ದುಬಾರಿ ಶಾಂಪೂ ಮತ್ತು ಕಂಡೀಷನರ್ ಬಳಸಿದರೂ ಕೂದಲಿನ ಸಮಸ್ಯೆ ಕಡಿಮೆಯಾಗುತ್ತಿಲ್ಲವೇ. ತಲೆಹೊಟ್ಟು, ಕೂದಲುದುರುವಿಕೆ ಮತ್ತು ಒಣ ಕೂದಲು ನಿಮ್ಮನ್ನು ಕಾಡುತ್ತಿದೆಯೇ. ಹಾಗಾದರೆ ನಿಮ್ಮ ಅಡುಗೆ ಮನೆಯಲ್ಲಿರುವ ಒಂದು ಸರಳ ವಸ್ತುವೇ ಇದಕ್ಕೆ ಪರಿಹಾರ ನೀಡಬಲ್ಲದು. ಅದು ಮೊಸರು. ಮೊಸರಿನಲ್ಲಿ ಇರುವ ನೈಸರ್ಗಿಕ ಗುಣಗಳು ಕೂದಲಿನ ಎಲ್ಲ ಸಮಸ್ಯೆಗಳನ್ನು ಬಗೆಹರಿಸಿ ಕೂದಲನ್ನು ಆರೋಗ್ಯಕರವಾಗಿಡುತ್ತದೆ.

ತಲೆಹೊಟ್ಟಿನ ಸಮಸ್ಯೆಗೆ ರಾಮಬಾಣ

ತಲೆಹೊಟ್ಟು ಇರುವವರಿಗೆ ಮೊಸರು ಅತ್ಯುತ್ತಮ ಪರಿಹಾರ. ಮೊಸರಿನಲ್ಲಿ ಲ್ಯಾಕ್ಟಿಕ್ ಆಮ್ಲ ಮತ್ತು ಆಂಟಿ ಫಂಗಲ್ ಗುಣಗಳಿದ್ದು ನೆತ್ತಿಯಲ್ಲಿರುವ ಬ್ಯಾಕ್ಟೀರಿಯಾವನ್ನು ನಿವಾರಿಸುತ್ತದೆ. ವಾರಕ್ಕೆ ಎರಡು ಬಾರಿ ನೆತ್ತಿಗೆ ಮೊಸರನ್ನು ಹಚ್ಚಿ 30 ನಿಮಿಷ ಬಿಟ್ಟು ತೊಳೆಯುವುದರಿಂದ ತಲೆಹೊಟ್ಟು ಸಂಪೂರ್ಣವಾಗಿ ಕಡಿಮೆಯಾಗುತ್ತದೆ. ಇದರಲ್ಲಿರುವ ಪ್ರೋಬಯಾಟಿಕ್ ನೆತ್ತಿಯನ್ನು ತಂಪಾಗಿರಿಸುತ್ತದೆ.

ಕೂದಲುದುರುವಿಕೆ ಮತ್ತು ಒಣ ಕೂದಲಿಗೆ ಪರಿಹಾರ

ಮೊಸರಿನಲ್ಲಿ ಪ್ರೋಟೀನ್ ಮತ್ತು ವಿಟಮಿನ್ ಬಿ 12 ಹೇರಳವಾಗಿದೆ. ಇದು ಕೂದಲಿನ ಬೇರನ್ನು ಬಲಪಡಿಸಿ ಕೂದಲುದುರುವಿಕೆಯನ್ನು ತಡೆಯುತ್ತದೆ. ಒಣ ಮತ್ತು ಒರಟಾದ ಕೂದಲಿಗೆ ಮೊಸರು ನೈಸರ್ಗಿಕ ಕಂಡೀಷನರ್ ನಂತೆ ಕೆಲಸ ಮಾಡುತ್ತದೆ. ಮೊಸರಿನ ಜೊತೆ ಸ್ವಲ್ಪ ಜೇನುತುಪ್ಪ ಬೆರೆಸಿ ಕೂದಲಿಗೆ ಹಚ್ಚಿದರೆ ಕೂದಲು ಮೃದುವಾಗಿ ಮತ್ತು ಹೊಳೆಯುವಂತೆ ಆಗುತ್ತದೆ.

ಕೂದಲಿನ ಬೆಳವಣಿಗೆಗೆ ಸಹಾಯಕ

ಕೂದಲು ಬೇಗ ಬೆಳೆಯಬೇಕೆಂದು ಬಯಸುವವರಿಗೆ ಮೊಸರು ವರದಾನ. ಮೊಸರಿನಲ್ಲಿರುವ ಪೋಷಕಾಂಶಗಳು ನೆತ್ತಿಯಲ್ಲಿ ರಕ್ತ ಸಂಚಾರವನ್ನು ಹೆಚ್ಚಿಸಿ ಹೊಸ ಕೂದಲು ಬೆಳೆಯಲು ಸಹಾಯ ಮಾಡುತ್ತದೆ. ಮೊಸರಿನ ಜೊತೆ ಮೊಟ್ಟೆ ಅಥವಾ ಬಾಳೆಹಣ್ಣು ಬೆರೆಸಿ ಹೇರ್ ಪ್ಯಾಕ್ ಮಾಡಿದರೆ ಕೂದಲು ದಪ್ಪವಾಗಿ ಮತ್ತು ಸದೃಢವಾಗಿ ಬೆಳೆಯುತ್ತದೆ.

ಕೂದಲಿನ ತುದಿ ಒಡೆಯುವ ಸಮಸ್ಯೆ ಇದ್ದರೆ ಮೊಸರಿನಿಂದ ಪರಿಹಾರ ಸಿಗುತ್ತದೆ. ಮೊಸರು ಕೂದಲಿಗೆ ತೇವಾಂಶ ನೀಡಿ ಸೀಳು ತುದಿಯನ್ನು ಸರಿಪಡಿಸುತ್ತದೆ. ಜೊತೆಗೆ ಮಾಲಿನ್ಯದಿಂದ ಕೂದಲು ತನ್ನ ಹೊಳಪನ್ನು ಕಳೆದುಕೊಂಡಿದ್ದರೆ ಮೊಸರು ಪ್ಯಾಕ್ ಹಚ್ಚುವುದರಿಂದ ಕೂದಲಿನ ಸಹಜ ಹೊಳಪು ಮರಳಿ ಬರುತ್ತದೆ.

ಹಾಗಾದ್ರೆ, ಹೇಗೆ ಬಳಸಬೇಕು?

ಒಂದು ಕಪ್ ಹುಳಿ ಮೊಸರನ್ನು ಚೆನ್ನಾಗಿ ಮಿಕ್ಸ್ ಮಾಡಿ ನೇರವಾಗಿ ನೆತ್ತಿ ಮತ್ತು ಕೂದಲಿಗೆ ಹಚ್ಚಿ. 30 ರಿಂದ 45 ನಿಮಿಷ ಬಿಟ್ಟು ಸೌಮ್ಯವಾದ ಶಾಂಪೂವಿನಿಂದ ತೊಳೆಯಿರಿ. ಉತ್ತಮ ಫಲಿತಾಂಶಕ್ಕಾಗಿ ವಾರಕ್ಕೆ ಎರಡು ಬಾರಿ ಇದನ್ನು ಮಾಡಬಹುದು. ಬೇಕಾದರೆ ಮೊಸರಿನ ಜೊತೆ ನಿಂಬೆ ರಸ, ಅಲೋವೆರಾ ಅಥವಾ ಮೆಂತೆ ಪುಡಿ ಸೇರಿಸಬಹುದು.