೆ ಒಪ್ಪಿಸಿದ್ದಾರೆ.

ಬೆಳಗಾವಿಯ ಜ.13, 14, 15 ರಂದು ಜಾಧವನಗರ ಸೇರಿ ವಿವಿಧೆಡೆ ಮಂಗಳವಾರ 7 ಐಷಾರಾಮಿ ಕಾರುಗಳಿಗೆ ಬೆಂಕಿ ಹಚ್ಚಿದ ಪ್ರಕರಣಗಳು ನಡೆಸಿತ್ತು. ಈ ಸಂಬಂಧ ವಿಶೇಷ ತಂಡ ರಚಿಸಿ ತನಿಖೆಗೆ ಆದೇಶಿಸಲಾಗಿತ್ತು. ಇದರಂತೆ ಬುಧವಾರ ಅಮಿತ್ ಕಾರೊಂದಕ್ಕೆ ಬೆಂಕಿ ಹಚ್ಚಲು ಯತ್ನ ನಡೆಸುತ್ತಿದ್ದ ಸಂದರ್ಭದಲ್ಲಿ ಪೊಲೀಸರು ಬಂಧನಕ್ಕೊಳಪಡಿಸಿದ್ದಾರೆ. ಅಮಿತ್ ಬೆಂಕಿ ಹಚ್ಚಿದ ಹಲವು ಕಾರುಗಳಲ್ಲಿ 7 ಕಾರುಗಳು ವೈದ್ಯರಿಗೆ ಸೇರಿದ್ದಾಗಿವೆ ಎಂದು ಪೊಲೀಸರು ಹೇಳಿದ್ದಾರೆ.