ಅಥಣಿ (ಬೆಳಗಾವಿ): ಸಾಮಾನ್ಯವಾಗಿ ಕಾರಿನಲ್ಲಿ ಸೀಟ್ ಬೆಲ್ಟ್ ಹಾಕದಿದ್ದರೆ, ಬೈಕಿನಲ್ಲಿ ಹೆಲ್ಮೆಟ್ ಹಾಕದಿದ್ದರೆ ಪೊಲೀಸರು ಫೈನ್ ಹಾಕೋದು ಮಾಮೂಲಿ. ಆದರೆ, ಬೆಳಗಾವಿ ಜಿಲ್ಲೆಯ ಅಥಣಿಯಲ್ಲಿ ಸಂಚಾರ ಪೊಲೀಸರು ಕಾರಿನಲ್ಲಿ ಹೆಲ್ಮೆಟ್ ಹಾಕಿಲ್ಲ ಎಂದು ಫೈನ್ ಹಾಕಿದ್ದಾರೆ. ಅದಕ್ಕೆ ಕಾರಣವಾಗಿದ್ದು,  ಆರ್ಟಿಫಿಷಿಯಲ್ ಇಂಟಲಿಜೆನ್ಸ್! ಹೌದು, ಬೆಳಗಾವಿ ಜಿಲ್ಲೆಯ ಅಥಣಿಯಲ್ಲಿ ಸಂಚಾರ ಪೊಲೀಸರ ಆರ್ಟಿಫಿಶಿಯಲ್ ಇಂಟೆಲಿಜೆನ್ಸ್ (AI) ಕ್ಯಾಮೆರಾ ಇಂತಹದ್ದೊಂದು ರೋಚಕ ಎಡವಟ್ಟು ಮಾಡಿದ್ದು, ಇಡೀ ರಾಜ್ಯದಲ್ಲಿ ಭಾರಿ ಚರ್ಚೆಗೆ ಕಾರಣವಾಗಿದೆ. ಆ ಕುರಿತ ವರದಿ ಇಲ್ಲಿದೆ:

ಏನಿದು ಘಟನೆ?

ಬೆಳಗಾವಿ ಜಿಲ್ಲೆಯ ಅಥಣಿ ಪಟ್ಟಣದ ನಿವಾಸಿ ಸುಭಾಷ್ ಬೋಜನೆ ಎಂಬುವವರು ತಮ್ಮ ಕಾರಿನಲ್ಲಿ ಅಂಬೇಡ್ಕರ್ ಸರ್ಕಲ್ ಬಳಿ ಸಂಚರಿಸುತ್ತಿದ್ದರು. ಈ ವೇಳೆ ಅಲ್ಲಿ ಅಳವಡಿಸಲಾಗಿದ್ದ ಎಐ ಟ್ರಾಫಿಕ್ ಕ್ಯಾಮೆರಾ ಇವರ ಕಾರಿನ ಫೋಟೋ ಸೆರೆಹಿಡಿದಿದೆ. ಇದಾದ ನಂತರ, ಸುಭಾಷ್ ಅವರ ಮೊಬೈಲ್‌ನ ವಾಟ್ಸಾಪ್ ಸಂಖ್ಯೆಗೆ ಸಂಚಾರ ಪೊಲೀಸರಿಂದ ₹500 ದಂಡದ ಇ-ಚಲನ್ ನೋಟಿಸ್ ಬಂದಿದೆ. ಅದನ್ನು ಓಪನ್ ಮಾಡಿ ನೋಡಿದಾಗ ಕಾರಿನ ಚಿತ್ರವಿದ್ದು, ನಿಯಮ ಉಲ್ಲಂಘನೆಯ ಜಾಗದಲ್ಲಿ "ಹೆಲ್ಮೆಟ್ ಧರಿಸಿಲ್ಲ" ಎಂದು ನಮೂದಿಸಲಾಗಿತ್ತು!

ತಾಂತ್ರಿಕ ದೋಷವೇ ಕಾರಣ..

ಸಂಚಾರ ನಿಯಮ ಉಲ್ಲಂಘನೆಗಳನ್ನು ಸ್ವಯಂಚಾಲಿತವಾಗಿ ಪತ್ತೆಹಚ್ಚಲು ಅಳವಡಿಸಲಾಗಿರುವ ಎಐ ಕ್ಯಾಮೆರಾದ ತಾಂತ್ರಿಕ ದೋಷದಿಂದಾಗಿ ಈ ಎಡವಟ್ಟು ಸಂಭವಿಸಿದೆ. ಸಿಸ್ಟಮ್ ಕಾರನ್ನು ದ್ವಿಚಕ್ರ ವಾಹನ ಎಂದು ತಪ್ಪಾಗಿ ಗುರುತಿಸಿ ದಂಡ ಸೃಷ್ಟಿಸಿದೆ. ಆದರೆ, ಅದನ್ನು ಮರುಪರಿಶೀಲಿಸಬೇಕಿದ್ದ ಸಂಚಾರ ಪೊಲೀಸರು ಕೂಡ ಗಮನಿಸದೇ ನೇರವಾಗಿ ನೋಟಿಸ್ ರವಾನಿಸಿದೆ.

ಕಾರಿನೊಳಗೆ ಹೆಲ್ಮೆಟ್ ಧರಿಸಿ ವಿನೂತನ ಪ್ರತಿಭಟನೆ

ಈ ವಿಚಿತ್ರ ನೋಟಿಸ್ ಕಂಡು ತಬ್ಬಿಬ್ಬಾದ ಕಾರು ಮಾಲೀಕ ಸುಭಾಷ್, ಪೊಲೀಸರ ಈ ಯಡವಟ್ಟನ್ನು ಖಂಡಿಸಲು ಶನಿವಾರ ತಮ್ಮ ಕಾರಿನೊಳಗೆ ಹೆಲ್ಮೆಟ್ ಧರಿಸಿಯೇ ಡ್ರೈವಿಂಗ್ ಮಾಡುವ ಮೂಲಕ ವಿನೂತನವಾಗಿ ಪ್ರತಿಭಟಿಸಿದ್ದಾರೆ. "ಇನ್ಮುಂದೆ ಕಾರು ಓಡಿಸುವಾಗಲೂ ಹೆಲ್ಮೆಟ್ ಧರಿಸಬೇಕಾ?" ಎಂದು ಅವರು ವ್ಯಂಗ್ಯವಾಡಿದ್ದು, ಈ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗಿದೆ.