ಬೆಂಗಳೂರು: ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲಿ ಮಹಾಮಾರಿ ಕೊರೋನಾ ಆರ್ಭಟಿಸುತ್ತಿದ್ದು, ಕ್ಲಸ್ಟರ್ ಗಳ ಸಂಖ್ಯೆ ಇದೀಗ 18ಕ್ಕೆ ಏರಿಕೆಯಾಗಿದೆ.
ದಾಸರಹಳ್ಳಿಯ ಎರಡು ಶಾಲೆಗಳನ್ನು ಹೊರತುಪಡಿಸಿ, ಮಹದೇವಪುರದಲ್ಲಿ 12 ಮತ್ತು ಯಲಹಂಕದಲ್ಲಿ ಎರಡು ಕ್ಲಸ್ಟರ್ ಗಳು ವರದಿಯಾಗಿದ್ದರೆ, ಉಳಿದ ಕ್ಲಸ್ಟರ್ ಗಳು ಅಪಾರ್ಟ್'ಮೆಂಟ್ ಹಾಗೂ ವಿಲ್ಲಾಗಳಲ್ಲಿ ಪತ್ತೆಯಾಗಿವೆ ಎಂದು ತಿಳಿದುಬಂದಿದೆ.
ಮಹದೇವಪುರದ 11 ಕ್ಲಸ್ಟರ್‌ಗಳಲ್ಲಿ ಐದಕ್ಕಿಂತ ಕಡಿಮೆ ಪ್ರಕರಣಗಳು ಕಂಡು ಬಂದಿದ್ದು, ಮತ್ತೊಂದು ಅಪಾರ್ಟ್‌ಮೆಂಟ್‌ನಲ್ಲಿ ಒಂದು ಕ್ಲಸ್ಟರ್ ಪತ್ತೆಯಾಗಿದೆ. ಇನ್ನು ದಾಸರಹಳ್ಳಿಯ ಒಂದು ಶಾಲೆಯಲ್ಲಿ ತಲಾ ಐದರಿಂದ 14 ಸೋಂಕು ಪ್ರಕರಣಗಳು ವರದಿಯಾಗಿವೆ ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.
ಈ ನಡುವೆ ಶುಕ್ರವಾರ ರಾಜ್ಯದಲ್ಲಿ ಒಟ್ಟಾರೆ 634 ಸೋಕು ಪ್ರಕರಣಗಳು ಪತ್ತೆಯಾಗಿದ್ದು ಇಬ್ಬರು ಸಾವನ್ನಪ್ಪಿದ್ದಾರೆ. ನಗರದಲ್ಲಿ ಸಕ್ರಿಯಗಳ ಪ್ರಕರಣಗಳ ಪ್ರಮಾಣ ಶೇ.4.3ಕ್ಕೆ ತಲುಪಿದೆ.